|
 Sentyabrın
21-də AMEA-da Təhsil Nazirliyi və Azərbaycan
Milli Elmlər Akademiyasının birgə təşkilatçılığı
ilə "Müstəqil Azərbaycanın 20 il ərzində keçdiyi
tarixi yol" mövzusunda elmi-praktik konfrans
keçirildi. Konfransda tanınmış alim və
mütəxəssislər, təhsil işçiləri iştirak
edirdilər.
Konfrans iştirakçıları "Müstəqil Azərbaycanın 20
il ərzində keçdiyi tarixi yol" mövzusunda təşkil
olunmuş sərgiyə baxdılar.
Sonra konfransı giriş sözü ilə Azərbaycan
MEA-nın birinci vitse-prezidenti Arif Həşimov
açaraq tədbirin əhəmiyyətindən danışdı.
Çıxış üçün ilk söz təhsil naziri Misir
Mərdanova verildi. Nazir "Müstəqil Azərbaycan
Respublikasında yeni təhsil sisteminin
formalaşması və inkişafı" mövzusunda çıxış
edərək bildirdi ki, bu il oktyabrın 18-də
Azərbaycan Respublikasının dövlət
müstəqilliyinin bərpa edilməsinin iyirminci
ildönümü tamam olur. Bu tarixi hadisə ilə
əlaqədar ölkə başçısı cənab İlham Əliyev
tərəfindən "Azərbaycan Respublikasının dövlət
müstəqilliyinin bərpasının iyirminci ildönümü
haqqında" sərəncam imzalanmışdır və bugünkü
tədbirimiz də həmin sərəncama uyğun olaraq
keçirilir.
Sərəncamda qeyd olunur ki, "bu illər ərzində
demokratik, hüquqi və dünyəvi dövlətin qurulması
xalqımızın tarixi nailiyyətidir". Həmin
nailiyyətlərdən biri də təhsil sisteminin
inkişafı sahəsində əldə etdiyimiz
nailiyyətlərdir.
 Təhsil
naziri qeyd etdi ki, 1993-cü ildə xalqın
tələbilə ümummilli lider Heydər Əliyevin
hakimiyyətə qayıdışı təhsil sahəsində
islahatların aparılmasına şərait yaratdı. Milli
təhsil quruculuğu sahəsində əhəmiyyətli addımlar
atıldı, ölkədə milli təhsil sistemi yaradılmağa
başladı.1995-ci ildə müstəqil Azərbaycan
Respublikasının ilk Konstitusiyası qəbul edildi
və Konstitusiyanın 42-ci maddəsində
vətəndaşların təhsil hüququ təsbit edildi.
1999-cu il iyunun 15-də Azərbaycan Respublikası
Prezidentinin sərəncamı ilə təsdiq edilmiş
təhsil sahəsində İslahat Proqramı ölkəmizdə
təhsilin inkişaf strategiyasını və islahatların
mərhələlərini müəyyənləşdirdi.
Təhsilə göstərilən dövlət qayğısından danışan
nazir dedi ki, təhsil tariximizdə ilk dəfə
olaraq 16 dövlət proqramı hazırlanmış və
uğurla həyata keçirilməkdədir. Təhsilin
ayrı-ayrı sahələrinin inkişafı üzrə real
vəziyyətin təhlili əsasında hazırlanıb təsdiq
edilmiş bu proqramların reallaşması nəticəsində
təhsil infrastrukturunun müasir tələblərə uyğun
qurulması, təhsilin məzmununun yeniləşdirilməsi,
yeni dərslik siyasətinin reallaşdırılması,
məktəbəqədər, texniki peşə, ali təhsil, xaricdə
təhsil, istedadlı uşaqların inkişafı,
de-institutlaşdırma və digər bu kimi sahələrdə
əhəmiyyətli nailiyyətlər əldə olunmuşdur.
Hazırda ölkəmizdə 1623 məktəbəqədər təhsil
müəssisəsinin fəaliyyət göstərməsini, həmin
müəssisələrdə 112 mindən artıq uşağın tərbiyə
olunmasını, onların təlim-tərbiyəsi ilə 13 min
pedaqoji işçinin məşğul olmasını da Misir
Mərdanov konfrans iştirakçılarının nəzərinə
çatdırdı. Qeyd etdi ki, son illərdə ölkə üzrə
31 yeni uşaq bağçası tikilib istifadəyə
verilmiş, 40-dək məktəbəqədər təhsil müəssisəsi
əsaslı təmir edilmiş, 200 müəssisə müasir
avadanlıqlarla təchiz olunmuşdur. Əsaslı təmir
olunan məktəblərin sayı isə 2000-i ötmüşdür.
Təhsil naziri Misir Mərdanov çıxışını
Azərbaycanda təhsilin inkişaf perspektivlərinin
əsasında möhtərəm Prezidentimiz İlham Əliyevin
söylədiyi konseptual fikri ilə tamamladı: "Biz
maddi dəyərlərimizi, iqtisadi potensialımızı
insan kapitalına çevirməliyik. Çünki insanın
savadı, biliyi onun gələcək inkişafına xidmət
edir", "Neft, qaz Tanrıdan verilən böyük
nemətdir, amma gec-tez bu təbii sərvətlər
tükənəcək və bilik, zəka ölkəmizin davamlı
inkişafını uzun illər bundan sonra təmin
edəcəkdir. Ən inkişaf etmiş ölkələrin
təcrübəsinə baxsaq görərik ki, o ölkənin
inkişafında aparıcı rol oynayan neft, qaz deyil,
bilikdir, elmi- texniki tərəqqidir, yeni
texnologiyalardır".
Konfransda Azərbaycan MEA-nın birinci
vitse-prezidenti Arif Həşimov "Azərbaycanda
təbiət elmləri son 20 ildə: mövcud elmi
potensial və inkişaf perspektivləri", Azərbaycan
MEA-nın vitse-prezidenti Nailə Vəlixanlı
"Müstəqillik illərində Azərbaycanda
ictimai-humanitar elmlər", BDU-nun prorektoru
İradə Əliyeva "Müstəqillik illərində
Azərbaycanın ali təhsil müəssisələrində elmi
tədqiqatların inkişaf yolu" və Azərbaycan MEA
Naxçıvan Bölməsinin sədri İsmayıl Hacıyev
"Müstəqillik illərində Naxçıvan Muxtar
Respublikasında akademik elmin inkişafı"
mövzularında çıxışlar etdilər.
Konfransın sonunda "Elm məbədi müstəqillik
illərində" filminin nümayişi oldu.
Şakir CƏFƏROV |
