|
 2008-ci
ildən yeni strukturla fəaliyyətə başlayan Bakı
Pedaqoji Kadrların İxtisasartırma və
Yenidənhazırlanma İnstitutu xarici ölkələrin
müvafiq elm və ali təhsil müəssisələri ilə
əməkdaşlığın inkişafını daim diqqət mərkəzində
saxlayır. Bu fəaliyyətin nəticəsidir ki, qısa
müddət ərzində dünyanın 15-ə qədər ali məktəbi
ilə elm və təhsil sahəsində əməkdaşlığa dair
müqavilələr imzalanmış, konkret işlər həyata
keçirilmişdir.
İnstitutumuzun əsas təşkilatçılığı ilə son üç
ildə dörd beynəlxalq konfransın keçirilməsi
(“Повышение квалификации педагогических кадров в
условиях глобализации: реалии и перспективы”.
Баку, 2008, “Последипломное педагогическое
образование: европейские ориентиры и
региональные приоритеты”. Киев, 2009,
“Инновация, качество образования и развитие”
Баку, 2010; “Инновационная образовательная
деятельность: региональные аспекты”. Киев,
2011), maliyyə həcminə görə Cənubi Qafqazda ən
böyük layihə - TEMPUS-RİTSA layihəsində
iştirakımız (Fransanın, Böyük Britaniyanın,
Almaniyanın, İtaliyanın, həmçinin Azərbaycanın
ali məktəbləri ilə birgə) görülən konkret işlər
sırasındadır.
İvanovsk Vilayət Təhsilin İnkişafı İnstitutunun
rektoru, professor Marina Dmitriyevanın dəvəti
və təhsil naziri, professor Misir Mərdanovun
razılığı ilə institutumuzun rektoru, professor
Asəf Zamanov 2012-ci ildə Bakıda keçirilməsi
nəzərdə tutulan "İnnovasiya, təhsilin keyfiyyəti
və inkişaf" II Beynəlxalq konfransın təşkili ilə
əlaqədar hazırlıq işlərinin görülməsi, əlavə
təhsilin problemləri və perspektivləri sahəsində
aparılan elmi-tədqiqat işlərinin nəticələrinin
çapı üçün beynəlxalq elmi-metodik jurnalın
konsepsiyasının hazırlanması (elmi-metodik
jurnal Azərbaycan, Belarus, Rusiya, Qazaxıstan,
Ukraynanın müvafiq ali məktəblərinin təsisçiliyi
ilə rus və ingilis dillərində nəşr ediləcəkdir),
əlavə təhsil sisteminin təkmilləşdirilməsi
istiqamətində perspektiv fəaliyyətin
müəyyənləşdirilməsi məqsədi ilə cari ilin 12-16
sentyabr tarixlərində adıçəkilən institutda
ezamiyyədə olmuşdur. Rektor pedaqoji kadrların
ixtisasartırması sahəsində aparıcı ali
məktəblərdən olan İvanovsk Vilayət Təhsilin
İnkişafı İnstitutunda aparılan işlərlə tanış
olmuş, innovasiyalarla zəngin ixtisasartırma
kurslarında, xüsusilə rəhbər pedaqoji kadrlar
üçün kurslarda informasiya-kommunikasiya
texnologiyalarının köməyi ilə ixtisasartırmanın
həyata keçirilməsi prosesini izləmişdir.
Professor Marina Dmitriyeva və İvanovsk Vilayət
Təhsil Departamentinin I müavini Natalya
Sokolova ilə görüşdə təhsil sahəsində
əməkdaşlıq, həmçinin "İnnovasiya, təhsilin
keyfiyyəti və inkişaf" II Beynəlxalq elmi
konfransın təşkili ilə əlaqədar məsələlər
müzakirə olunmuşdur. Pedaqoqların professional
səviyyəsinin yüksəldilməsi, müasir həyatın
tələbinə uyğun pedaqoji korpusun formalaşması
təhsil sisteminin modernləşməsinin zəruri olduğu
nəzərə alınaraq əlavə təhsil sisteminin
perspektiv istiqamətlərinin
müəyyənləşdirilməsində aşağıdakıların həyata
keçirilməsi qərara alınmışdır: pedaqoqların
fərdi ixtisasartırma sisteminin tətbiqi; ümumi
təhsilin müasirləşdirilməsi layihəsi
çərçivəsində rəhbər pedaqoji kadrların və kadr
ehtiyatının yenidənhazırlanması; distant
təhsilin bazasının yaradılması və inkişafı;
ölkələrimizin təhsilin inkişafı strategiyaları
layihələri çərçivəsində pedaqoqların ixtisasının
artırılması; təhsil alanların sağlam və
təhlükəsiz həyat tərzi mədəniyyətinin
formalaşdırılması; peşə əməkdaşlığının
genişləndirilməsi; distant təhsil
texnologiyalarının təhsil prosesinə tətbiqi,
həmçinin ixtisasartırmanın innovativ
formalarının (master klass, seminarlar,
treninqlər, işgüzar oyunlar, debatlar, brifinq
seminarlar, vebinarlar, İnternet-seminarlar,
telekonfranslar) tətbiqi.
Asəf müəllim həmçinin müasir
informasiya-kommunikasiya texnologiyaları ilə
təchiz edilmiş İvanovo şəhər 18, 21 və 67
nömrəli, İvankovsk kənd məktəblərində məktəbin
idarə edilməsi və tədris prosesinin təşkili ilə
də tanış olmuşdur. Maraqlı faktdır ki, 18
nömrəli məktəbdə təhsil alan 560 şagirdin 43-ü
azərbaycanlıdır. Qeyd etmək yerinə düşər ki,
ötən dərs ilində İvankovsk kənd məktəbinin 1-i
qızıl, 3-ü gümüş medala layiq görülmüş cəmi 10
məzununun hamısı ali məktəblərə daxil olmuşdur.
Rektor Rusiya Azərbaycan Konqresinin İvanovsk
Vilayət şöbəsinin rəhbərliyi, həmçinin fəalları
ilə də görüşmüşdür.
Sevinc QULİYEVA,
BPKİYİ-nin Beynəlxalq əlaqələr şöbəsinin müdiri
|
|
