|
 Bu
yaxınlarda İordaniya Haşimilər Krallığının
Tərbiyə və Təhsil Nazirliyi tərəfindən 6-16
yaşlı uşaqlar arasında rəssamlıq, qrafika,
fotoqrafika, keramika sənəti üzrə Beynəlxalq
incəsənət müsabiqəsi keçirilmişdir. Həmin
müsabiqəyə Bakı Şəhər Nizami rayonu
Uşaq-Gənclər Yaradıcılıq Mərkəzinin rəsm və gənc
fototurist dərnəyinin üzvləri də qatılmışdı. 47
gəncin ən yaxşı rəsm işləri və 39 foto bu
müsabiqəyə göndərilmişdi.
Mərkəzin direktoru Lalə Qətinin sözlərinə görə,
müsabiqənin nəticəsi böyük həyəcanla
gözlənilirdi. Nəhayət, eşitdik ki, mərkəzin 3
üzvü qaliblər sırasına çıxıb. Ləman Ağazadə
bürünc medal, Şəbnəm İsmixanova və Darya
Arefyeva medal və diplomlara layiq görülüblər.
Oktyabrın 5-də İordaniya Haşimilər Krallığının
Azərbaycandakı səfirliyində qaliblərin
mükafatlandırılması mərasimi keçirilib. Öncə
mərkəzin direktoru Lalə Qəti çıxış edərək
mərkəz haqqında məlumat verib. Qeyd edib ki,
mərkəzdə 2000-ə yaxın uşaq, yeniyetmə və gənc
32 adda dərnəkdə öz asudə vaxtlarını səmərəli
və faydalı keçirir. Gənclərin dünyagörüşünün
formalaşdırılması, istedad və
qabiliyyətlərinin üzə çıxarılması məqsədilə
vaxtaşırı təşkil olunan mədəni-kütləvi
tədbirlər mühüm əhəmiyyət kəsb edir. Mərkəzin
üzvləri nəinki respublikamızda, hətta
beynəlxalq səviyyəli festival və müsabiqələrdə
də böyük uğur və nailiyyətlər qazanır.
Tədbirdə uşaqların istedad və bacarıqlarının üzə
çıxarılmasında böyük əməyi olan Nərmin
Abdullayeva, direktor müavini Kəmalə
Əncümənnur və valideynlər çıxış edərək
qalibləri təbrik ediblər.
İordaniya Haşimilər Krallığının Azərbaycandakı
səfiri Adel Mohammad Adaileh uşaqları
salamlayaraq onlara medal və diplomları,
müsabiqə kataloqunu təqdim edib və qaliblərə
gələcək fəaliyyətlərində yaradıcılıq uğurları,
daha böyük nailiyyətlər arzulayıb.
Mərasimin sonunda direktor Lalə Qəti mərkəzin
emblemi olan döş nişanını və mərkəz haqqında
buklet, suvenir və hədiyyələri səfirliyin
nümayəndəsinə təqdim edib.
Sifai SƏFƏROVA |
