|
 Pıçıltı
nəğməli bulaqlar saflığı ilə, məcrasında sakit
axan çaylar keçdiyi yollarında cansız, quru
səhralara həyat bəxş edib gözoxşayan yaşıllıqlar,
güllü-çiçəkli, bağlı-bağatlı ormanlar yaratdığı
üçün sevildiyi kimi dünyaya göz açan insanlar da
yaşayaraq arxada qoyduğu ömür payında əməllərinə
və qazandığı nailiyyətlərinə görə ictimaiyyət
tərəfindən seçilərək sayılırlar. Peşəsindən,
vəzifəsindən, harada işləməsindən asılı
olmayaraq əməli və fəaliyyəti ilə xalqına,
dövlətinə xeyir verməyə çalışanlar əsl vətəndaş
kimi onu tanıyanlar tərəfindən sevilirlər. Belə
insanlardan biri, Təhsil Nazirliyinin Kənd
rayonları üzrə ümumi təhsil şöbəsinin baş
məsləhətçisi vəzifəsində çalışan Əhliyət
Adıgözəlov haqqında söz açmaq niyyətindəyəm.
Adıgözəlov Əhliyət Musa oğlu 1956-cı il
sentyabrın 10-da Qubadlı rayonunun Cılfır
kəndində ziyalı ailəsində anadan olub. O zaman
kənddə məktəb olmadığı üçün I-IV sinifləri qonşu
Seytas kəndində oxuyub. 1973-cü ildə isə Gorus
rayonunun Şurnuxu kənd orta məktəbini "əla"
qiymətlərlə başa vurub. 1974-cü ildə Azərbaycan
Dövlət Pedaqoji İnstitutunun (indiki ADPU)
ümumtexniki fənlər və fizika fakültəsinə qəbul
olan Əhliyət 1979-cu ildə ali təhsilini bitirib.
Həmin il təyinatla Qubadlıya göndərilib və
rayonun Göyərçik kənd 8 illik məktəbində
ixtisası üzrə müəllim kimi ilk əmək fəaliyyətinə
başlayıb. Bu məktəbdə dərs saatı az olduğu üçün
həftənin iki gününü burada, qalan dörd gününü
isə vaxtilə orta təhsil aldığı təhsil
müəssisəsində fizika fənnini tədris edib.
1984-cü ildə Bakıya köçdüyü üçün Qaradağ
rayonunun 224 nömrəli əsas məktəbinə ixtisası
üzrə işə qəbul edilib. Burada yaxşı müəllim kimi
pedaqoji kollektivin, şagirdlərin və
valideynlərin hörmətini qazanan Əhliyət müəllim
1986-cı ildə rayon rəhbərliyi tərəfindən irəli
çəkilərək Qaradağ Rayon Təhsil Şöbəsində məktəb
inspektoru vəzifəsinə təyin olunub.
1999-cu ildə təhsilin humanistləşdirilməsi ilə
bağlı Bakı şəhəri üzrə keçirilmiş müsabiqədə və
pedaqoji mühazirələrdə iştirak edən Əhliyət
Adıgözəlov əldə etdiyi nəticəyə görə I dərəcəli
Diploma layiq görülüb və həmin ildə də savadlı
mütəxəssis kimi Təhsil Nazirliyinə işə gətirilib.
Yeri gəlmişkən qeyd edim ki, Əhliyət Adıgözəlov
1999-cu ildən bu günə kimi Təhsil Nazirliyinin
nəzdində fəaliyyət göstərən
psixoloji-tibbi-pedaqoji komissiyanın sədridir.
Əhliyət müəllim nazirlikdə işlədiyi ötən 12 il
ərzində kifayət qədər nailiyyətlər əldə edib.
Belə ki, inklüziv təhsilin pilot-layihə
formasında tətbiqi ilə bağlı aparılan işlərin
təşkilatçılarından biri olub. 2003-cü ildən
2007-ci ilə kimi təhsil sektorunun inkişafı
layihəsinin məktəb qrantı proqramı komponentinin
koordinatoru olub. İsmayıllı, Ucar və Şirvan
şəhərlərində bu komponentə rəhbərlik edib,
inkişafyönümlü layihələrin hazırlanmasında həmin
rayonların pedaqoji kollektivlərinə yaxından
köməklik göstərib.
2003-cü ilin iyun ayında İtaliyanın Turin
şəhərində iki həftəlik beynəlxalq kurs keçib.
2004-cü ilin iyun ayında Norveçin Stavanger,
2006-cı ildə Xorvatiyanın Zaqreb, sonrakı
illərdə isə xüsusi təhsillə bağlı Riqa və Vilnüs
şəhərlərində keçirilən konfrans və seminarlarda
iştirak edən Əhliyət Adıgözəlov Azərbaycan
təhsilini layiqincə təmsil edə bilib. O,
istedadlı uşaqların yaradıcılıq potensialının
üzə çıxarılması və inkişafı ilə bağlı Dövlət
Proqramının həyata keçirilməsində xeyli mühüm
işlər görüb. Əhliyət müəllim səmərəli
fəaliyyətinə görə bir sıra diplom və fəxri
fərmanlara layiq görülüb. Bu günlərdə isə 55
yaşının tamam olması münasibətilə nazirlik
tərəfindən "Azərbaycan Respublikasının qabaqcıl
təhsil işçisi" döş nişanı ilə təltif edilib.
Əhliyət müəllimi xeyli illərdir ki, tanıyıram.
Onunla Təhsil Nazirliyində və bir sıra tədris
müəssisələrində keçirilən tədbirlərdə tez-tez
görüşürük. İşinin mahir bilicisi olan bu insan
sadəliyi, təvazökarlığı və səmimiliyi ilə
diqqətimi cəlb edib. Bu günlərdə 55 yaşının
tamam olacağını bilib sevindim. Telefonun
dəstəyini qaldırıb nömrələri yığdım, xəttin o
biri başında Əhliyət müəllimin qayğılı səsini
eşitdim. Onunla görüşüb haqqında məqalə yazmaq
istəyimi ona bildirdim. Düşündüyüm kimi, əvvəlcə
təvazökarlıq edərək buna ehtiyacın olmadığını
dedi və diqqətimə görə mənə təşəkkür etdi.
Nəhayət, razılığını aldım, onunla görüşüb
müsahibə almaq üçün vaxt ayırdıq. Vədələşdiyimiz
kimi ertəsi gün nazirliyə getmək üçün
dəftər-qələmimi qoltuğuma vurub iş otağımdan
çıxdım. Gün ərzində səngimədən yağan yağış
düzü-dünyanı yuyub təmizləmiş və nəhayət ki
kəsmişdi. Səma aydın, hava günəşli olsa da, Bakı
küləyi öz şıltaqlığından qalmırdı. Təhsil
Nazirliyində Əhliyət müəllimlə kabinetində, iş
başında köhnə dostlar kimi çox səmimi görüşdük.
Çöhrəsindən yağan yorğunluq işinin çoxluğundan
xəbər verirdi. Yazı stolunun üstünə yığılmış
qalaq-qalaq kağızlar, qovluqlar, tez-tez
səslənən telefon zəngləri bunu bir daha sübut
edirdi.
Stolun üstündə dəftərimə birtəhər yer eləyib
müsahibə almaq üçün ona verəcəyim suallara
keçdim. Və Əhliyət müəllimdən aldığım cavabları
hörmətli oxucularıma təqdim edirəm:
- Siz orta məktəbi "əla" qiymətlərlə bitirmisiz.
Elə buna görə də o zaman reytinqi yüksək olan
istənilən ali məktəbə qəbul ola bilərdiniz. Bəs
nə üçün APİ-ni seçdiniz?
- Ziyalı ailəsində anadan olmuşam. Atam uzun
müddət dövlət işində işləyib. Bir neçə çağırış
rayon sovetinin deputatı olub. Onun müəllim
peşəsinə və müəllimlərə xüsusi hörməti vardı.
Həmişə - insan öyrətməkdən, insan tərbiyə
etməkdən savablı iş yoxdur - deyirdi. Hələ orta
məktəbdə mənə dərs demiş İdris Həşimovu, Əli
Adıgözəlovu, Hidayət Məsməliyevi və başqalarını
özümə meyar seçmiş, gələcək həyatımda onlar kimi
olmaq, geyimdə, səliqə-sahmanda, davranışda
onlara oxşamağı qarşıma məqsəd qoymuşdum. Və
buna nail olduğum üçün sevinirəm.
- Bugünkü müəllimi necə görürsünüz?
- Keçmiş zamanlarda müəllimə müqəddəs varlıq
kimi baxırdılar. Çünki o vaxtlar müəllimlərin
yeganə qayğısı dərsini yaxşı keçməkdən, tədrisi
lazımi səviyyədə aparmaqla şagirdlərə yüksək
bilik öyrətməkdən ibarət olub. Hazırda
qloballaşmaya doğru gedirik. Təəssüflə qeyd
etməliyik ki, gündəlik qayğıları, problemləri
özlərinə yük edən bəzi müəllimlər dərsi keçmək
üçün deyil, gününü başa vurmaq üçün siniflərə
girirlər. Lakin bunlarla yanaşı, tədrisi günün
tələbi səviyyəsində quran, müstəqil
respublikamıza layiq yüksək intellektli
gənclərin yetişməsi üçün əllərindən gələni
əsirgəməyən savadlı müəllimlərimiz çoxdur.
Müəllimlərin əməkhaqlarının ilbəil artırılması,
təhsil işçiləri üçün yaradılan şərait və dövlət
tərəfindən onlara göstərilən qayğı deməyə əsas
verir ki, yaxın zamanda yuxarıda qeyd etdiyimiz
neqativ hallar aradan götürüləcək və təhsilimiz
özünün yeni inkişaf mərhələsinə qədəm qoyacaqdır.
- Əhliyət müəllim, 55 illiyiniz
müstəqilliyimizin 20 illik ildönümü ilə eyni
vaxta düşüb...
- Əvvəla onu deyim ki, müstəqil Azərbaycan
Respublikası ümummilli liderimiz Heydər Əliyevin
memarı olduğu və qurub yaradaraq bizə ərməğan
etdiyi şah əsəridir. Azərbaycanımız imperiya
buxovundan azad olaraq sanki yenidən yaranıb,
təbii və milli sərvətlərimiz özümüzə qayıdıb.
Soykökümüzü, milli dəyərlərimiz olan adət və
ənənələrimizi yenidən bərpa edib inkişaf
mərhələsinə, tərəqqi yoluna çıxarmağa nail
olmuşuq. Elə buna görə də müstəqilliyimizi göz
bəbəyimiz kimi qorumalı, uğrunda hər an
canımızdan, qanımızdan keçməyə hazır olmalıyıq.
Bu, mənim üçün ikiqat sevinc və bayramdır.
- Siz Azərbaycanın dilbər guşələrindən olan
Qubadlı torpağında dünyaya göz açmısınız. Bu gün
ana yurd üçün qəribsəyirsinizmi?
Bu sualımdan sonra Əhliyət müəllimin qayğılı
sifəti tutuldu. Gözlərini məchul bir nöqtəyə
dikərək dərin xəyala daldı. Nurlu, işıqlı
çöhrəsində kədərin və qəmin qara kölgələri
göründü. Vətən həsrətindən, Vətən
nigarançılığından yaranmışdı bu hal.
- Yaralı yerimə toxundunuz. Mən o torpaqda
böyümüşəm, ana laylasını, ata nəvazişini orda
görmüşəm. At belində füsunkar gözəlliyə malik
dağları, dərələri, meşələri, çəmənləri gəzmişəm.
Ləziz meyvələrindən, min bir nemətindən dadmışam,
havasını udub, suyunu içmişəm. Heç ana yurdu
unutmaq olarmı? Axı, yeniyetməlik və gənclik
illərimin unudulmaz xatirələri muncuq kimi o
yerlərdə səpələnib və bu gün yolumu gözləyir.
Ancaq o günə çox az qalıb. Möhtərəm
Prezidentimiz, ali baş komandanımız İlham
Əliyevin apardığı məqsədyönlü daxili və xarici
siyasəti nəticəsində çox keçməyəcək ki,
torpaqlarımız düşmən tapdağından azad ediləcək
və doğma yurd-yuvamıza qayıdacaq, yeni quruculuq
işləri ilə məşğul olacağıq. Digər rayonlar kimi
Qubadlı da öz yeni inkişaf mərhələsinə qədəm
qoyacaq.
- Ən çox sevindiyiniz gün?
- Nəvələrim Turqutun və Dilarənin dünyaya göz
açdıqları gün çox sevinmişəm. Axı baba olurdum.
Demək yaşımın kamil çağına qədəm qoyuram. Çox
istədiyim övladlarım Cavid və Xəyyam isə ata
olurdular. Büruzə verməsələr də, hiss edirdim ki,
onlar da sevinirdilər. Bu isə ikiqat sevinc idi.
Axı onların sevinci mənim sevincimdir. Ancaq
ağla qara, gecə ilə gündüz qardaş olduğu kimi,
xeyir və şər də əkiz gəlib bu dünyaya. Onu
deməliyəm ki, sevinc müvəqqətidir, ani hissdir,
gəlib-gedərdir. Kədər isə insanla son mənzilinə
qədər yoldaşlıq edir. Elə buna görə də həyatın
kəşməkəşli, ağır anlarında sarsılmamalı,
mərdliklə dözüm göstərib baş çıxarmalı və qalib
gəlməliyik. Məhz bunu müasir gənclərimizə
tövsiyə edərdim.
Söhbətimiz şirin alındığından vaxtın necə
ötdüyünü hiss etməmişdim. Müsahibəmi bitirib
müsahibimin qayğılı, mehriban və səmimi
çöhrəsinə diqqət yetirdim. Fikirləşdim ki, 55
yaş nədir ki, Əhliyət müəllim hələ bundan sonra
daha müfəssəl, daha yeni nailiyyətlərə imza
atacaq. Ona uzun ömür, möhkəm cansağlığı,
tutduğu bu müqəddəs yolda sonu bitib-tükənməyən
uğurlar arzulayıb ondan ayrıldım.
Müsahibəni apardı:
Nizami MİRZƏ |
