|
 Ölkəmizin
bütün bölgələrində olduğu kimi, Masallı
rayonunda da təhsilə böyük qayğı yeni, yaraşıqlı,
müasir standartlara cavab verən məktəb
binalarının tikintisində özünü göstərir.
Masallıda son illərdə 32 təhsil ocağı üçün
yeni bina tikilib, onlarca məktəb əsaslı təmir
olunub.
Təkcə bu dərs ilində Masallının 2 ucqar kəndində
- Hüseynhacılı və Yolağacda müasir məktəb
binalarının istifadəyə verilməsi, şahmat
məktəbinin əsaslı təmirdən sonra açılışı, eləcə
də 6 kənddə yeni təhsil ocağının bünövrəsinin
qoyulması təhsilin inkişafı sahəsində həyata
keçirilən tədbirlərdəndir.
Dövlət müstəqilliyimizin iyirminci ildönümü
ərəfəsində rayonun Hüseynhacılı kəndində yeni
dərs ili başlayan gün 180 şagird yerlik məktəb
binasının istifadəyə verilməsi təhsil ocağının
pedaqoji kollektivinin, şagird və valideynlərin
sevincinə səbəb olmuşdur. Ətrafındakı
səliqə-sahmanı, asfaltlaşdırılmış həyəti ilə
diqqəti çəkən məktəb ikimərtəbəlidir.
Məktəbdə çalışan 23 müəllim və texniki işçi, 156
şagird builki yeni dərs ilini yeni məktəbdə
qarşıladı. Müasir tipli məktəb hər cür məktəb
ləvazimatı ilə təchiz olunub. Məktəbin pedaqoji
kollektivi və kənd ictimaiyyəti bu diqqət və
qaygıya görə ölkə başçısı İlham Əliyevə dərin
minnətdarlığını bildirir.
Yeni dərs ilində rayonun Yolağac kəndində 180
şagird yerlik yaraşıqlı sinif otaqları, geniş
dəhlizi, laboratoriyaları, kompüter, tibb otağı,
akt və idman zalı olan məktəbin istifadəyə
verilməsi də təhsil ocağının kollektivi, şagird
və valideynlər tərəfindən ölkə başçısına
minnətdarlıq hissi ilə qarşılanıb.
Eyni zamanda bu günlərdə Masallı rayonunda
şahmat məktəbinin yaradılmasının 25 illiyi
münasibətilə binanın əsaslı təmiri və
yenidənqurulması bu idman növünə qayğının yeni
təzahürü kimi qeyd edilməlidir.
Məktəbin birinci və ikinci mərtəbələrində yarış
zalı, məşğələ və monitor yerləşir. Otaqlar
şahmat dəstləri, stol, stul, kompüter, nümayiş
lövhələri ilə təchiz edilib. Üçüncü mərtəbədə
geniş və işıqlı yarış zalı böyük tədbirlər üçün
nəzərdə tutulub. Burada kompüter mərkəzi,
direktor və müşavirə otaqları vardır.
İnanırıq ki, Masallı şahmatçıları əvvəlki
ənənələri yaşadaraq dövlətin bu gözəl və
qiymətli hədiyyəsinə də yüksək nəticələrlə cavab
verəcəklər.
Ədalət DAŞDƏMİRLİ |
