|
 Bu
gün yeni kurikulumların orta məktəblərdə tətbiqi
sahəsində çox böyük işlər gedir. Bu, biz
müəllimləri xarici dil fənninin tədrisində
səmərəli dəyişikliklər etməyə sövq edir. Müasir
xarici dil kurikulumu bu gün gənclərin
baxışlarını dəyişən və eləcə də öz ölkəsini
bütün dünyada tanıtdıran bir şəxsiyyət kimi
formalaşdırılmasına xidmət edir. İngilis dilinin
dünyada geniş yayıldığı bir dövrdə təlim
prosesinin müasir standartların tətbiqi üzrə
uğurlu nəticələri əldə etməsi daha önəmlidir.
Bugünkü şagirdlər ingilis dilini kontekstdə
işlətməkdə, sərbəst fikir söyləməkdə və eləcə də
xarici ölkələrdə təhsil almaq məqsədilə
öyrənməkdə daha çox maraqlıdır. Yeni kurikulumda
bu tələblər nəzərə alınmışdır. Belə ki, o,
şagirdlərə təkcə dilin elmi şəkildə
qavranılmasını yox, eləcə də sivil davranışlara,
müxtəlif mədəniyyətlərə dair və real həyat
şəraitində bilik və bacarıqlar əldə olunmasına
kömək edir.Yeni məzmun xətləri və xarici dil
standartları dilin diskurs və ya autentik
formada müasir davranışlar, mədəniyyətlər və
dəyərlər qazanılmasına xidmət edir.
İngilis dili müəllimi kimi çalışdığım Bakıdakı
193 nömrəli məktəb xarici dil kurikulumunun
tətbiqi sahəsində bir çox uğurlar qazanmışdır.
Elə buna görə də məktəbimizin iki xarici dil
müəllimi "Ən yaxşı müəllim" müsabiqəsində qalib
gəlmiş, eləcə də məktəbimiz bu il "Ən yaxşı
ümumtəhsil müəssisəsi" müsabiqəsində yer
tutmuşdur. Məktəbimizdə kurikulumların tətbiqi
və əldə edilən uğurlu nəticələr barədə bir neçə
müzakirə və rayon səviyyəsində seminarlar
keçirilmişdir. Müasir dərslərin texniki
vasitələrlə nümayişi məktəbdə qarşıya qoyulan
məqsədlərdən biridir. Elə buna görə də Təhsil
Nazirliyi və İnteraktiv Təlim Texnologiyası
"Smart Tecnologies" xətti üzrə məktəbimizdə
MİMİO kursu təşkil edilmiş və çoxlu müəllim
burada iştirak edərək dərslərin müasir
texnologiya ilə aparılması yollarına
yiyələnmişdir.
Yeni kurikulumlarla xarici dil dərsləri müasir
avadanlıqlar və yeni metodlar əsasında keçilir,
təlim prosesində şagirdlərimiz müxtəlif mövzular
ətrafında geniş informasiyalar, seçimlər əldə
edir və zəngin dil bacarıqlarına yiyələnirlər.
Artıq şagirdlərimiz xarici dili kitablardan çox
bir-biri ilə işgüzar ünsiyyət yaradaraq, nitq
modellərindən istifadə edərək öyrənir, istənilən
situasiyada dialoq qura bilirlər.
Şagirdlərimiz mətnləri oxuyub-əzbərləyib
danışmaq əvəzinə, onların diskləri vasitəsi ilə
və ya şagirdlərin özləri tərəfindən ucadan
oxunub dinlənilməsinə nail olur, onlar üzərində
kiçik və ya geniş təhlillərin aparılması, yeni
sözlərin seçilməsi, sinonim, antonim və
omonimlərin tapılması, mətnlərin şəkillər üzrə
oxunması, mətnə aid səhv və düzgün fikirlərin
müəyyən edilməsi, mətnlərin şərhi və rollarla
ifa olunması kimi müasir üsullar və səmərəli
yollarla dili öyrənirlər. Kommunikativ yanaşma
üçün ən səmərəli mənbələr real həyatla bağlı
olan obyektlər, autentik materiallar, müasir
texniki vasitələr və İnternet resurslarıdır.
Sosial şəbəkədə ünsiyyət, İnternet vasitəsilə
fikir mübadiləsi, xarici nümayəndələrlə canlı
dialoq, hər hansı bir mövzu və ya şəkil üzərində
situasiya xarici dilin müasir yollarla
mənimsənilməsinə xidmət edir.
Şagirdlərimiz qazandıqları bilikləri nəzəri
ideyalarla yox, praktiki fəaliyyətlər,
təqdimatlar və rollu oyunlarla çatdırırlar.Yeni
texnologiya elə biliyin praktikada tətbiqi
deməkdir. Bu gün şagirdlərdən məntiq, idrak,
yaradıcı fəaliyyət, sərbəst düşüncə, mühakimə
yürütmək, müşahidə aparmaq, başqalarının fikrinə
qarşı öz rəyini bildrmək, qərar qəbul etmək və
cəmiyyətin həyatında yaxından iştirak etmək kimi
bacarıqlar tələb olunur. Xarici dil fənni də öz
məzmun xətləri ilə bu məqsədlərin həyata
keçməsinə xidmət edir.
Bugünkü xarici dil müəllimi dünya pedaqoji
texnologiyasında sınaqdan çıxmış metodlar
sistemindən istifadə etməli, bu metodlar
sisteminin milli dəyərlərə əsaslanan orijinal
modelini yaratmağa çalışmalıdır.
Xədicə BAĞIROVA,
Bakıdakı M.Şəhriyar adına 193 nömrəli orta
məktəbin ingilis dili müəllimi |
|
