|
 Kiçikyaşlı
uşaqların sevimli jurnalı olan "Göyərçin"in bu
günlərdə işıq üzü görmüş 9 və 10-cu nömrələri öz
nəfis tərtibatı və dərc olunmuş yazılarının
mövzusu və janr rəngarəngliyi ilə seçilir.
Jurnalın 9-cu nömrəsi "Dünyaya sülh gərəkdir"
şeiri ilə açılır. Sonrakı al-əlvan səhifələrdə
poeziya nümunəsi kimi verilmiş Ə.Quluzadənin,
R.Möhsümün və Q.İsabəylinin uşaq təfəkkürünü
canlandıran, vətən, ana, baba, təbiət haqqında
səmimi, ülvi və dəyərli duyğuları əks etdirən
şeirləri ideya-məzmun tutumu ilə maraqlıdır.
Dərginin bu nömrəsində İradə Aytelin "Eynəkli
günəş", Rafiq Yusifoğlunun "Rəngli aylar", Günel
Almazın "Payız", "Qorxaq kölgə", "Yuva", "Yağış"
adlı dərc edilmiş kiçik hekayələri, müxtəlif
ölkələrin nağıllarından tərcümələr balaca
oxucuları düşündürən mövzuları əhatə edir.
Jurnalın 10-cu nömrəsinin ikinci səhifəsi isə
R.Yusifoğlunun dövlət müstəqilliyi gününə həsr
olunmuş "Gözün aydın, Azərbaycan" şeiri ilə
başlayır.
Bu nömrədə də bir-birindən maraqlı şeirlər,
hekayələr, nağıllarla yanaşı, uşaq rəsmlərindən
nümunələr, şəkillər, balacaları təbriklər
nömrənin məzmununa xüsusi bir əlvanlıq gətirir.
 "Göyərçin"in
hər iki nömrəsində verilmiş yazılar, şəkillər
fidan balalarımızın saf dünyasını, şirin dilini,
onların sadə göründüyü qədər qeyri-adi
düşüncəsini formalaşdırmağa, zənginləşdirməyə
xidmət edir. Elə buna görə də jurnalın bu
nömrələri də, sübhəsiz, ömrümüzün bir parçası
olan uşaqlar tərəfindən sonsuz sevinc və maraqla
qarşılanacaq.
ƏDALƏT |
|
