|
 Oktyabrın
15-də "Hyatt Regency" otelində Bakı Şəhəri üzrə
Təhsil İdarəsinin təşkilatçılığı ilə "Müstəqilliyimiz
əbədidir" adlı müsabiqənin yekunlarına həsr
edilən konfrans keçirilib.
Konfransda müstəqil dövlətimizin keçdiyi 20
illik tarixi yola nəzər salaraq çıxış edən Bakı
Şəhəri üzrə Təhsil İdarəsinin müdiri Nailə
Rzaquliyeva bildirib ki, azad və müstəqil
yaşamaq, öz hüququnu müstəqil şəkildə həyata
keçirmək hər bir xalqın hər bir zaman ən böyük
milli sərvəti hesab olunub. Tarix dəfələrlə
sübut edib ki, müstəqilliyi qoruyub saxlamaq,
onu qazanmaqdan qat-qat çətindir, çünki ilk dəfə
ötən əsrin əvvəllərində müstəqilliyi az bir
müddətdə əldə etmiş olsaq da, onu saxlamaq
mümkün olmadı. İkinci dəfə qazanılan
müstəqilliyin qorunub saxlanılmasında müstəsna
xidməti olan yeganə insan ulu öndərimiz Heydər
Əliyev oldu. Əgər 1993-cü ildə Heydər Əliyevi
Azərbaycan xalqı təkidlə dəvət etməsəydi,
müstəqilliyimizi itirmiş olardıq. Bu hadisələr
hər il qeyd olunmaqla, gələcək nəsillərə
çatdırılmalıdır. Bu gün bu siyasət möhtərəm
Prezidentimiz İlham Əliyev tərəfindən uğurla
davam etdirilir və Prezidentimizin qeyd etdiyi
kimi, biz ümumi dəyərlərdən çıxış edərək irəliyə
doğru addımlar atırıq. Ümumi dəyərlərimiz
demokratiya, insan hüquqları və qanunun
aliliyinin hökm sürdüyü şəraitdə inkişaf edir.
Bu sahədə Heydər Əliyev Fondunun prezidenti,
YUNESKO-nun və İSESKO-nun xoşməramlı səfiri,
millət vəkili Mehriban xanım Əliyevanın
böyük xidmətləri olduğu danılmazdı. Ən əsası
odur ki, müstəqil dövlətimizin sükanı
etibarlı əllərdədir.
Daha sonra sözünə davam edən N.Rzaquliyeva qeyd
etdi ki, ulu öndərin siyasətini uğurla həyata
keçirən, Azərbaycanı regionun ən qüdrətli
dövlətinə çevirən Prezidentimiz cənab İlham
Əliyevin fəaliyyəti bizdə olan inamın
möhkəmlənməsinə səbəb olmuşdur. Bir vətəndaş
olaraq, bizim və gənc nəslin əsas vəzifəsi bu
inamı qoruyub saxlamaq və nəsildən-nəsilə
ötürməkdir. Elə bu məqsədlə də təhsil idarəsi
fəaliyyət proqramına uyğun olaraq şəhərin
ümumtəhsil məktəblərində sentyabr, oktyabr
ayları ərzində minlərlə şagirdin qatıldığı "Müstəqilliyimiz
əbədidir" adlı müsabiqə keçirib. Əvvəlcə məktəb
mərhələsində keçirilən işlər, şəhər mərhələsində
təsdiq olundu. Məramı və məqsədi gənc nəslə
müstəqillik tariximizin şanlı səhifələrini bir
daha xatırlatmaq, xalqımızın bu yolda apardığı
mübarizənin əhəmiyyətini aşılamaq, istedadlı
şagirdlərin yaradıcılıq qabiliyyətini üzə
çıxarmaq və inkişaf etdirmək olan müsabiqə
uğurla başa çatdı.
Müsabiqədə qalib gəlmiş gəncləri təbrik edən
N.Rzaquliyeva dedi ki, qoy bu müsabiqə təkcə
yaradıcılıq yarışı yox, həm də Vətənə məhəbbət
simvolu kimi gənclərimizin yaddaşında yaşasın.
Ulu öndərimiz Heydər Əliyevin şah əsəri olan
müstəqil Azərbaycanımızın sabahı naminə onlara
uğurlar diləyirəm.
Sonra Azərbaycanın dövlət müstəqilliyinin
bərpasının 20-ci ildönümü ilə əlaqədar təşkil
edilən inşa yazı və bədii qiraət nominasiyaları
üzrə keçirilmiş müsabiqənin qaliblərinin
mükafatlandırılması mərasimi oldu.
İştirakçı şagirdlər arasından bədii qiraət
nominasiyası üzrə 12, inşa yazı nominasiyası
üzrə isə 11 nəfər qalib olub. Qaliblər həmin gün
keçirilən konfransda fəxri fərman və birdəfəlik
pul mükafatları ilə təltif edildilər. Şəhər
turuna vəsiqə alan iştirakçılara isə
sertifikatlar təqdim edildi. Müsabiqə
qaliblərini Azərbaycan Respublikası Təhsil
İşçiləri Azad Həmkarlar İttifaqı Respublika
Komitəsi sədrinin müavini Mirzə Cəfərzadə,
Azərbaycan Dövlət Mədəniyyət və İncəsənət
Universitetinin dosenti, Azərbaycan
Respublikasının əməkdar artisti Ağalar Bayramov,
Azərbaycan Respublikasının Ailə, Qadın, Uşaq
Problemləri üzrə Dövlət Komitəsi sədrinin
müavini Aynur Sofiyeva, Bakı Pedaqoji Kadrların
İxtisasartırma və Yenidənhazırlanma İnstitutunun
rektoru, professor Asəf Zamanov, "Müstəqilliyimiz
əbədidir" müsabiqəsinin qalibi olan şagirdlər və
şair Əjdər Ol səmimi-qəlbdən təbrik etdilər,
müstəqil Azərbaycanımıza olan sevgilərini daha
yüksək müstəvidə nümayiş etdirmək yolunda onlara
uğurlar dilədilər.
Tədbirin sonunda ulu öndər Heydər Əliyevin həyat
və fəaliyyətinin müxtəlif anlarını əks etdirən
film nümayiş etdirildi.
ƏDALƏT |
|
