|
 Oktyabrın
17-də Bakıdakı 308 nömrəli məktəbdə
müstəqilliyimizin 20 illik yubileyi münasibətilə
tədbir keçirildi. Tədbirdə məktəbin müəllim-şagird
kollektivi və digər şəxslər iştirak edirdilər.
Məktəbin tarix müəllimləri Günel İbrahimova,
Simuzər Qasımova və Xalidə Məmmədovanın
təşkilatçılığı ilə keçirilən tədbir Azərbaycan
Respublikasının Dövlət himninin sədaları altında
Dövlət bayrağının zala daxil olması ilə başladı.
Sonra iştirakçılar respublikamızın müstəqillik
dövründə əldə etdiyi nailiyyətlər, imzalanmış
müqavilələr, həyata keçirilən islahatlar və ulu
öndər Heydər Əliyevin quruculuq işləri haqqında
hazırlanan videoçarxı izlədilər.
Tədbiri giriş sözü ilə açan məktəbin direktoru
Təranə Məmmədova iştirakçıları salamlayaraq
müstəqilliyin əvəzolunmaz nemət olduğunu qeyd
etdi. Qazanılan müstəqilliyin şanlı
tarixçəsinə nəzər yetirən T.Məmmədova müasir
Azərbaycanın memarı olan ümummilli lider Heydər
Əliyevin xalqımız qarşısındakı əvəzolunmaz
xidmətlərindən danışdı. Azərbaycanın müstəqil
dövlət kimi möhkəmlənməsində, dünyada
tanıdılmasında Heydər Əliyevin misilsiz
xidmətlərinin olduğu və bu xidmətlərin həmişə
xalqımız tərəfindən anılacağı qeyd edildi. Böyük
siyasi xadimin keçdiyi həyat yolu, bu yolda
qarşılaşdığı maneələr, dövlətçiliyin
qorunmasında göstərdiyi xidmətlər barədə ətraflı
məlumat verildi. T.Məmmədova dahi şəxsiyyətin
layiqli davamçısı ölkə Prezidenti cənab İlham
Əliyevin təhsilə göstərdiyi diqqət və qayğıdan
danışaraq təhsilimizin günü-gündən sürətlə
inkişaf etdiyini nəzərə çatdırdı.
Müstəqilliyimizin 20-ci ildönümü münasibətilə
keçirilən "Müstəqilliyimiz əbədidir", "Vətən
mübariz əsgər çağırır" inşa yazı müsabiqələrində
yer tutan məktəbin XI sinif şagirdləri Həmayə
Orucova və Xəyalə İsmayılovanı təbrik edən
direktor belə tədbirlərin keçirilməsinin
vacibliyini qeyd etdi.
IX sinif şagirdlərinin ifasında səslənən "Vətən
anadır", Dövlət bayrağı haqqında şeir və "Yallı"
rəqsi iştirakçılara xoş təsir bağışladı.
Niyazi RƏHİMOV |
