|
Bakıdakı 283 nömrəli məktəbin müəllim və şagird
kollektivi müstəqilliyimizin bərpasının 20-ci
ildönümünü oktyabrın 17-də "Müstəqilliyimiz ən
böyük sərvətimizdir" mövzusunda keçirdikləri
ədəbi-musiqili tədbirlə qeyd etdilər. Tədbirdə
Binəqədi Rayon İcra Hakimiyyətindən, YAP rayon
təşkilatından, Bakı Şəhəri üzrə Təhsil
İdarəsindən qonaqlar da iştirak edirdilər.
Məktəbli aparıcılar tədbiri azad Azərbaycanımızı
tərənnüm edən şeirlərlə açdılar. Sonra
şagirdlərdən ibarət xor Dövlət himnimizi ifa
etdi. Himn başa çatan kimi zala dahi Üzeyirin "Üvertüra"sının
möhtəşəm musiqisi yayıldı. Bir qrup şagird həmin
musiqinin sədaları altında "Azərbaycanı sevin"
şeirini söylədi. Ölməz şairlərimiz Məmməd Arazın,
Məhəmmədhüseyn Şəhriyarın doğma vətənə sevgi,
məhəbbətlə dolu "Azərbaycan" şeirlərini də
şagirdlər məharətlə ifa etdilər.
Aparıcılar müstəqilliyimizə gedən yol,
Azərbaycanın 1918-ci ildə müstəqillik qazanması,
1991-ci ildə onu bərpa etməsi, müstəqillik
illərində dövlətimizin möhkəmləndirilməsi,
ölkədə sabitliyin bərpası, milli iqtisadiyyatın,
təhsilin, səhiyyənin, mədəniyyətin yaradılması
və inkişaf etdirilməsi istiqamətində atılan
addımlar, müasir dövrdə müstəqil dövlətimizin
yaradıcısı, ulu öndər Heydər Əliyevin xalqımız
qarşısındakı tarixi xidmətləri, onun layiqli
varisi, Azərbaycan Respublikasının Prezidenti
İlham Əliyevin ölkəmizi tərəqqiyə aparan
siyasəti barədə faktlara əsaslanan geniş məlumat
verdilər.
Sonra tədbir istedadlı şagirdlərin təqdim
etdikləri musiqi nömrələri ilə davam etdi.
Tədbirin sonunda çıxış edən məktəbin direktoru
Şükufə Axundova zala toplaşanları
müstəqilliyimizin bərpasının 20-ci ildönümü
münasibəti ilə təbrik etdi, dövlətimizin,
Azərbaycan Prezidenti İlham Əliyevin təhsilimizə,
təhsil işçilərinə diqqət və qayğısından, öz
potensiallarını inkişaf etdirmək üçün gənclərə
yaradılan şəraitdən söz açdı.
YAP Binəqədi Rayon Təşkilatı Qadınlar Şurasının
sədri Məlahət İbrahimova, Binəqədi RİH təhsil,
səhiyyə və mədəniyyət şöbəsinin böyük
məsləhətçisi Dilbər Mirzəməmmədova və b.
tədbirdə söz alıb məktəbin müəllim və şagird
kollektivini təbrik etdilər, müstəqilliyimizin
bəhrələrindən danışdılar.
Yusif ƏLİYEV |
