|
Oktyabrın 19-da Azərbaycan Müəllimlər
İnstitutunda xalq yazıçısı Mirzə İbrahimovun 100
illik yubileyinə həsr olunmuş böyük konfrans
keçirildi.
Konfransı giriş sözü ilə institutun rektoru,
millət vəkili, professor A.Naxçıvanlı açaraq
bildirdi ki, görkəmli dövlət xadimi və
ədəbiyyatşünas Mirzə İbrahimov ictimai, bədii,
elmi fəaliyyətinin gənc nəslə tanıdılması,
əsərlərinin sevdirilməsi günün vacib
məsələlərindən biridir.
Professor A.Naxçıvanlı Mirzə İbrahimovun
yaradıcılığından, onun əsərlərinin bədii
siqlətindən, günümüzün reallığına cavab
verməsindən də danışdı.
Konfransdakı çıxışlarda M.İbrahimov alim,
yazıçı-dramaturq, ictimai xadim kimi
qiymətləndirildi. Professor Fikrət Xalıqov
"Mirzə İbrahimovun ədəbi dili haqqında"
çıxışında yazıçı və onun bədii əsərlərinin
dili, yazıçının üslubu və s. dil məsələlərindən
dilçilik nöqteyi - nəzərindən danışdı.
Dosent Vaqif Qurbanov yazıçının elmi
fəaliyyətindən və natiqlik qüdrətindən söz açdı.
Professor tənqidçi Təyyar Salamoğlu "Mirzə
İbrahimovun "Böyük dayaq" romanında insana
humanist münasibət və milli xarakterin bədii
təcəssümü kontekstlərində" adlı çıxışında
sənətkarın bu əsərini təhlil etdi.
İnstitutun tələbələri İlkin Əsgərov, Türkan
Abdullayeva, Gülay Heydərova və Nərmin Rüstəmova
Mirzə İbrahimovun yaradıcılığından, dilimizin
qorunmasındakı rolundan danışdılar. |
