|
Oktyabrın 15-də Bakıdakı 261 nömrəli məktəb-liseydə
müstəqilliyimizin bərpasının 20 illiyinə həsr
olunmuş tədbirlərin, müsabiqələrin yekunu olaraq
elmi-praktik konfrans keçirildi.
Tədbir Dövlət himnimizin ifası ilə açıldı. Sonra
məktəb-liseyin direktoru Abuzər Əsədov "Müstəqilliyimizin
bərpasının 20 illiyi" mövzusunda geniş məruzə
etdi. A.Əsədov müstəqilliyimizin bərpası uğrunda
gedən mübarizədən, 1991-ci il oktyabrın 18-də
parlamentdə qəbul olunmuş müstəqilliyimizi
təsbit edən Konstitusiya aktından,
müstəqilliyimizin ilk illərində ölkədə yaranmış
ağır vəziyyətdən, ulu öndər Heydər Əliyevin
xalqın təkidi ilə Azərbaycanda ikinci dəfə
hakimiyyətə gəlməsi və sabitliyi təmin etmək,
müstəqilliyimizi möhkəmləndirmək üçün atdığı
addımlardan geniş bəhs etdi.
Məruzədə ölkəmizdə son illər dövlət quruculuğu,
iqtisadiyyatın möhkəmləndirilməsi, cəmiyyət
həyatının bütün sahələrində aparılan islahat
yönümlü işlər və qazanılan nailiyyətlər də
ətraflı təhlil olundu. Bütün bu uğurların
qazanılmasında Azərbaycan Respublikasının
Prezidenti İlham Əliyevin xüsusi xidmətləri
olduğu vurğulandı. A.Əsədov məruzəsində habelə
bayram münasibəti ilə məktəb-liseydə "Müstəqillik
- 20" devizi altında divar qəzetləri, şeir, rəsm
müsabiqələrinin keçirildiyini, onların
şagirdlərin vətənpərvərlik tərbiyəsində,
müstəqillik tariximiz haqqında daha geniş
təsəvvür əldə etmələrində mühüm rol oynadığını
qeyd etdi.
Konfransda məktəb-liseyin gənclərin
çağırışaqədərki hazırlığı rəhbəri Muxtar
Həşimovun "İlham Əliyev və Azərbaycanda milli
ordu quruculuğu", şagirdlər arasında keçirilmiş
"20 referat" müsabiqəsində referatlardan birinin
müəllifi, IX sinif şagirdi Elnarə Baloğlanovanın
"20 ildə Azərbaycanın neft strategiyası"
mövzularında məruzələri də maraqla dinlənildi.
Sonra konfrans məktəb-liseyin istedadlı
şagirdlərinin təqdim etdikləri bədii proqramla
davam etdi. Bədii hissədə 10-cu sinif şagirdi
E.Tağıyevin hazırladığı təqdimat izləndi,
şagirdlər şeirlər söylədilər, mahnılar oxudular,
səhnəciklər nümayiş etdirdilər.
Yusif ƏLİYEV |
