|
Noyabrın 14-də Azərbaycan Dövlət Pedaqoji
Universitetinin pedaqogika kafedrasında Təhsilin
İnkişafı üzrə Beynəlxalq Assosiasiyanın
(International Association of Development
Education) prezidenti, pedaqoji elmlər doktoru
Larisa Şeyko ilə görüş keçirildi. Azərbaycanın
son illərdə əldə etdiyi uğurlar barədə qonağa
məlumat verildi. Ölkəmizin müstəqillik
qazandıqdan sonra sürətli inkişaf yolu keçdiyi
qeyd edilərək bildirildi ki, Azərbaycan artıq
təkcə neft ölkəsi kimi deyil, həm də elm və
təhsil ölkəsi kimi tanınır və bu sahədə ciddi
uğurlar qazanıb. Azərbaycanın təhsil sistemi
uğurlu inkişaf dönəmini yaşayır. İstedadlı
Azərbaycan gənclərinin Rusiyanın ən məşhur ali
məktəblərində təhsil aldıqları, dərin elmi
biliklərə yiyələndikləri bildirilərək onların
sorağının artıq Amerika, Fransa, Böyük
Britaniya kimi ölkələrdən gəldiyi qonağın
diqqətinə çatdırıldı. Eyni zamanda Türkiyə və
digər ölkələrdən olan tələbələrin Azərbaycanda
təhsil aldıqları da qeyd olundu. Görüşdə
Təhsilin İnkişafı üzrə Beynəlxalq Assosiasiya
ilə əməkdaşlığın, elmi əlaqələrin qurulmasının
əhəmiyyətli olacağı vurğulandı.
Qonağa Azərbaycan pedaqoji elminin inkişaf
tarixi, ilk milli maarifçilərimiz barədə
məlumat verilib, bu sahədə ADPU-nun
fəaliyyətindən danışılıb.
Təhsilin İnkişafı üzrə Beynəlxalq Assosiasiyanın
prezidenti təşkilatın fəaliyyətindən danışaraq
hazırda bu qurumda Avropanın 25-dən artıq
ölkəsinin təmsil olunduğunu bildirdi. Qurumun
həm postsovet məkanı, həm də Avropa ölkələrinin
milli təhsil sistemləri ilə əməkdaşlıq etdiyini
söyləyib. Onun sözlərinə görə, assosiasiya bir
sıra ölkələrin tələbələri üçün seminarlar, elmi-praktik
konfranslar, təcrübə mübadiləsi təşkil edir.
Qurum eyni zamanda müəllimlərin yenidən
hazırlanması və ixtisasının artırılması
proqramlarını həyata keçirir. Təmsil etdiyi
təşkilatın öz fəaliyyətində müəllimlərin
təkmilləşməsi məsələsinə xüsusi diqqət
ayırdığını deyən və bunun bütün ölkələrin təhsil
sistemləri üçün vacib olduğunu vurğulayan qonaq
assosiasiyanın lBilik dünyası» adlı jurnal
buraxdığını və bu jurnalda istər Avropa, istərsə
də postsovet ölkələrinin pedaqogika sahəsində
çalışan alimlərinin elmi məqalələrinin dərc
olunduğunu bildirib. Qonaq rəhbərlik etdiyi
təşkilatın əsas fəaliyyət istiqamətlərindən biri
kimi məktəblilər və tələbələr üçün müxtəlif fənn
olimpiadalarının keçirilməsi təcrübəsindən
danışıb və növbəti belə bir tədbirin yaxın
vaxtlarda İsveçrədə təşkil olunacağını deyib.
Oruc MUSTAFAYEV |
|
