|
 Gəncə
Dövlət Universiteti ilə Azərbaycan Müəllimlər
İnstitutunun Zaqatala filialı arasında elmi-metodik
əməkdaşlıq əlaqələri ildən-ilə
genişlənməkdədir.Universitetin qabaqcıl alimləri
vaxtaşırı filialda olur, təcrübə mübadilələri
keçirir, professor-müəllim heyətinin dərslərində
iştirak edir, təhsilin aktual problemləri barədə
mühazirələr oxuyur, eləcə də pedaqoji və tədris-köməkçi
heyətin üzvlərinə dəyərli məsləhətlər verirlər.
Noyabrın 22-də GDU-nun bir qrup alimi AMİ-nin
Zaqatala filialının tədris, maddi- texniki
bazası ilə tanış olmuş, iki gün davam edən
qarşılıqlı təcrübə mübadiləsi zamanı "açıq
dərs"ləri dinləmiş, metodik tövsiyə və fənn
proqramlarının hazırlanmasında yerli alimlərə və
gənc müəllimlərə lazımi köməklik göstərmişdir.
Sonra görüşün yekunlarına həsr olunmuş elmi-metodik
konfrans keçirilmişdir. Professor-müəllim və
tələbə heyətinin iştirakı ilə baş tutan tədbiri
giriş sözü ilə tədris və elmi işlər üzrə filial
direktorunun müavini, fəlsəfə doktoru Füzuli
Səddinov açaraq bu əməkdaşlığın tarixinin artıq
5 ili adladığını bildirərək, elmi-əməli dəstəyə
və dəyərli köməyə görə GDU-nun rektoru,
professor Elman Məmmədova kollektivin dərin
təşəkkürünü çatdırmağı xahiş etmişdir.
Tədbirdə Gəncə Dövlət Universitetinin
dosentləri, filologiya üzrə fəlsəfə doktorları,
əməkdar müəllim Allahverdi Həmidov, Azərbaycan
Yazıçılar Birliyinin üzvü Sahib İbrahimli,
folklorşünas Maqbet Əhmədov " Xarici dil
dərslərinin proqram təminatı və müəllimlərin
elmi-metodik yaradıcılığının inkişaf etdirilməsi",
"Ədəbiyyat dərslərində problemli situasiya
yaradılması və cütlüklərlə iş", "Heydər Əliyev
və Azərbaycan ədəbiyyatı" mövzularında
məruzələrlə çıxışlar etmişlər. Pedaqogika üzrə
fəlsəfə doktoru, dosent Yəhya Əliyev "Yaş və
sosial pedaqogika" fənni üzrə filial əməkdaşları
ilə birgə metodik vəsait hazırlanması təklifini
vermiş, universitetin elmi katibi, dosent Teymur
İsmayılov isə buraxılış kurs tələbələrinin
diplomdansonrakı təhsilinin təşkilində təmsil
etdiyi ali məktəb tərəfindən hər cür köməyə
hazır olduqlarını bildirmişdir. Təkliflər
iştirakçılar tərəfindən maraqla qarşılanmışdır.
Konfransa dəvət olunmuş Gəncə şəhər təhsil
veteranı, məktəbşünas-pedaqoq Bahadur Abdullayev
filialda fəaliyyət göstərən ixtisasartırma
kurslarında apardığı mühazirələrin onda xoş
təəssürat oyatdığını bildirmiş, bu sahədə bir
sıra tövsiyələrini vermişdir.
Filial əməkdaşları adından pedaqoji fakültənin
dekanı, GDU-nun dissertantı Xəzəngül Babayeva,
kafedra müdiri, fəlsəfə doktoru Qüdrət Qırtımov,
qocaman müəllim, fəlsəfə doktoru Qurban Orucov,
baş müəllim Sabir Qurbanov və II kurs tələbəsi
Fərid Əzimov çıxış edərək belə görüşlərin tez-tez
keçirilməsini arzulamış və qonaqlara dərin
minnətdarlıq ifadə etmişlər.
Sonda qonaqlar özlərinin və GDU-nun digər
alimlərinin müəlliflikləri ilə nəşr olunmuş
dərslik və metodik vəsaitlərini kitabxanaya
təhvil vermiş, pedaqoji kollektivlə birgə
şəkillər çəkdirmişlər.
Ülkər BAYRAMOVA,
AMİ-nin Zaqatala filialının tədris-tələbə
şöbəsinin böyük mütəxəssisi |
|
