|
Azərbaycan Universiteti və "Hədəf" Elm, Təhsil
və Tədris Mərkəzinin birgə təşkilatçılığı ilə
Dünya Azərbaycanlılarının Həmrəylik Gününə həsr
olunmuş 2-ci "Fənlərin Dostluğu Olimpiadası"
keçiriləcək. Layihənin əsas məqsədi fənlərarası
əlaqəni möhkəmləndirmək, fənlərin bir-biri ilə
bağlılığını məktəblilərə aşılamaq və bu
inteqrasiyanın köməyindən istifadə edərək xüsusi
istedada malik olan şagirdləri müəyyənləşdirib
gələcək fəaliyyətlərində stimul yaratmaqdır.
Gələcəkdə bütün respublika məktəblilərini və
xaricdə yaşayan azərbaycanlı gəncləri də öz
ətrafında birləşdirməyi hədəf alan "Fənlərin
Dostluğu Olimpiadası"nın builki buraxılışı Bakı,
Sumqayıt və Xırdalan şəhərlərində fəaliyyət
göstərən ümumtəhsil məktəblərinin 9-10-cu sinif
şagirdləri arasında keçiriləcək. Təqribən 300-ə
qədər məktəbin qoşulacağı layihə iki mərhələdə
baş tutacaq. Birinci mərhələdə təqribən 3 min
şagird, ikinci mərhələdə isə 100 şagird öz
biliyini sınayacaq. İştirakçılara Azərbaycan
dilində test şəklində suallar təqdim olunacaq.
Olimpiadanın birinci mərhələsi dekabrın 18-də
Bakı, Sumqayıt və Xırdalan şəhərlərində
keçiriləcək. Bu mərhələdə 2 saat müddətində
şagirdlərə 50 sual təqdim olunacaq. İlk 100
yerin sahibi II turda iştirak etmək hüququ əldə
edəcək.
İkinci mərhələ isə dekabrın 25-də Azərbaycan
Universitetinin əsas korpusunda baş tutacaq. Bu
turda 1 saat müddətində şagirdlərə 30 sual
təqdim olunacaq.
Dünya Azərbaycanlılarının Həmrəylik Günü
münasibəti ilə keçirilən 2-ci "Fənlərin Dostluğu
Olimpiadası"nın bağlanış və qaliblərin
mükafatlandırılması mərasimi dekabrın 27-də
Rəşid Behbudov adına Mahnı Teatrında təşkil
olunacaq. Olimpiadada ilk 10 yeri tutmuş
şagirdlər diplom və qiymətli hədiyyələrlə
mükafatlandırılacaq.
Niyazi RƏHİMOV |
