|
Bakı Şəhəri üzrə Təhsil İdarəsinin qərarına
əsasən dekabr ayı Bakı məktəblərində "Riyaziyyat
aylığı" kimi qeyd olunur. Təhsil müəssisələrində
bu qəbildən olan maraqlı tədbirlərdən biri də
183 nömrəli orta məktəbdə keçirilib. Məktəb
Mərdəkan qəsəbəsindəki başqa bir təhsil
müəssisəsi - 123 nömrəli orta məktəblə dostluq
körpüsü yaradaraq İKT-dən istifadə imkanlarını
sərgiləyib. Ümumi tanışlıqdan sonra telekörpü
183 nömrəli orta məktəbin veb saytının təqdimatı
ilə davam edib. Məktəbin XI a sinif şagirdləri
Fərid Hətəmli "Texnologiyanın yüksək inkişafının
zərərli tərəfləri", Mirzəağa Səlimov "İKT-dən
riyaziyyat dərslərində istifadə" mövzusunda
təqdimatla çıxış ediblər. 123 nömrəli orta
məktəbin şagirdləri Məhəmməd Əsgərov, Ruqiyyə
Əlizadə, Aysel Ağamirova və Xəyalə Məmmədovanın
çıxışları dinlənildikdən sonra İKT-nin tətbiqi
ilə bağlı Dövlət Proqramları barədə məlumat
verilib.
Şagirdlər telekörpünü krossvord həlli, dünya
şöhrətli riyaziyyatçılar Lütfi Zadə və Stiven
haqqında məlumatlarla davam etdiriblər. Yüksək
səviyyədə təşkil edilən telekörpüdə çıxış edən
183 nömrəli orta məktəbin direktoru Rəhilə
Abbasova müəssisədə hər ayın bir fənnə həsr
edilməsi təcrübəsinin yayıldığını bildirib:
"Noyabr ayı məktəb daxilində "riyaziyyat ayı"
elan edilmişdi. BŞTİ-nin dekabrın "Riyaziyyat
ayı" elan edilməsi ilə bağlı qərarı bu fənnin
tədrisinin daha da təkmilləşdirilməsi işinə
müsbət təsirini göstərdi". Bu il Təhsil
Nazirliyi tərəfindən əsaslı təmir edilən
məktəbin məhz telekörpü keçirmək istəyini isə
direktor belə açıqlayıb: "Körpü salmaq xeyirxah
işdir. Araz çayı üzərində Azərbaycanı
bir-birindən ayıran bir körpü var, amma bizim
saldığımız körpü ayrılıq körpüsü deyil, bu körpü
bizi birləşdirir". İşğal olunmuş Azərbaycan
torpaqlarındakı məktəblərlə telekörpü yaratmaq
arzusunu dilə gətirən R.Abbasova məktəbin
uğurları barədə də məlumat verib. Onun sözlərinə
görə, əgər 3 il əvvəl ali məktəblərə qəbul faizi
28 idisə, hazırda bu rəqəm 46-ya çatdırılb.
123 nömrəli orta məktəbin direktor müavini
Gülnarə Əzimova layihə iştirakçısı kimi məhz
təmsil etdiyi müəssisəni seçdiklərinə görə
təşəkkürünü bildirib.
183 nömrəli orta məktəbdə "Riyaziyyat aylığı"
çərçivəsində həmçinin fizika gecəsi keçirilib.
Fənlərarası inteqrasiyaya yer ayrılan gecədə
şagirdlərin əyləncəli çıxışları alqışlarla
qarşılanıb. Tədbirdə çıxış edən Xəzər rayonu
üzrə işçi qrupunun üzvləri, məktəb direktorları
telekörpü layihəsinin uğurlu icrasına görə
müəssisənin rəhbərliyinə, tədbirin
təşkilatçıları Elminur Hacıyeva, Səadət Qasımova
və Təranə Süleymanovaya təşəkkürlərini
bildirərək bu təcrübənin yayılmasının
vacibliyini vurğulayıblar.
Qeyd edək ki, tədbir çərçivəsində VIII a
sinfində Həyatxanım Babayevanın "İxtiyari
qabarıq çoxbucaqlının sahəsinin tapılması"
mövzusunda "açıq dərs"i də dinlənilib. |
