|
 Dekabrın
21-də "Riyaziyyat aylığı" çərçivəsində Bakı
şəhəri Sabunçu rayonu Eynulla Ağayev adına 198
nömrəli tam orta məktəbdə də tədbir keçirildi.
Məktəbdə keçirilən "Əyləncəli riyaziyyat
gecəsi"ndə tanınmış riyaziyyatçılar Malik Aranlı,
Yusif Qasımov, Sabir Rüstəmov, Bakı Şəhəri üzrə
Təhsil İdarəsinin məsləhətçisi Elmira xanım,
İdarənin Sabunçu rayonu üzrə metodbirləşmə
mərkəzinin əməkdaşı Alı müəllim, qonşu
məktəblərin direktorları və digər qonaqlar
iştirak edirdilər.
Tədbir məktəblilərin ifasında himnlə başladı.
Sonra 11 "a" sinif şagirdi Gülnar Mirzəyevanın
ifasında "Xalq -Heydər" mahnısının sədaları
altında ümummilli liderimiz Heydər Əliyevə həsr
olunmuş kinolentin nümayişi oldu.
"Əyləncəli riyaziyyat gecəsi"ni giriş sözü ilə
məktəbin direktoru Şəlalə Nadirova açaraq 74
yaşlı məktəbin uğurlarından və qarşıda duran
vəzifələrindən söz açdı.
Məktəbin həm ibtidai, həm də V-XI sinif
şagirdləri öz bacarıq və biliklərini nümayiş
etdirdilər. Dahi şəxsiyyətlərin riyaziyyat
haqqında aforizmləri, yumoristik dialoqlar,
şeirlər səsləndi, səhnəciklər göstərildi. Ayrı-ayrı
siniflərin riyaziyyata həsr olunmuş divar
qəzetlərinin nümayişi isə təqdirəlayiq bir hal
kimi qarşılandı.
Tədbirdə əməkdar müəllim Malik Aranlı gecəni çox
yüksək qiymətləndirdiyini bildirərək qeyd etdi
ki, bu gün respublikamızda riyaziyyat elminə
maraq çox artmışdır.
Ulu öndər Heydər Əliyevin "Təhsil millətin
gələcəyidir" müdrik kəlamını söyləyən 11 "a"
sinif şagirdi Kamran İsayev "Azərbaycan" mahnısı
ilə gecəni yekunlaşdırdı.
Tədbirin təşkil olunmasında məktəbin riyaziyyat
müəllimləri Törə Rəhimova, Arzu Əhmədova, Leyla
Əliyeva, Bülbül Nəcəfova, Könül Zeynalova, eləcə
də ibtidai sinif müəllimi Xanımbacı Əhmədovanın
əməyi böyükdür. Bu tədbir bir daha sübut etdi ki,
bu təhsil ocağında istedadlı şagirdlər çoxdur.
Şagirdlərin qarşısında bu gün geniş elm meydanı
açılmışdır. |
