Yanvarın 21-də Bakıdakı  229 nömrəli tam orta məktəbdə coğrafiya müəllimi Rəhilə Qarayevanın VIII "c" sinfində  İKT -nin tətbiqi ilə "Meşələr, dağ və dağ meşələri" mövzusunda  "açıq dərs"i oldu. Əvvəlcə tədbir iştirakçıları şagirdlərin  coğrafiyaya dair  əl işlərindən ibarət sərgi ilə tanış oldular.

Sonra qonaqlar "açıq dərs"də iştirak etdilər. Dərs prosesində əqli hücum, müqayisə, diskussiya və s. üsullardan məharətlə istifadə olundu. Dərsin bütün mərhələlərində  müxtəlif mövzuları əhatə edən şəkillər, dialoqlar, cümlələr səkkizincilərə elektron lövhədə göstərildi.  Sonra şagirdlər arasında bilik yarışı təşkil olundu. Əvvəlcə şagirdlər üç qrupa - "Qarabağ", "Şah dağ", "Göy-göl" qruplarına  bölündü. Müəllim Rəhilə Qarayeva yarışın keçirilmə qaydası və şərtləri haqqında məlumat verdi.  Sonra təhlil olunacaq mövzu haqqında ümumi anlayış yaradıldı. Respublikamızın tarixi, yerləşdiyi coğrafi ərazi,  regionu, təbii sərvətləri, iqtisadiyyatı, əlverişli iqlimi,  Xəzər dənizinin gəlir gətirən sahələri haqqında geniş məlumat verildi. Müəllim  Azərbaycanı müstəqil ölkə kimi təbii sərvətləri ilə dünyaya tanıtdıran ulu öndər Heydər Əliyevin əvəzsiz xidmətlərindən danışdı. Hər qrupun şagirdlərinə ölkəmizin coğrafi ərazisi, təbii sərvətləri,  əlverişli  iqlimi haqqında müxtəlif  suallar  verildi.  Şagirdlər  sualları çətinlik çəkmədən cavablandırdılar. Bilik yarışı kompüterlə virtual formada aparılır, şagirdlər suallara verdikləri cavabların düz olub-olmadığını proyektor vasitəsi  ilə  ekranda görürdülər. Sonra krossvord şəklində mövzuya aid sözlər şagirdlərə  təqdim olundu. Hər qrupun lideri verilən tapşırığın yerinə yetirilməsi haqqında məlumat verdi. "Meşələr, dağ və dağ meşələri" mövzusuna aid respublikamızın əlverişli coğrafi ərazisi və təbii sərvətləri haqqında şagirdlərə film nümayiş  etdirildi.  Müəllim şagirdlərdən ibarət münsiflər heyətinin birgə razılığı  ilə qrupları qiymətləndirdi.

Tədbirin sonunda məktəbin direktoru Fəridə Bağırova çıxış edərək "açıq dərs"in yaxşı təşkil olunduğunu və şagirdlərin yüksək bilik və hazırlıq nümayiş etdirdiyini bildirdi. Müzakirələrdə "açıq dərs" qonaqlar tərəfindən yüksək qiymətləndirildi.  

Rəşad ZİYADOV