|
|
|
Beynəlxalq təhsil xəbərləri |
|
|
|
|
İsveçdə xarici abituriyentlərin sayı artır |
|
İsveç universitetlərində magistr proqramları
üzrə təhsil almaq istəyən xarici tələbələrin
sayı artır. Son illər İsveç ali məktəbələrinin
populyarlığının aşağı düşməsindən sonra ilk dəfə
ölkənin təhsil sistemində ciddi tərəqqi müşahidə
olunmaqdadır. Upsala Beynəlxalq Universitetinin
koordinatoru Kay Svenssonun sözlərinə görə,
magistr proqramları üzrə təhsil almaq istəyən
xarici tələbələrin sayı 20 faiz artıb. Bu rəqəm
hələlik tam dəqiqləşməyib, lakin magistr
proqramlarına meyil edənlərin sayının artması 80
faiz Avropa hüdudlarından kənardakı ölkələrin
payına düşür. Buna səbəb isə yaxşı marketinq və
cəlbetmənin yaxşı şəraitinin mövcud olmasadır.
Xarici tələbələr həm də Lund Universitetinin
magistr proqramlarına böyük maraq göstərirlər.
Cari il ərzində bu universitetdə magistr
proqramları üzrə ərizə verənlərin sayı 20-25
faiz artıb. Bütövlükdə isə İsveçdə magistr
kurslarında abituriyentlərin sayı 24 faiz
artaraq 31233 nəfər təşkil edib. |
|
|
Barak Obama cari təhsil planlarından danışdı |
 |
Amerika prezidenti Barak Obama Miçiqan
Universiteti tələbələri qarşısında çıxışında
ölkənin təhsil sisteminin möhkəmləndirilməsi
üzrə cari planlardan danışıb. Tələbələrin böyük
rəğbətini qazanmış çıxışında Barak Obama
təhsilin əlyetərliyinin təmin olunması üzrə
başlıca vəzifələrdən bəhs edib. Prezident bir
sıra universitet və kolleclərdə təhsil
haqlarının son 20 ildə 2 dəfə qaldırılmasından
narazılığını ifadə edib. Onun sözlərinə görə,
keyfiyyətli təhsil milli iqtisadiyyatın
bərpasının açarıdır.
CNN agentliyinin məlumatına əsasən, prezident
amerikalıların ali təhsil almaları üçün
qiymətlərə nəzarət olunacağını vəd edib.
Prezident qeyd edib ki, ildən-ilə təhsil
qiymətlərinin artması Amerikada təhsilin ümumi
vəziyyətinə neqativ təsir edir. "Biz qiymətlərin
dəyişməsini izləyəcək və qiymətləri həddən çox
artıran və ya bunu mütəmadi edən təhsil
müəssisələrini məsuliyyətə cəlb edəcəyik.
Universitetlər başa düşməlidir ki, hər il
qiymətləri artırmaq olmaz. Biz onlara yaxşılğa
doğru stimul verməliyik",-deyə Barak Obama
bildrib. O, tələbələrə kömək edəcəyini deyib.
Qeyd edək ki, Amerika hökuməti təhsil
kreditlərinin həcmini mütəmadi olaraq artırmaq
niyyətindədir. Bir neçə ildən sonra kreditlərin
həcmi 8 milyard dollara çatacaq. Barak Obamanın
təhsillə bağlı cari planlarında təhsil
kreditləri üzrə faiz dərəcələrinin qorunub
saxlanması və təhsilalanlar üçün iş yerlərinin
yaradılması vəzifələri də var. Prezident dövlət
ali məktəbləri üzərində nəzarəti həyata keçirən
ayrı-ayrı ştatların hökumətlərini təhsil
sahəsinə maliyyə vəsaitlərini artırmağa çağırıb.
Prezidentin təklifinə əsasən ali məktəblərə
göstəriləcək federal yardımların həcmi bir neçə
milyard dollar artmalıdır.
Amerikada tələbələrin təhsil və digər əsas
ehtiyaclar üzrə xərcləri orta hesabla
17500-32000 dollar arasında dəyişir. Tələbələrin
əksəriyyəti iri həcmdə təhsil kreditləri
götürməyə məcburdur ki, onların da
qaytarılmasına on illərlə vaxt lazım gələ bilər.
|
|
|
Rusiyada pedaqoji ali məktəblər ləğv olunmayacaq |
|
Rusiya Federasiyasında pedaqoji təhsil ayrıca
fənn kimi qalacaq. Bu barədə Rusiyanın hökumət
başçısı Vladimir Putin Tomsk Universitetinin
tələbələri ilə görüşündə bildirib. "Mən əminəm
ki, biz pedaqoji təhsili ayrıca istiqamət,
ayrıca fənn kimi inkişaf etdirməliyik. Bu,
olduqca həssas və mürəkkəb prosesdir", - deyə
V.Putin pedaqoji ali məktəblərin ləğv olunması
və onların akademik təhsil müəssisələrinə
birləşdirilməsi barədə məsələyə münasibətini
bildirib. O, pedaqoji təhsilin kifayət qədər
spesifik sahə olduğunu deyib. "Yaxşı fizik və ya
riyaziyyatçı olmaq kifayət deyil, həm də pedaqoq
olmaq lazımdır, bundan ötrü psixologiyanı,
pedaqogikanı bilmək lazımdır, bu ayrı ixtisasdır".
Hökumət başçısı bu məsələ barədə ölkənin təhsil
naziri ilə məsləhətləşmələr apardığını və
pedaqoji ali məktəblərin ləğv olunması kimi bir
siyasətin gündəmdə olmadığını deyib. |
|
|
Dünya universitetlərinin veb-saytlarının
reytinqi |
 |
Dünya universitetlərinin yeni reytinq cədvəli (Webometrics
Ranking of World Universities) açıqlanıb. Cədvəl
ali məktəblərin internet-saytlarının keyfiyyət
göstəricilərinə əsaslanır. Siyahı ildə iki dəfə
İspaniyanın tədqiqat qrupu olan Cybermetrics
Lab tərəfindən tərtib olunur. İspaniyanın elmi
tədqiqatlar üzrə ali şurası yanında Humanitar və
İctimai Elmlər Mərkəzində (CCHS-CSIC) təmsil
olunan Cybermetrics Lab dünyanın 20372
universitetinə məxsus internet-saytları gözdən
keçirib. Tərtibçilər təşkilatın saytında
səhifələrin sayı, digər resurslardan
sitatgətirilmə, faylların (cədvəl, təqdimat,
mətn) sayı və başqa kriteriyaları nəzərə alıblar.
Reytinqin ilk onluğuna aşağıdakı universitetlər
daxildir: 1. Harvard Universiteti, 2.
Massaçusets Texnologiya Universiteti, 3.
Stenford Universiteti, 4. Miçiqan Universiteti,
5. Kaliforniya Berkli Universiteti, 6. Kornell
Universiteti ,7. Miçiqan Ştat Universiteti, 8.
Viskonsi Medison Universiteti, 9. Pittsburq
Universiteti,10. Karnegi Mellon Universiteti.
İlk 20 universitet arasında Amerikadan olmayan
cəmi 2 universitet yer alıb. 18-ci yerdə
Kanadanın Toronto Universiteti, 20-ci yerdə isə
Braziliyanın San Paulo Universiteti qərarlaşıb. |
|
|
Amerika elektron dərsliklərə keçir |
 |
Amerikada 2017-ci ilə qədər bütün dərsliklər
elektron dərsliklərlə əvəz olunacaq. Hazırda
ABŞ-ın Təhsil Nazirliyi və rabitə üzrə Federal
Agentlik (FCC) tərəfindən çap dərslik
məhsullarının elektron dərsliklərlə əvəz
olunması imkanları araşdırılır. Elektron
dərsliklərin tədris prosesində istifadə olunması
üçün Kindle, iPad və bu kimi qurğuların
alınması üçün hansı vəsaitlərin əldə olunması
öyrənilir.
Layihənin tərəfdarları qeyd edir ki, elektron
dərsliklərdən istifadə çap məhsullarından ucuz
başa gələcək. Bundan əlavə, çap məhsullarında
olan məlumatlar aktuallığını itirməklə daha tez
köhnələ bilər.
ABŞ Təhsil Nazirliyində hesab edirlər ki,
elektron dərsliklərdən istifadə təhsil
prosesini 30-80 faiz sürətləndirə bilər. |
|
|
Qazaxıstanın təhsil sistemi modernləşir |
|
Qazaxıstan prezidenti Nursultan Nazarbayev xalqa
illik müraciətində ölkənin təhsil sisteminin
inkişaf etdirilməsi zəruriliyindən danışıb.
Rəsmi "Kazinform" agentliyinin məlumatına görə,
prezident bəyan edib ki, Qazaxıstanın təhsil
sisteminin səviyyəsini ölkədə uğurla fəaliyyət
göstərən Nazarbayev Universiteti və ya
İntellektual Məktəb səviyyəsinə çatdırmaq
lazımdır. N.Nazarbayev yaxın illərdə ölkədə
insan kapitalının keyfiyyətinin gücləndirilməsi
vacibliyini qeyd edib. Bu, ilk növbədə, təhsil
sahəsi ilə bağlıdır. "Təhsil sisteminin
modernləşdirilməsi gedişində biz aşağıdakı
tədbirləri həyata keçirməliyik: birincisi,
tədris prosesində müasir texnologiya və
metodikalar tətbiq olunmalıdır. Bu gün
beynəlxalq standartlar əsasında Nazarbayev
Universiteti və İntellektual Məktəb uğurla
inkişaf edir, qabaqcıl müəssisələr şəbəkəsi,
texniki peşə təhsili inkişaf edir. Onların
təcrübəsini ölkənin bütün təhsil sisteminə
yaymaq lazımdır, bütün təhsil müəssisələrinin
səviyyəsi onların səviyyəsinə çatdırılmalıdır",-deyə
prezident qeyd edib. Dövlət başçısı ikinci mühüm
vəzifə kimi pedaqoji heyətin keyfiyyətinin
artırılmasını vacib hesab edir. "Baza pedaqoji
təhsilin standartları gücləndirilməlidir, ali
məktəblər və ümumtəhsil məktəblərinin
müəllimlərinin ixtisasının artırılmasına olan
tələblər artırılmalıdır"deyən prezident əlavə
edib ki, bütün regionlarda pedaqoqların
ixtisasartırma mərkəzləri fəaliyyət
göstərməlidir. O, əhalini kompüter biliklərini
artırmağa və informasiya texnologiyalarının
mənimsənilməsində fəal iştirak etməyə çağırıb.
|
|
|
Latviya təhsil sistemində təcili islahatlar |
|
Latviya təhsil sistemində təcili islahatlar
başlayır. Ölkənin təhsil və elm naziri Roberts
Kilisə görə, onun öz sözləri ilə desək, təhsil
sisteminin çökməsinə yol verməmək üçün dağılmaq
mərhələsində olan təhsildə təxirəsalınmaz
islahatlar aparılması vacibdir. Nazir qeyd edib
ki, təhsildə o qədər bərbad vəziyyət yaranıb ki,
indi hər şey dağılma mərhələsindədir. İnsanları
buna inandırmaq çox çətindir, çünki onlar bunu
hələlik hiss etmirlər. Onun sözlərinə görə,
vəziyyəti nizama salmaq üçün təcili islahatların
aparılması vacibdir. "Əgər islahatlar olmasa,
təhsil sistemi sadəcə dağılacaq", - deyə nazir
jurnalistlərlə söhbətində bildirib. Nazir orta
və peşə təhsili sistemində ciddi dəyişikliklərin
aparılmasının vacibliyini bildirib. Qeyd
olunmalıdır ki, Latviya ağır iqtisadi böhran
keçirir. Təhsil və Elm Nazirliyinin büdcəsi
kifayət qədər azaldılıb, bir çox yaxşı
müəllimlər xaricə yollanıb. Bu isə məktəb
təhsilinin keyfiyyətinə təsir etməyə bilməz.
Bundan əlavə, mütəxəssislər hesab edir ki,
müəllimlərin çoxu öz vəzifələrinin öhdəsindən
pis gəlirlər. Nazirə görə məktəblərin
mərkəzləşdirilmiş idarəçilik sistemi o qədər də
effektli olmayıb. O əmindir ki, yerli
bələdiyyələrə təhsil müəssisələrinin idarə
olunmasında daha artıq səlahiyyətlər
verilməlidir. |
|
|
OECD təhsil sahəsində lider ölkələrin adlarını
açıqlayıb |
|
İqtisadi Əməkdaşlıq və İnkişaf Təşkilatı (OECD)
təhsil sahəsində lider ölkələrin adlarını
açıqlayıb. Təşkilatın Education at a Glance 2011
adlı hesabatında qeyd olunur ki, Kanada, İsrail,
Yaponiya əhalinin təhsil səviyyəsinə görə
dünyanın lider dövlətləridir. OECD-ə görə təhsil
səviyyəsinə görə lider ölkə Kanadadır. Daha
təhsilli ölkələrin onluğuna Amerika, Yeni
Zelandiya, Cənubi Koreya, Norveç, Böyük
Britaniya, Avstraliya, Finlandiya daxildir.
Birləşmiş Krallıq istisna olmaqla digər
adıçəkilən ölkələr OECD-nin üzvüdürlər.
Ekspertlərin məlumatlarına görə, İsraildə
təhsilə ayrılan vəsaitlərin 78 faizi ictimai
fondlardan gəlir. Əhalinin 45 faizi isə
universitet və kollec məzunlarıdır.
Hesabatda qeyd olunur ki, son 50 il ərzində
inkişaf etmiş ölkələrin ali təhsil diplomuna
malik olan əhalisinin sayı 200 faiz artıb. Daha
təhsilli insanlar isə dünyanın ən zəngin,
təhsilə daha çox investisiya ayrılan ölkələrdə
yaşayırlar. |
|
|
Fransalı müəllim prezidentdən təzminat tələb
etdi |
 |
Fransada işsiz müəllim ölkə prezidenti Nikola
Sarkozinin avtomobil korteji ucbatından vakant
müəllim yeri üçün elan olunmuş müsabiqəyə çata
bilməyib. "Fiqaro" qəzetinin yazdığına görə,
fizika və kimya müəllimi Nadya Lavuanya
müsabiqənin keçirildiyi yerə vaxtında çata
bilmədiyinə görə prezidentin kortejini
günahlandırır və dövlət başçısından təzminat
ödənilməsini tələb edir. Avtobusla müsabiqənin
keçirildiyi Dijlin rayonuna çatmaq istəyən
Lavuanyanın yolunda tıxac yaranıb. Nəticədə
artıq bir neçə aydır ki, hazırlaşdığı müsabiqəyə
26 dəqiqə gecikən işsiz qadın ertəsi gün Fransa
prezidentinə məktub yazaraq ona dəymiş mənəvi və
maddi zərərin ödənilməsini tələb edib. "Mən
müsabiqədən kənarlaşdırıldım. Mənə hətta yarışa
bilmək imkanı belə vermədilər", - deyə müəllim
yazır. Qeyd edək ki, Facebook-da müəllimi
dəstək qrupu da yaradılıb. Müəllim nəqliyyata
çəkdiyi pulların geri qaytarılmasını tələb edir.
O əmindir ki, onun təzminat ödənilməsi barədə
tələbi qanunidir. |
|
|
İngiltərəli şagirdlər daha çox Oksforda üstünlük
verirlər |
|
İngiltərədə dövlət məktəblərini "əla"
qiymətlərlə bitirən şagirdlərin Oksford
Universitetində təhsil almaq şansları özəl
təhsil müəssisələrini bitirmiş şagirdlərə
nisbətən aşağıdır. "Daily Mail" qəzetinin
məlumatına görə, özəl məktəblərdən olan
abituriyentlərin dünyanın ən məşhur
universitetində təhsil alması imkanları digər
məktəblərin şagirdlərinə nisbətən 25 faiz
artıqdır. Bu rəqəm cəmiyyətdə məyusluq yaradıb.
Bir qədər əvvəl isə hökumət universitetlərə
təzyiq edərək onları cəmiyyətin müxtəlif
təbəqələrindən tələbə qəbul etməyə çağırıb. Ən
yüksək bal (A) toplayaraq Oksforda qəbul olmuş
5300 abituriyentin 29 faizi özəl məktəblərin, 23
faizi isə dövlət məktəblərinin məzunlarıdır.
Yüksək qiymətlər almış 3888 ağdərili şagirdin
28 faizi universitetə qəbul olunub. Afrikalı 67
tələbədən yalnız 13 nəfər buraxılış
imtahanlarına buraxılıb. Çin, Hindistan və digər
Asiya ölkələrindən olan tələbələr də eyni
göstəriciyə malikdirlər. Banqladeş və
Pakistandan olan tələbələrin yalnız 5 faizi
imtahan komissiyasından keçib. |
|
|
Çin məktəblərində hərbi dərslər gücləndirilir |
 |
Hərbi hazırlıq Çinin bütün mülki ali
məktəblərinin icbari təhsil planlarına daxil
olunacaq. Bu barədə məlumat Çinin Təhsil
Nazirliyinin rəsmi saytında yer alıb. "Ali
təhsil müəssisələrində təhsil prosesinin
təkmilləşdirilməsi üzrə bəzi təkliflər" adlanan
sənədin hazırlanmasında Təhsil Nazirliyi,
Silahlı Qüvvələrin Baş Qərargahı, Çin xalq
azadlıq ordusunun Baş Siyasi İdarəsi, Çin
Kommunist Partiyası Mərkəzi Komitəsinin təbliğat
şöbəsi, maliyyə və mədəniyyət nazirlikləri və
Çin Kommunist Gənclər İttifaqı Mərkəzi
Komitəsinin nümayəndələri iştirak ediblər.
Sənəd müəllifləri hesab edirlər ki, ali
məktəblərdə hərbi hazırlıq məşğələləri
vətənpərvərliyin inkişafına, gənclərin
kollektivizm və inqilabi qəhrəmanlıq ruhundə
tərbiyəsinə xidmət edəcək. Bundan əlavə, yeni
fənn tələbələrə ağır döyüşlərə hazırlaşmağa və
çətinliklərin öhdəsindən gəlməyə kömək edəcək.
Daha geniş mənada tələbələr nəinki praktiki
hərbi vərdişlərə yiyələnəcək, həm də ölkənin
müdafiə doktrinası və milli təhlükəsizliyin
təmin olunması konsepsiyası barədə təsəvvürlərə
malik olacaqlar. Təşəbbüs reallaşdırılacağı
təqdirdə Çin ordusunun zabitləri hərbi hazırlıq
fənninin tədrisinə cəlb olunacaqlar. Sənəddə
qeyd olunur ki, tələbələrin siyasi və hərbi
hazırlığına xüsusi diqqət yetiriləcək. |
|
|
Dünyanın ən yaşıl universitetləri |
|
İndoneziya Universiteti (Universitas Indonesia)
dünyanın ekoloji cəhətdən ən təmiz
universitetlərinin ikinci illik reytinq
cədvəlini - UI GreenMetric Ranking of World
Universities təqdim edib. Tərtibçilər 42
ölkədən 178 ali məktəbi gözdən keçiriblər. Seçim
prosesində enerjidən ümumi istifadə, tələbələrin
nəqliyyatdan - ictimai, şəxsi avtomobil və ya
velosipeddən istifadə etmə, ərazilərin səliqə-sahmana
salınması, zibillərin yığılması, suya qənaət,
kampus ərazisində yaşıllıqların sahəsi,
təhsilalanlar və əməkdaşlar tərəfindən ətraf
mühitin mühafizəsi prinsiplərinə əməl olunması
və s. kriteriyalar nəzərə alınıb. Dünyanın ən
yaşıl 10 universitetinin siyahısı: 1. Nottingem
Universiteti (Böyük Britaniya), 2. Nordistern
Universiteti (ABŞ), 3.Konnektikut Universiteti
(ABŞ), 4. İrlandiya Milli Universitet Kolleci (İrlandiya),
5. Linçepinq Universiteti (İsveç), 6.
Kaliforniya Berkli Universiteti (ABŞ), 7.
Kaliforniya Universiteti, Los-Anceles (ABŞ), 8.
Sent-Luis Vaşinqton Universiteti (ABŞ), 9.
Kaliforniya Merced Universiteti (ABŞ),10. Bata
Universiteti (Böyük Britaniya). |
|
Xarici mətbuat materialları əsasında hazırladı:
Oruc MUSTAFAYEV |
|
|
|
|
|
|
|
|
|
|
|
|
|
|
|
|
