Azərbaycan Tələbələr Birliyi (ATB) ilə Polşa Tələbə Parlamenti arasında əldə olunmuş razılığa əsasən, martın 23-dən 30-dək tələbələrin beynəlxalq təcrübə proqramı həyata keçirilir.

 ATB-dən AzərTAc-a bildirmişlər ki, bu proqramın keçirilməsinin məqsədi Polşadakı tələbə təşkilatlarının fəaliyyət mexanizmləri ilə yaxından tanış olmaqdır.

 Azərbaycan Tələbələr Birliyinin Polşaya səfər edən 14 nəfərlik nümayəndə heyəti həftə ərzində Varşava və Krakov şəhərlərinin üç müxtəlif universitetinin tələbə təşkilatlarında təcrübə proqramı keçəcəkdir. Təcrübə proqramı zamanı azərbaycanlı tələbələr Polşadakı tələbə təşkilatlarının strukturu, gündəlik fəaliyyəti, strateji planları barədə məlumatlar əldə edəcəklər.   Səfərin ilk günü azərbaycanlı tələbələr Polşa Tələbə Parlamentinin rəhbərliyi ilə görüşmüşlər. Görüşdə müxtəlif məsələlər, o cümlədən əməkdaşlıq perspektivləri də müzakirə edilmişdir.

 ATB tərəfindən Polşa Respublikası Tələbə Parlamentinə Azərbaycan tələbə hərəkatının gücləndirilməsinə verdiyi dəstəyə görə sertifikat təqdim edilmişdir.

 Proqram çərçivəsində azərbaycanlı tələbələrin Polşanın QHT-ləri və tələbə mediası ilə görüşləri də nəzərdə tutulmuşdur.

 Polşada əldə edilmiş təcrübə əsasında ATB tərəfindən müxtəlif layihələr, proqramlar həyata keçiriləcəkdir.