|
Müasir Azərbaycan cəmiyyətinin və dövlət
quruculuğumuzun formalaşmasında təhsil sisteminin və
burada çalışan çoxsaylı dəyərli ziyalılarımızın xüsusi
əməyi danılmazdır. Bu sahədə çalışan insanların əməyini,
onların elmi-pedaqoji fəaliyyətini və ictimai fikir
tariximizdəki yerini yüksək qiymətləndirən ümummilli
liderimiz Heydər Əliyev demişdir: "Təhsil sisteminin nə
qədər dəyərli olduğunu ondan görmək olar ki,
Azərbaycanda yüksək savada, biliyə, ixtisasa, yüksək
elmə malik insanlar var və onlar cəmiyyətin çox
hissəsini təşkil edir. Əgər onlar olmasaydı,
Azərbaycanın iqtisadiyyatı belə güclü inkişaf edə
bilməzdi. Onlar olmasaydı, biz indi Azərbaycanı müstəqil
dövlət kimi idarə edə bilməzdik. Onları qiymətləndirmək
lazımdır".
Ömrünün 35 ilini şərəfli müəllimlik peşəsinə bağlayaraq
gənc nəslin təlim-tərbiyəsinə həsr etmiş müəllimlərdən
biri də Azərbaycan Müəllimlər İnstitutunun Ağcabədi
filialının ümumi elmi fənlər kafedrasının müdiri,
pedaqogika üzrə fəlsəfə doktoru, baş müəllim Tahir
Mehdixan oğlu Kərimlidir. 1952-ci il iyul ayının 29-da
qədim Beyləqan rayonunun 1-ci Aşıqlı kəndində anadan
olmuş Tahir Kərimli səkkizillik təhsilini 1959-1967-ci
illərdə 1-ci Aşıqlı kəndində almış və təhsilini Beyləqan
şəhər 1 nömrəli orta məktəbdə davam etdirərək 1969-cu
ildə həmin məktəbin X sinfini bitirmişdir. Bir il
istehsalatda çalışdıqdan sonra 1971-1973-cü illərdə
həqiqi hərbi xidmətdə olmuşdur. Hərbi xidmətdən
qayıtdıqdan sonra 1973-cü ildə Azərbaycan Pedaqoji
İnstitutunun (indiki ADPU) ibtidai təhsilin
pedaqogikası və metodikası ixtisası üzrə əyani şöbəsinin
1-ci kursuna daxil olmuşdur. 1973-1977-ci illərdə bu
fakültəni "əla" qiymətlərlə oxuyan Tahir Kərimli nəinki
fakültənin, eyni zamanda universitetin ictimai-siyasi
həyatında həmişə fəallıq göstərmiş, tələbə elmi
cəmiyyətində və həmkarlar təşkilatlarında üzv olmaqla
mühüm ictimai vəzifələr icra etmişdir. Təhsilini başa
vurduqdan sonra təyinatla işləmək üçün Şuşa Pedaqoji
Texnikumuna göndərilən Tahir Kərimli gələcək həyatını
birdəfəlik Şuşa şəhəri ilə bağlamışdır. 1977-1988-ci
illərdə Şuşa Pedaqoji Texnikumunda pedaqogika və
psixologiya fənlərini tədris etmiş, 1980-1981-ci illərdə
Şuşa Mədəni-Maarif Texnikumunda müəllim vəzifəsində
çalışmış və eyni zamanda qədim Şuşa şəhərinin
ictimai-siyasi həyatında yaxından iştirak etmişdir.
Bilik, bacarıq və təşkilatçılıq qabiliyyətini başqa
sahələrdə də göstərmiş Tahir Kərimli 1991-ci ildən
pedaqoji universitetin Şuşa fakültəsinə (sonralar Şuşa
filialı adlandırıldı) dərs deməyə dəvət olunur. Bir
ildən sonra, yəni 1992-ci ildə Şuşa şəhəri erməni-rus
hərbi birləşmələri tərəfindən işğal edildikdən sonra
ADPU Şuşa filialı Ağcabədi rayonunda məskunlaşır.
2000-ci ildə Azərbaycan Respublikasının Prezidenti,
ümummilli lider Heydər Əliyev "Azərbaycan
Respublikasında təhsil sisteminin təkmilləşdirilməsi
haqqında" sərəncam imzalayır və sərəncama əsasən Şuşa
filialının maddi-texniki bazasının əsasında AMİ-nin
Ağcabədi filialı yaradılır. Həmin vaxtdan Tahir müəllim
əvvəlcə pedaqogika və psixologiya, hazırda isə ümumi
elmi fənlər kafedrasına rəhbərlik edir.
AMİ-nin Ağcabədi filialında müəllim və kafedra müdiri
kimi çalışdığı illərdə ömrünü gənc nəslin
təlim-tərbiyəsinə həsr edən Tahir müəllim bu illər təkcə
pedaqoji fəaliyyətlə məşğul olmur, həm də 1990-cı
illərdən başlayaraq pedaqogikanın tarixinə,
nəzəriyyəsinə, təlim və tərbiyə məsələlərinə, pedaqoji
işin tədqiqinə, məktəbin ailə və ictimaiyyətlə
əlaqəsinə, məktəbşünaslığa, həmçinin Milli Kurikulumun
tətbiqinə və icrasına aid çoxsaylı monoqrafiyalar,
dərsliklər, dərs və metodik vəsaitlər, proqramlar və
məqalələr nəşr etdirir.
Hələ tələbəlik illərində tələbə elmi cəmiyyəti xətti ilə
bir sıra maraqlı tədqiqat işlərinə imza atmış Tahir
müəllimin professor M.Muradxanovun rəhbərliyi ilə
işləmiş olduğu "A.S.Makarenkonun pedaqoji irsinin
Azərbaycanda nəşri və tədqiqi" adlı diplom işi gənc
tədqiqatçının ən uğurlu işi sayılmış, akademik H.Əhmədov
və professor X.Fətəliyev tərəfindən yüksək
qiymətləndirilmişdir. 1976-cı ildə professor N.Sadıqovun
rəhbərliyi ilə işlədiyi "İbtidai siniflərdə hərfi
simvolikanın öyrənilməsi metodikası" adlı tədqiqat işi
ali məktəb tələbələrinin 1976-cı ildə keçirilmiş III
Respublika konfransında III dərəcəli diploma layiq
görülmüşdür.
Bu əsərlər içərisində "Mir Mövsüm Nəvvab Qarabağinin
pedaqoji görüşləri", "M.M.Nəvvabın əsərlərinin nəşri və
tədqiqi tarixindən" və yenə də "M.M.Nəvvabın
təlim-tərbiyəyə aid fikirlərindən pedaqoji prosesdə
istifadə imkanları" adlı monoqrafiya, dərslik və
metodik vəsaitlər respublikanın pedaqoji ictimaiyyətinin
rəğbətini qazanmış əsərlərdir. Tahir Kərimli 30-dan çox
elmi məqalənin müəllifidir. Bundan başqa "N.Gəncəvinin
yaradıcılığında tərbiyə məsələləri", "M.M.Nəvvabın
əsərlərində sadəlik və təvazökarlıq haqqında",
"M.M.Nəvvabın islam dini və islam əxlaqı" haqqında
fikirləri, "Heydər Əliyev və Azərbaycan milli mənəvi
dəyərlərin inkişafı", "Müasir Azərbaycan gənclərinin
vətənpərvərlik tərbiyəsi məsələləri" adlı irihəcmli
əsərləri də Azərbaycanda maarifçilik fikrinin
inkişafına, gənclərin təlim-tərbiyəsinə və milli mənəvi
dəyərlərin inkişafına həsr olunmuşdur.
Tahir müəllimin çoxillik, səmərəli, elmi pedaqoji
fəaliyyəti onun 2005-ci ildə "M.M.Nəvvab Qarabağinin
pedaqoji görüşləri" mövzusunda namizədlik dissertasiyası
müdafiə edərək alimlik dərəcəsi alması ilə yeni
mərhələyə keçir və bundan sonra o, daha irihəcmli
əsərlər nəşr etdirməyə başlayır.
O, yaxşı pedaqoq, zəhmətkeş alim, səmimi insan olmaqla
yanaşı, həm də kamil xarakterə malik bir şəxsiyyətdir.
O, işlədiyi kollektivlərdə xüsusi nüfuz sahibi olub və
yaxşı mənada ictimai rəy yarada bilən insanlardan biri
kimi həmişə seçilib. Onun xeyirxah əməllərindən ətrafı
bəhrələnib, tələbələri və yaxınları bu sadə insanla
həmişə fəxr ediblər. Tahir müəllim üçün vətən, xalq,
bütöv və müstəqil Azərbaycanın bu günü və gələcəyindən
əziz və müqəddəs olan heç nə yoxdur.
İşlədiyi pedaqoji kollektiv, dostları və tələbələri
yaxşı bilirlər ki, tələbələri Tahir müəllimin hər
dərsini böyük maraq və həvəslə gözləyirlər. Çünki Tahir
müəllim öz borcunu təkcə təlimata uyğun olaraq proqram
materiallarını tələbələrə çatdırmaqla kifayətlənməmiş,
vaxtilə keçmiş sovet rejiminin ideoloji tələblərinə zidd
olsa da, xalqımızın tarixi və taleyi ilə bağlı ciddi
problemlərə toxunmuş, gənclərin öyrənməsi qadağan
edilmiş ciddi məsələlərə aydınlıq gətirmiş, onların əsl
vətəndaş kimi mənəvi cəhətdən formalaşmalarına çalışmış,
onlarda milli şüur, milli düşüncə və bütövlükdə
azərbaycançılıq ideyasının təşəkkül tapmasında müstəsna
rolu olmuşdur.
Hələ keçən əsrin 90-cı illərində Tahir müəllim
ermənilərin Qarabağda qeyri leqal fəaliyyət göstərən "Daşnaksütyun"
və "Krunq" təşkilatlarının fəaliyyətlərinə qarşı ciddi
mübarizə aparmış və məsələyə bütün yaxınlarını,
sədaqətinə inandığı və güvəndiyi tələbələrini də cəlb
edə bilmişdir.
Tahir müəllim sözü ilə əməli, peşəsi ilə şəxsiyyəti
üst-üstə düşən insanlardan biridir. Onun ictimai-siyasi
fəaliyyəti də, mədəni-maarif işi və pedaqoji sahədəki
fəaliyyəti də bitkin olub. Həmişə Qarabağdan, gözəl
Şuşadan danışanda da, yazanda da ağlaya-ağlaya, yana-yana
söhbət açıb. Tahir müəllim vətənimizin nadir incisi
Şuşanın qəriblikdə, düşmənin tapdağı altında göz yaşı
axıtdığını, hələ ki qisası alınmamış, Qarabağın
müdafiəsi uğrunda gedən döyüşlərdə qanı tökülən
igidlərin narahat ruhlarının bizi son döyüşə səslədiyini
deyir. Milli ruhumuzu və yaddaşımızı korşalmaqdan və
mürgüləməkdən oyadır, qeyrət qılıncımızı təzələyir.
Tezliklə könlümüzün keçdiyi Qarabağa özümüzün
gedəcəyimizdən xəbər verir.
Dostları və həmkarları bu insanda bütün müsbət
keyfiyyətləri içərisində əsas üç sahənin birləşdiyini
xüsusi qeyd edirlər: Yaxşı tədris təşkilatçısı, geniş
ümumi və dərin ixtisas biliyinə malik olan ictimaiyyətçi
müəllim və yorulmaz tədqiqatçı-alim.
Müxtəlif illərdə Tahir müəllimin əməyi xalqımız və
dövlətimiz tərəfindən həmişə yüksək qiymətləndirilib.
Özünün dediyi kimi, bu mükafatların içərisində ona
verilmiş Azərbaycan Respublikasının "Qabaqcıl təhsil
işçisi" döş nişanı Tahir müəllim üçün onun sadə
müəllimlik peşəsinə verilmiş ən yüksək qiymətdir.
Yuxarıda qeyd etdiyimiz kimi, Tahir müəllim 1992-ci
ildən məcburi Şuşa köçkünü kimi Ağcabədi rayonunda
məskunlaşıb. Onun rayon ictimaiyyəti və ziyalıları
arasında və bütövlükdə Qarabağ regionunda çox böyük
hörməti var. Bu da onun daim əhali arasında olmasından
və bütün ictimai-siyasi və mədəni-kütləvi tədbirlərdə
fəal iştirakı ilə bağlıdır. O, YAP-ın üzvüdür və AMİ-nin
Ağcabədi filialının həmkarlar təşkilatına rəhbərlik edir.
Bu istiqamətdə də əməkdaşların və tələbələrin asudə
vaxtlarının səmərəli təşkili istiqamətində yadda qalan
tədbirlər hazırlayıb həyata keçirir.
Şərəfli dövlətçilik tariximiz, ana dilimiz, milli mənəvi
dəyərlərimiz, islam dininə qarşı məhəbbət və sevgi Tahir
müəllim üçün tükənməz yaradıcılıq mənbəyi, müqəddəs
inanc yeri olmaqla, həm də onun ilham mənbəyidir. Ona
görə də pedaqoq alim kimi də, filialın ağsaqqallar
şurasının sədri kimi də, hər cəhətdən öz müasirlərinə və
gələcək nəsillərə nümunə ola biləcək bir insandır.
Hər mənalı insan ömrü bir salnamədir desək yanılmarıq.
Bu baxımdan ömrünün 60-cı baharına qədəm qoyan Tahir
müəllimin həyatı bütün cəhətləri ilə aydın, şəffaf və
büllur kimi təmiz, saf və durudur. Ömrünün bu müdrik
çağında ona cansağlığı, rahat ailə xoşbəxtliyi və yeni-yeni
yaradıcılıq uğurları arzulayırıq.
Əlizadə NƏCƏFOV,
fəlsəfə doktoru, Ağcabədi Rayon Ağsaqqallar Şurasının
sədri,
Şəhla MƏMMƏDOVA,
AMİ-nin Ağcabədi filialının metodisti |
