Amerikalı tələbələrin banklara 1 trilyon dollar borcu var 

Amerikalı tələbələr bu il ali təhsil üçün banklardan götürdükləri 1 trilyon dollardan çox  vəsaiti geri qaytarmalıdırlar. Amerikanın  maliyyə xidmətləri  üzrə istehlakçıların hüquqlarını müdafiə Agentliyinin məlumatına əsasən, tələbələrin borcları Federal Ehtiyat Fondunun proqnozlarından daha artıqdır - təxminən 16 faiz. The Wall Street Journal dərgisinin yazdığına görə, gənc amerikalıların kredit borclarının artması bir neçə faktorla izah olunur.  Agentlik qeyd edir ki, bu, ilk növbədə, gənclərin bazar qarşısında keçirdikləri narahatlıqla bağlıdır. Ölkədə işsizlik səviyyəsi 8 faizdir. Xarici tələbələr hesab edir ki, ali təhsil almaqla onlar asanlıqla yüksək maaşlı iş tapa biləcəklər. Universitet diplomuna olan tələbatı görən Amerika ali məktəbləri təhsil haqlarını qaldırmaqdan çəkinmirlər. Üçüncü səbəb isə bununla bağlıdır ki, bir çox tələbələr köhnə borcları silmək üçün yeni kreditlər alırlar. Agentlik qeyd edir ki, təhsil borclarına görə vaxt uzanır. Və ali təhsil almış, artıq işə düzəlmiş gənclər öz şəxsi həyatlarını qurmaq üçün (ev, avtomobil, ev şəraiti və s.) yeni kreditlər götürə bilərlər.  Hesablamalara görə, orta hesabla hər bir universitet məzununa  24 min dollar təhsil borcu düşür.   

Rusiyada tələbələrə güzəştli kreditlər veriləcək 

Rusiyada tələbələr təkcə təhsil xidmətləri üzrə deyil, həm də  yaşayış, ərzaq, nəqliyyat və digər ehtiyaclara görə güzəştli kreditlər ala biləcəklər. Təhsil və Elm Nazirliyi tələbələrə bu cür kreditlər təqdim edəcək ali məktəblərin siyahısını müəyyənləşdirəcək. "İzvestiya" qəzetinin yazdığına görə, nazirliyin seçdiyi fəal tələbələr təhsil haqlarını ödəmək üçün borc ala biləcəklər. Borclar tələbələrə faizsiz veriləcək. Təhsil alandan borcödəmə qabiliyyətinin təsdiq olunması tələb olunmayacaq.   Borcun ödənməsi təhsilalanın ali məktəbi bitirməsindən sonra 10 il müddəti əhatə edəcək. Müvafiq sənədlərin toplanmasından sonra hökumətə təhsil kreditlərinin dövlət tərəfindən dəstəklənməsi qaydaları və şərtləri, borcun həcmi müəyyənləşdiriləcək.   Təhsil və elm naziri Andrey Fursenko hesab edir ki, əlavə kreditlər təhsilin özünə verilən borclardan daha aktualdır. "Digər şəhərlərə təhsil almağa gedən gənclərin necə yaşamaq kimi  problemləri yaranır. Onlar işləyərək pul qazanmalıdırlar, bu halda onlar təhsildə axsayacaqlar. Yaxud yaşadıqları evin yaxınlığında oxumaq üçün daha maraqsız ixtisas seçməli olacaqlar",-deyə nazir bildirib.   Nazir qeyd edib ki, bu vəsaitlər təhsil prosesində gənclərin məsrəflərini kompensasiya etməyə imkan verəcək və ən uğurlu tələbələrə veriləcək. 

Dərsdən yayınma hallarına qarşı mübarizənin orijinal yolu 

Braziliyada şagirdlərin dərslərdən yayınma hallarına qarşı mübarizənin orijinal yolu tətbiq olunur. Şagirdlərin məktəbli formalarında onların gün ərzində harada olmasını müəyyən etməyə kömək edən xüsusi mikroçiplər yerləşdirilib. Təhsil ictimaiyyəti birmənalı şəkildə bu yeniliyin dərsdən yayınma hallarına qarşı səmərəli təklif olduğunu düşünür. Hələlik mikroçiplər ölkənin şərqində Baiya ştatındakı Vitoriya-da-Konkista şəhərində 20 min şagirdin məktəbli paltarında quraşdırılıb. Şəhər təhsil departamentinin direktoru Koriolano Moraeşin sözlərinə görə, bir çox ailələr öz övladlarının dərslərdən yayınmasından heç şübhələnmirlər. "Biz müşahidə etmişik ki, uşaqlarını məktəbə gətirən valideynlər onların doğrudan da məktəbə daxil olduğunu görmürlər. Valideynlər daim işə tələsirlər", - deyə Moraeş bildirib. Mikroçiplər məktəbli formasının qollarına və yaxud məktəbin simvolunun altında yerləşdirilib. Uşaqlar məktəbin giriş qapısından daxil olarkən mikroçiplər onların valideynlərinə SMS-xəbər göndərir. Əgər uşaq dərsə 20 dəqiqədən artıq geciksə, valideynlər belə bir məzmunda xəbər alırlar: "Sizin uşaq bu vaxta kimi məktəbə gəlməyib". Məmurlar deyirlər ki, mikroçiplər valideynlər və məktəb arasında qarşılıqlı anlaşmanı yaxşılaşdıracaq. Şəhər hakimiyyət orqanları artıq mikroçipli məktəbli  paltarlarını "ağıllı məktəbli forması" adlandırıblar.  Gələn ildən 4 yaşdan 14 yaşa kimi bütün məktəblilər bu cür sistemdən istifadə edəcək.  

Hazırladı: Oruc MUSTAFAYEV