Paytaxtımızda ekologiya və təbiəti mühafizə problemlərinə həsr olunan Ətraf Mühitin Mühafizəsi VI Beynəlxalq Layihə  Olimpiadasına (İNEPO-AVRASİYA) start verildi.  Bununla bağlı aprelin 3-də "Çağ" Öyrətim İşlətmələri Şirkətində KİV nümayəndələri üçün mətbuat konfransı keçirildi. Tədbiri Azərbaycan-Türkiyə Özəl Liseyləri Baş İdarəsinin rəisi, Ətraf Mühitin Mühafizəsi VI Beynəlxalq Layihə Olimpiadasının (İNEPO-AVRASİYA) təşkilat komitəsinin sədri Arif Gömleksiz açaraq  media nümayəndələrinə olimpiada haqqında geniş məlumat verdi.

Yarışın keçirilməsində əsas məqsədin Azərbaycanda və dünyada artmaqda olan ekoloji problemlərin həlli və ətraf mühitin qorunub saxlanması istiqamətində gənc nəsli məlumatlandırmaq, şagirdlərdə ekoloji şüuru inkişaf etdirmək, onlarda ətraf mühitə qarşı həssas, müsbət münasibət formalaşdırmaq olduğunu qeyd edən Arif Gömleksiz həmçinin  təbii, mədəni, sosial-estetik, tarixi dəyərlərin qorunması məsələlərinin də diqqətdə saxlanıldığını bildirdi. Şagirdlərin olimpiadaya böyük həvəs göstərdiklərini və bu yarışa qatılmaq istəyən ölkələrin sayının ilbəil artdığını deyən idarə rəisi təqdim olunan layihələrdə  ekologiya, ətraf mühitin mühafizəsi ilə bağlı bir sıra problemlərin öz əksini tapdığını və hazırlanmış xüsusi stendlərin ictimaiyyət tərəfindən maraqla qarşılanacağına  ümidvar olduğunu bildirdi.

"Çağ" Öyrətim İşlətmələri Şirkəti İdarə Heyətinin sədri Ənvər Özərən 2007-ci ildən Bakıda keçirilən adıçəkilən yarışın artıq ənənəyə çevrildiyini söylədi. Qeyd etdi ki, dünyanın müxtəlif ölkələrindən bu tədbirdə iştirak etmək üçün hər il şəhərimizdə səfərdə olan şagirdlər ekoloji problemlərlə bağlı məktəblilərimizlə bir araya gəlirlər. Bakıda keçirilən beynəlxalq olimpiadanın digər ölkələrdə təşkil olunan yarışlardan xüsusi özəlliyi ilə fərqləndiyini deyən Ənvər Özərən bildirdi ki, yarışa qatılan xarici ölkələrin məktəbliləri burada ilk növbədə Azərbaycan xalqının qonaqpərvərliyi, isti münasibəti ilə qarşılaşırlar.

Ənvər Özərən Azərbaycan -Türkiyə Özəl Liseylərinin yarandığı vaxtdan bu günə qədər uğurla fəaliyyət göstərməsindən, burada təhsil alan şagirdlərin dünya bilik olimpiadalarında qazandıqları nailiyyətlərdən ətraflı söz açdı. Qeyd olundu ki, azərbaycanlı gənclər xarici ölkələrdə təşkil olunan  nüfuzlu bilik yarışlarında yüksək savad və bacarıq nümayiş etdirərək  Vətənə medallarla dönürlər. Bundan böyük qürur və sevinc hissi keçirdiyini deyən Ənvər Özərən daha sonra  "Çağ" Öyrətim İşlətmələri Şirkətinin fəaliyyətinin 20-ci ildönümünə həsr edilmiş məktəblilərin Ətraf Mühitin Mühafizəsi VI Beynəlxalq Layihə Olimpiadasının (İNEPO-AVRASİYA) əhəmiyyətinə toxunaraq çıxışının sonunda bütün iştirakçılara uğurlar arzuladı, tədbirin təşkilində zəhməti olanlara təşəkkürünü bildirdi.

Məlumat üçün bildirək ki, olimpiadanın açılışı aprelin 6-da olacaq, iştirakçılar təmsil etdikləri ölkələri haqqında stendləri və ətraf mühitin mühafizəsi ilə bağlı hazırladıqları layihələrini nümayiş etdirəcəklər. Elə həmin gün olimpiada iştirakçılarının təqdim etdikləri layihələr münsiflər heyəti tərəfindən diqqətlə nəzərdən keçirilərək geniş təhlil ediləcək və qaliblər müəyyənləşdiriləcəkdir. Aprelin 7-də isə Heydər Əliyev adına İdman-Konsert Kompleksində qaliblərin mükafatlandırılması mərasimi keçiriləcəkdir. 

Samirə  KƏRİMOVA