Azərbaycan Müəllimlər İnstitutunda 31 mart - Azərbaycanlıların soyqırımına həsr olunmuş tədbir faciə qurbanlarının xatirəsinin bir dəqiqəlik sükutla yad edilməsi ilə başladı.

 İnstitutun tərbiyə işləri üzrə prorektoru, filologiya üzrə fəlsəfə doktoru Tünzalə Yusifova tarixin qan yaddaşına yazılmış bu soyqırımı haqqında  məlumat verərək bildirdi ki, 31 mart 1918-ci il soyqırımına siyasi qiymət ümummilli lider Heydər Əliyevin 26 mart 1998-ci il tarixli "Azərbaycanlıların soyqırımı haqqında" fərmanı ilə verilmişdir. Tarixin bu dəhşətli səhifəsini hər il dövlətimiz və millətimiz böyük ehtiramla yad edir.

Tədbirdə geniş məruzə ilə çıxış edən dosent Telman Haqverdiyev 31 mart soyqırımının ermənilərin planlı şəkildə həyata keçirdikləri siyasətin bir həlqəsi olduğunu qeyd etdi. O bildirdi ki,  Gülüstan və Türkmənçay sülh müqavilələri ilə başlayan erməni köçləri Azərbaycan torpaqları hesabına "Böyük Ermənistan" yaratmaq istəyən erməni millətçilərinin formalaşmasında əsas rol oynadı.  XX əsrin başlanğıcında millətimizə qarşı törədilən kütləvi qanlı hadisələr 1918-ci ilin mart ayında özünün ən ağır dövrünü yaşadı.

Tələbələr  31 mart soyqırımına gənclərin baxışını, onların məlumatlılığını, sosial şəbəkələrdə, virtual aləmdə aktiv şəkildə təbliğatın aparılmasında rolunu diqqətə çatdırdılar.

Tədbirdə 31 mart - Azərbaycanlıların soyqırımı haqqında videogörüntülər nümayiş olundu, müzakirələr aparıldı.