Naxçıvan Müəllimlər İnstitutunda 31 mart - Azərbaycanlıların soyqırımına həsr olunmuş elmi-praktik konfrans keçirilmişdir. Soyqırımı qurbanlarının xatirəsi bir dəqiqəlik sükutla yad edildikdən sonra tədbiri giriş sözü ilə  institutun rektoru, professor Oruc Həsənli açaraq ermənilərin və onların havadarlarının xalqımıza qarşı həyata keçirdikləri soyqırımı, torpaqlarımızda törətdikləri qanlı faciələr barədə  həqiqətləri faktlarla diqqətə çatdırmışdır. Bildirilmişdir ki, erməni millətçilərinin xalqımıza qarşı hərbi, siyasi, ideoloji və başqa vasitələrlə yürütdüyü siyasətin  məqsədi azərbaycanlıları öz doğma torpaqlarından sıxışdırıb çıxarmaq, yeni ərazilər ələ keçirməklə "Böyük Ermənistan" dövləti yaratmaq olmuşdur. 1918-ci ilin mart qırğını da bu siyasətin nəticəsidir. Həmin il Bakıda başlanan və Azərbaycanın digər bölgələrində davam etdirilən soyqırımlarda minlərlə insan vəhşicəsinə öldürülmüşdür. Xalqımızın ümummilli lideri Heydər Əliyevin 1998-ci il martın 26-da imzaladığı "Azərbaycanlıların soyqırımı haqqında" fərmanla ilk dəfə olaraq dövlət səviyyəsində qanlı faciəyə siyasi qiymət verildi. Ulu öndərin qətiyyətli və məqsədyönlü siyasi kursunu ölkə başçısı cənab İlham Əliyev uğurla davam etdirir.

Çıxışlarda qarşımızda duran bütün problemlərin həllinə, o cümlədən torpaqlarımızın ərazi bütövlüyünün bərpasına nail olacağımıza əminlik ifadə olunmuşdur.

Tələbələr soyqırımı qurbanlarına həsr olunmuş şeirləri söyləmişlər.  

*** 

Naxçıvan Özəl Universitetində 31 mart -Azərbaycanlıların soyqırımı ilə bağlı keçirilən elmi-praktik konfransda  ali təhsil ocağının tərbiyə işləri üzrə prorektoru Əli Yusifov çıxış edərək  soyqırımın tarixindən, bu illər ərzində dünya ictimaiyyətinə və beynəlxalq təşkilatlara çatdırılması istiqamətində respublikamızda görülmüş işlərdən, ümummilli liderimiz Heydər Əliyevin soyqırımla əlaqədar imzaladığı fərmanın əhəmiyyətindən danışmışdır.

Konfransda erməni millətçilərinin və daşnaklarının "Böyük Ermənistan" yaratmaq xülyası ilə zaman-zaman yeni-yeni fəlakətlər törətmələrindən, soyqırımı və deportasiyaya məruz qalmış xalqımızın başına gətirilən müsibətlər barədə məlumat verilmiş, xalqımızın bu məsələlərin beynəlxalq ictimaiyyət və təşkilatlar tərəfindən tezliklə həqiqi qiymət alacağına əmin olduğu bildirilmişdir.  

Nuray ƏSGƏROVA