Bakıdakı A.Hüseynzadə adına 20 nömrəli məktəb-liseydə "Dilimiz varlığımızdır" adlı tədbir keçirildi. Tədbiri məktəbin direktoru, Azərbaycan Respublikasının əməkdar müəllimi Sabir Məmişov açaraq bildirdi ki, ana dili bizim müqəddəs sərvətimiz, anamızın dilidir. Ana dili bizim kökümüz, mədəniyyətimiz, milli əxlaqımızdır.

Sabir müəllim dilimizin tarixi inkişaf yoluna nəzər salaraq qeyd etdi ki, bütün dövrlərdə Azərbaycanın yazıçı və şairləri dilimizin keşikçisi olmaq missiyasını ləyaqətlə yerinə yetirmişlər. Dilimizin  inkişafında və hazırkı mövqeyə çatmasında ümummilli liderimiz Heydər Əliyevin xidmətləri danılmazdır. Ümummilli liderimiz bütün ömrü boyu Azərbaycan dilinə məhz millətin taleyi kimi yanaşaraq onu sevməklə bərabər, keşiyində də müdrikliklə dayanmış və bizlərə əmanət etmişdir. Əsrlərin əmanəti olan doğma dilimizi qorumaq, ona hörmətlə yanaşmaq hamımızın müqəddəs borcudur. Direktor çıxışını Azərbaycana həsr etdiyi şeirini söyləməklə bitirdi.

Sonra səhnə uşaqların ixtiyarına verildi. Dilimizin inkişafı, qorunması, dövlət dili səviyyəsinə yüksəlməsinə dair maraqlı məlumatlarla, ədəbi-bədii nümunələrlə zəngin olan tədbirdə ulu öndərimizin dövlət dilinə olan sevgisi və qayğısı xüsusi vurğulandı. "Ulu öndər və ana dili" adlı videoçarx tamaşaçıların böyük marağına səbəb oldu.

Bakı Şəhəri üzrə Təhsil İdarəsinin əməkdaşı Şəmsi Qoca, şairlər Musa Ələkbərli, Vahid Aslan, valideyn Şahbaz Muradov, pedaqogika üzrə fəlsəfə doktoru Şahrza Ağayev və başqaları mövzu ilə bağlı çıxış etdilər. Tədbir "Yaşa, Azərbaycan" mahnısının sədaları altında sona çatdı.

Fazil İDRİSOĞLU