Aprelin 7-də Heydər Əliyev adına İdman-Konsert Kompleksində ekologiya və təbiəti mühafizə problemlərinə həsr olunan Ətraf Mühitin Mühafizəsi VI Beynəlxalq Layihə Olimpiadasının (İNEPO-AVRASİYA) qaliblərinin mükafatlandırılması mərasimi keçirildi.

Tədbirdə müvafiq dövlət qurumlarının nümayəndələri, Milli Məclisin deputatları, bir sıra dövlətlərin ölkəmizdəki səfirliklərinin nümayəndələri, qeyri-hökumət təşkilatlarının təmsilçiləri, respublikanın orta ümumtəhsil məktəblərinin direktorları, görkəmli alim və pedaqoqlar iştirak edirdilər.

Azərbaycan Respublikasının Dövlət himni səsləndirildikdən sonra çıxış üçün söz alan Azərbaycan - Türkiyə Özəl Liseyləri Baş İdarəsinin rəisi, Ətraf Mühitin Mühafizəsi VI Beynəlxalq Layihə Olimpiadasının (İNEPO-AVRASİYA) təşkilat komitəsinin sədri Arif Gömleksiz olimpiadanın məqsəd və məramından danışdı. Qeyd olundu ki, 2007-ci ildən 17 ölkənin iştirakı ilə Bakıda keçirilməyə başlayan adıçəkilən beynəlxalq yarışa qatılan ölkələrin sayı  ildən-ilə artaraq bu il 42-yə çatmışdır. Olimpiadanın əhəmiyyətinə xüsusi toxunan idarə rəisi onun dünyada, o cümlədən Azərbaycanda mövcud olan ekoloji  problemlərin həlli və ətraf mühitin mühafizəsi istiqamətində böyüməkdə olan gənc nəslin məlumatlandırılmasında, ekoloji biliklərin inkişaf etdirilməsində müsbət rol oynadığını bildirdi. Son illər ölkəmizin iqtisadi, elmi, sosial və digər sahələrdə keçirilən bir sıra beynəlxalq tədbirlərə ev sahibliyi etdiyini söyləyən Arif Gömleksiz Azərbaycanın uğurlu inkişafından da ətraflı söz açdı. Olimpiadanın yüksək səviyyədə keçirilməsində dəstək olan dövlət  qurumlarının və təşkilatların adlarını qeyd edən idarə rəisi onlara minnətdarlıq etdi, xarici ölkələrdən gələn məktəblilərin respublikamızdan xoş təəssüratla ayrılacaqlarına əmin olduğunu bildirdi.

Sonra mərasim iştirakçıları  beynəlxalq layihə olimpiadasının yaranma tarixindən və məzmunundan bəhs edən sənədli filmə tamaşa etdilər.

Layihə olimpiadasının adları açıqlanan qalib məktəbliləri səhnəyə dəvət olundu. 4 kateqoriya - enerji, mühəndislik, ətraf mühit və sosial elmlər üzrə keçirilən beynəlxalq layihə olimpiadasında Azərbaycan məktəbliləri 4 qızıl,12 gümüş,17 bürünc olmaqla bütövlükdə 33 medal qazandılar. Bundan başqa, Azərbaycan Respublikası Dövlət Neft Şirkətinin təsis etdiyi xüsusi mükafat da olimpiadaya təqdim etdikləri layihələrin aktuallığı ilə seçillən azərbaycanlı məktəblilərə nəsib oldu. Yarışa digər ölkələrdən qatılan şagirdlər də müvafiq yerlər tutaraq medallara sahib oldular.

Olimpiada qaliblərinə mükafatları təhsil nazirinin müavini Qulu Novruzov, ekologiya və təbii sərvətlər nazirinin müavini Firdovsi Əliyev, Azərbaycan Respublikası Dövlət Neft Şirkətinin vitse-prezidenti Rəfiqə Hüseynzadə, Nizami Rayon İcra Hakimiyyətinin başçısı Tahir Budaqov, Türkiyənin ölkəmizdəki səfiri Hulusi Kılıç, "Çağ" Öyrətim İşlətmələri Şirkəti İdarə Heyətinin sədri Ənvər Özərən, İctimai Televiziya və Radio Yayımları Şirkətinin Gənclər, elm və təhsil verilişləri departamentinin direktoru Cəsarət Valehli, Milli Məclisin deputatları Muxtar Babayev, İqbal Ağazadə, Fazil Mustafa, Cavanşir Feyziyev təqdim etdilər.

Mərasimdə həmçinin ətraf mühitin mühafizəsi, ekologiya ilə bağlı mətbuatda yazılarla çıxış edən, süjetlər hazırlayan media nümayəndələri də mükafatlandırıldı.

Təhsil nazirinin müavini Qulu Novruzov çıxış edərək beynəlxalq layihə olimpiadasının ölkəmizdə məktəblilər arasında indiyə qədər keçirilən bilik yarışmaları arasında coğrafiyasına görə ən geniş yarışma olduğunu bildirdi. Nazir müavini qeyd etdi ki, hazırda ekologiyanın bəşəriyyətin ağrılı, qlobal problemlərindən biri olduğunu, Azərbaycanda bu sahəyə xüsusi diqqət yetirildiyini və həmin istiqamətdə Dövlət Proqramının həyata keçirildiyini nəzərə alsaq olimpiadanın belə yüksək səviyyədə təşkilini ölkəmizdə aparılan ekoloji siyasətə dünya birliyinin verdiyi qiymət kimi dəyərləndirmək olar. Çıxışında ölkə başçısı cənab İlham Əliyevin, Heydər Əliyev Fondunun prezidenti, YUNESKO-nun və İSESKO-nun xoşməramlı səfiri, Milli Məclisin deputatı Mehriban xanım Əliyevanın, Heydər Əliyev Fondunun vitse-prezidenti Leyla xanım Əliyevanın ətraf mühitin mühafizəsi məsələlərinə və ekoloji problemlərin həllinə daim xüsusi önəm verdiklərini deyən nazir müavini bu istiqamətdə görülən işləri, həyata keçirilən tədbirləri mərasim iştirakçılarının diqqətinə çatdırdı. Olimpiadada Azərbaycan - Türkiyə Özəl Liseyləri ilə yanaşı paytaxt məktəblərinin, eləcə də respublikamızın müxtəlif bölgələrində fəaliyyət göstərən ümumtəhsil müəssisələrinin şagirdlərinin iştirak etdiklərini, qaliblər arasında onların adlarının olmasını müsbət hal kimi qiymətləndirən Qulu Novruzov tədbirin təşkilində əməyi olanlara minnətdarlığını bildirdi.

Türkiyənin Azərbaycandakı səfiri Hulusi Kılıç öz ölkəsi ilə Azərbaycan arasındakı dostluq əlaqələrindən söz açaraq hər iki dövlətin münasibətlərinin inkişafında ümummilli lider Heydər Əliyevin, onun daxili və xarici siyasətini hazırda uğurla davam etdirən Respublika Prezidenti cənab İlham Əliyevin müstəsna xidmətlərini xüsusi vurğuladı. 

"Çağ" Öyrətim İşlətmələri Şirkəti İdarə Heyətinin sədri Ənvər Özərən rəhbərlik etdiyi qurumun fəaliyyətinin 20-ci ildönümünə həsr edilmiş məktəblilərin Ətraf Mühitin Mühafizəsi VI Beynəlxalq Layihə Olimpiadasının (İNEPO-AVRASİYA) əhəmiyyətinə toxundu. Qeyd etdi ki, Azərbaycan dünyanın müxtəlif ölkələrində təşkil olunan fənn olimpiadalarında yüksək səviyyədə iştirak etməklə yanaşı, müxtəlif mövzularda keçirilən bilik yarışlarına ev sahibliyi vəzifəsini də öhdəsinə götürür və layiqincə yerinə yetirir. Gündən-günə gözəlləşən Azərbaycan və onun paytaxtı Bakı şəhərimiz hər il bu cür olimpiadalarla dünyanın bir çox ölkələrindən gələn məktəbliləri qoynuna alır. Ənvər Özərən daha sonra ulu öndər Heydər Əliyevin xeyir-duası ilə fəaliyyətə başlayan Azərbaycan -Türkiyə Özəl Liseylərinin uğurları, şagirdlərin dünya olimpiadalarında qazandığı nailiyyətlər barədə iştirakçılara geniş məlumat verdi. Rəhbərlik etdiyi şirkətlə Təhsil Nazirliyi arasında qurulmuş əməkdaşlıqdan razılıq hissi ilə danışan Ənvər Özərən onlara göstərilən diqqət və qayğıya görə ölkə başçısı cənab İlham Əliyevə minnətdarlıq etdi.

Çıxış üçün söz alan ekologiya və təbii sərvətlər nazirinin müavini Firdovsi Əliyev, Azərbaycan Respublikası Dövlət Neft Şirkətinin vitse-prezidenti Rəfiqə Hüseynzadə və digər natiqlər də beynəlxalq layihə olimpiadasının məktəblilərin həyatında mühüm rol oynamasından, qloballaşan dünyamızda ekologiyanın hər kəs tərəfindən qorunmasının vacibliyindən danışdılar, paytaxtımızda keçirilən bu yarışın həmin vacib məsələyə bir daha  diqqət yönəltməkdə mühüm bəşəri rol oynadığını söyləyərək qaliblərə yeni-yeni müvəffəqiyyətlər arzuladılar. 

Samirə KƏRİMOVA