Mayın 8-də T.İsmayılov adına Uşaq-Gənclər Yaradıcılıq Sarayının "Uşaq dünyası" Rəsm Qalereyasında ümummilli lider Heydər Əliyevin anadan olmasının 89-cu ildönümünə həsr olunmuş ümumtəhsil məktəblərinin şagirdləri arasında "Heydər Əliyev və müstəqil Azərbaycan" mövzusunda respublika rəsm müsabiqəsi qaliblərinin mükafatlandırılması mərasimi keçirildi. Tədbirdə təhsil nazirinin müavini Qulu Novruzov, Ailə, Qadın və Uşaq Problemləri üzrə Dövlət Komitəsi sədrinin müavini Aynur Sofiyeva, Milli Məclisin deputatları Kamilə Əliyeva, Fuad Muradov, Təhsil Nazirliyinin Tərbiyə və məktəbdənkənar müəssisələr şöbəsinin müdiri Ağababa İbrahimov və digər şəxslər iştirak edirdilər. Qeyd edək ki, müsabiqə Təhsil Nazirliyinin 3 aprel 2012-ci il tarixli, 529 nömrəli əmrinə müvafiq olaraq təşkil edilib. Məktəb, rayon (şəhər) və respublika mərhələsindən ibarət olan rəsm müsabiqəsi 3 yaş qrupu (6-10, 11-14, 15-18 yaş qrupları) üzrə keçirilib. Müsabiqənin respublika mərhələsinə 200-ə yaxın rəsm işi təqdim edilib. Azərbaycan Rəssamlıq Akademiyasının əməkdaşlarından ibarət münsiflər heyəti tərəfindən aparılan seçim əsasında müsabiqə iştirakçıları arasından 27 nəfər qalib müəyyənləşdirilib.

Tədbiri giriş sözü ilə açan təhsil nazirinin müavini Qulu Novruzov qeyd etdi ki, müsabiqənin keçirilməsində məqsəd uşaq və gəncləri ümummilli lider Heydər Əliyevin ideyaları ruhunda tərbiyə etmək və istedadlı gəncləri üzə çıxarmaqdan ibarətdir. Müsabiqəyə təqdim olunmuş rəsmləri yüksək qiymətləndirən Qulu Novruzov bütün bunları  şagirdlərin  ümummilli liderə  sonsuz məhəbbətinin təzahürü kimi səciyyələndirdi. Müsabiqədə bölgələrdən olan şagirdlərin fəal iştirakını bildirən Q.Novruzov 8 may tarixində Azərbaycanın dilbər guşəsi olan Şuşa şəhərinin mənfur ermənilər tərəfindən işğal olunmasından 20 il keçdiyini təəssüf hissi ilə qeyd etdi və qaliblər arasında Şuşa məktəblilərinin olduğunu nəzərə çatdırdı.

Nazir müavini müstəqil Azərbaycan dövlətinin banisi və qurucusu ulu öndər Heydər Əliyevin xalqımız qarşısındakı misilsiz xidmətlərindən söz açdı. Keçirilən rəsm müsabiqəsinin əhəmiyyətinə toxunan Qulu Novruzov qaliblərə yeni-yeni uğurlar arzuladı.

Ailə, Qadın və Uşaq Problemləri üzrə Dövlət Komitəsi sədrinin müavini Aynur Sofiyeva, Milli Məclisin deputatları Kamilə Əliyeva, Fuad Muradov çıxış edərək belə tədbirlərin keçirilməsini təqdirəlayiq hal kimi qiymətləndirdilər.  Ümummilli liderin ideyalarını rəsm işlərində əks etdirən kiçik rəssamların daha böyük uğurlara imza atacaqlarına inam ifadə olundu.

Müsabiqənin respublika mərhələsində I, II və III yerləri tutan şagirdlərə Təhsil Nazirliyinin diplomları və qiymətli hədiyyələr təqdim olundu. Xatirə şəkilləri çəkdirildi.

Niyazi RƏHİMOV