Mayın 10-da Bakı Pedaqoji Kadrların İxtisasartırma və Yenidənhazırlanma İnstitutunda ümummilli lider Heydər Əliyevin anadan olmasının 89-cu ildönümünə həsr edilmiş "Heydər Əliyev və Azərbaycanın intellektual potensialının inkişafı" mövzusunda elmi-praktik konfrans keçirildi.

Tədbir başlamazdan öncə iştirakçılar təhsil müəssisəsində bu il yaradılmış Heydər Əliyev muzey-lektoriyası ilə tanış oldular. Burada ulu öndərin həyatının müxtəlif dövrlərini əks etdirən fotoşəkillər və sənədlərə baxdılar. Ümummilli liderin ikinci dəfə respublikamıza rəhbərlik etdiyi illərdən bəhs edən video-çarxa böyük maraqla tamaşa etdilər.

Konfransı giriş sözü ilə açan BPKİYİ-nin rektoru, professor Asəf Zamanov "Heydər Əliyev və Azərbaycanın elmi elitası" mövzusunda məruzə etdi. Bildirdi ki, hələ 1969-cu ildə ümummilli liderimiz Heydər Əliyev ilk dəfə Azərbaycana rəhbərliyə gələn zaman respublikamızın intellektual potensialının inkişafı üçün əlindən gələni etdi. Bütün intellektinin, iradəsinin gücü ilə çalışdı ki, Azərbaycan xalqında güclü intellektual potensial formalaşsın. Bir faktı xatırlatmaq istəyirəm ki, 1969-cu ildə bizim ölkəmizdən xaricə, yəni o vaxtkı SSRİ məkanına, ittifaqın nüfuzlu ali məktəblərinə aparıcı ixtisaslar üzrə təhsil almağa göndərilən gənclərin sayı heç 50 nəfər deyildi və həmin gənclərin də çox az hissəsi azərbaycanlılar idi. Əksəriyyətini qeyri-millətlərin nümayəndələri təşkil edirdi. Lakin həmin ildən başlayan o böyük siyasət intellekt yarışında Azərbaycanın birincilər sırasına çıxarılmasında öz rolunu oynadı. Belə ki, 1981-82-ci illərdə Azərbaycandan ölkənin aparıcı ali məktəblərinə göndərilənlərin sayı artıq 1000 nəfəri keçmişdi. Həmin potensialın üzərinə staj keçməyə, aspiranturaya, doktoranturaya göndərilənlərin  sayını da gəlsək 1500-ə qədər olurdu.

Bunların hamısı isə gələcəkdə müstəqil Azərbaycanın idarə edilməsi üçün görülən işlərin başlanğıcı idi, - deyən A.Zamanov bildirdi ki, məhz həmin vaxt böyük Heydər Əliyevin müdrik və uzaqgörən siyasəti nəticəsində ölkəmizdən kənara göndərilən, yüksək təhsil almış insanlar bu gün müxtəlif məsul vəzifələrdə layiqincə təmsil olunurlar. Qeyd edildi ki, Heydər Əliyev  hələ 1969-cu ildə təxminən 25-30 il əvvəli çox yaxşı görürdü.

1970-1980-ci illərdə Heydər Əliyevin Azərbaycan üçün gördüyü nəhəng işlərdən söhbət açan rektor onu da qeyd etdi ki, Heydər Əliyev ikinci dəfə hakimiyyətə gələndə ilk görüşü Azərbaycan Elmlər Akademiyasında olub. O vaxtlar akademiyanı ləğv etmək istəyirdilər, amma Heydər Əliyev akademiyaya, onun alimlərinə yüksək qiymət verdi. Bu onu göstərirdi ki, bizim ümummilli liderimiz ölkənin intellektual potensialının inkişafında öz sözünü deyib.

Asəf  Zamanov çıxışında onu da vurğuladı ki, bu gün ölkə dinamik inkişaf edir. Beynəlxalq təşkilatların hesabatlarında da dəfələrlə qeyd edilir ki, Azərbaycan inkişaf sürətinə görə lider ölkələr sırasındadır. Amma bu liderlik sırasında olmağın əsası ümummilli liderimiz Heydər Əliyev tərəfindən qoyulub. Bu gün də ölkəmizin Prezidenti, möhtərəm İlham Əliyev tərəfindən uğurla davam etdirilir. İnanırıq ki, bu uğur nəinki BMT-nin Təhlükəsizlik Şurasının qeyri-daimi üzvü olmaqla yekunlaşacaq, əksinə daha da inkişaf edəcək. Vurğulandı ki, Azərbaycan bu gün dünyanın ən qlobal məsələlərinin həllində iştirak edir. Bu, bizim ölkə üçün çox böyük xidmətdir. Biz hamımız bundan qürur duyuruq. Ulu öndər dəfələrlə deyirdi ki, mən fəxr edirəm ki, Azərbaycanlıyam! Biz də fəxr edirik ki, Heydər Əliyevin mənsub olduğu millətin nümayəndəsiyik.

Professor A.Zamanov sonda onu da qeyd etdi ki, biz də bir ali məktəb olaraq ümummilli liderimiz tərəfindən əsası qoyulan intellektin inkişafı siyasətinin uğurla inkişaf etməsinə çalışacağıq.

Konfransda daha sonra "Heydər Əliyev və elmə əsaslanan iqtisadiyyatın formalaşması" mövzusunda AMEA-nın həqiqi üzvü Asəf Nadirov, "Heydər Əliyev və Azərbaycanın siyasi elitası" mövzusunda YAP Binəqədi rayon təşkilatının sədri Nəbi Xəlilov və "Miniatür" kitab muzeyinin təsisçisi və yaradıcısı, Prezident təqaüdçüsü, əməkdar mədəniyyət işçisi Zərifə Salahova çıxış edərək ulu öndərin Azərbaycan xalqı üçün gördüyü əvəzsiz işlərdən, yeritdiyi müdrik daxili və xarici siyasətdən ətraflı danışdılar. 

Ədalət DAŞDƏMİRLİ