İsmayıllı rayonunun Lahıc qəsəbə tam orta məktəbinin direktoru, əməkdar müəllim Hikmət Haqverdilidən aldığımız məlumatda bildirilir ki, təhsil ocağının beynəlxalq əlaqələri ilbəil genişlənir. Hazırda məktəbin müəllim və şagirdləri  artıq neçə illərdir ki, ABŞ, Fransa, Almaniya, Sloveniya, Norveç, Türkiyə, İraq, Gürcüstan, Litva, İsveçrə və s. ölkələrdən olan həmkarları ilə, "SPAKE" kimi beynəlxalq təşkilatla dostlıq əlaqələrini uğurla davam etdirirlər.

Belə əlaqələrdən biri də Sloveniyadan olan professor Vesna Çrnivets ilə yaranıb. Bu dostluq əlaqəsinin də maraqlı tarixçəsi var. Bir neçə il əvvəl məktəbin məzunu Billurə Bayramova Fransanın Bakıdakı şirkətlərindən birində çalışarkən həmin xanımla tanış olub. Bu tanışlıq  da tezliklə Bayramovlar ailəsi ilə əsl dostluğa çevrilib. Onlar birlikdə Lahıca gəliblər və məktəblə də tanış olublar. Bir əsrdən çox yaşı olan bu məktəbin müəllim və şagird kollektivi xarici qonaqda çox böyük təəssüratlar yaradıb. Beləliklə də Vesna xanım sənətşünas olduğu üçün onda "Gənclik və media" layihəsi üzərində işləmək fikri meydana çıxıb. Layihə çərçivəsində xalqımızın adət-ənənələri, milli dəyərləri, tarix və mədəniyyət abidələrinin qorunmasını əhatə edən video-foto müsabiqəsi elan olunub. Məktəbin 35 şagirdini əhatə edən 5 qrup işə başlayıb. Bir həftə ərzində şagirdlərin çəkdiyi video və fotolar əsasında Azərbaycan, ingilis və sloven dillərində "Lahıca xoş gəlmisiniz!" adlı disk işıq üzü görüb. Həmin diskin təqdimat mərasimi və İkinci Dünya müharibəsinə həsr olunmuş sərginin nümayişi 2010-cu ilin fevralında Lahıc məktəbində, apreldə isə Azərbaycan Universitetində I layihənin final mərhələsi keçirilib. Bu zaman nümayiş olunan sərgi çoxsaylı tamaşaçıların böyük marağına səbəb olub.

2011-ci ilin fevralında xanım Vesna Çrnivetsin rəhbərliyi ilə "Xalqımın milli geyim və rəqsləri" mövzusunda keçən II layihəyə bu məktəbin şagirdləri  də qoşularaq sərgidə nümayiş olunmaq üçün 25-dən çox əl işi göndəriblər. Mart ayında məktəbin VII sinif şagirdi Ayşən Babazadənin "Xalqımın milli geyimləri" nominasiyasında yüksək yer tutduğu məlum olub. Həmin ilin may ayının 28-30-u tarixlərində Türkiyənin Trabzon şəhərində qalibləri mükafatlandırma mərasimində Ayşən və məktəbin direktor müavini Turac İsgəndərova da iştirak edib.

Bundan sonra III layihəyə start verilib. Bu günlərdə isə Lahıc qəsəbə tam orta məktəbin şagirdləri layihədə iştirak etmək üçün sevindirici bir xəbər alıblar. Sloveniyanın Novo Qoritsa kitabxanası "Gənclik və media: mədəni irsimizin qorunması üçün video və foto sənədlər" layihəsi çərçivəsində aprelin 17-dən mayın 9-dək İkinci Dünya müharibəsinə həsr olunmuş səyyar sərgidə məktəbin iki şagirdinin iştirakı, 45 fotoşəkil və 17 dəqiqəlik videofilmin nümayişi olacaqdır. Sərginin əlaqələndiricisi professor V.Çrnivets bildirib ki, Sloveniya Xarici İşlər, Mədəniyyət nazirliklərinin və Lahıc qəsəbə tam orta məktəbinin şagirdləri tərəfindən hazırlanmış sərgi faşizm üzərində qələbə günü açılacaqdır. Məktəb direktorunun verdiyi məlumatda o da bildirilir ki, bu beynəlxalq sərgi  keçmiş Yuqoslaviya ölkələrindən biri Sloveniya torpaqlarında faşistlərlə mübarizə apararaq qəhrəmancasına həlak olan əfsanəvi "Mixaylo" Mehdi Hüseynzadənin əziz xatirəsinə həsr olunur. 

Ədalət DAŞDƏMİRLİ