"Mədəd-Azərbaycan" və "Microsoft-Azərbaycan" təşkilatlarının əməkdaşlığı çərçivəsində ümumi təhsil məktəblərində təhsilin keyfiyyətinin və müəllimlərin peşəkarlıq səviyyəsinin yüksəldilməsinə yönəlmiş "Həmkara dəstək" layihəsi üzrə təlimlərə başlanıb. Müvafiq təlimlər Bakı, Sumqayıt, Bərdə, Qax, Quba şəhərlərində keçirilir. Hazırda bu təlimlər Bakı şəhərində 7, 220 və 285 nömrəli tam orta məktəblərdə davam edir.

Məlumat üçün bildiririk ki, "Həmkara dəstək" layihəsi müxtəlif dünya ölkələrində həyata keçirilir və Azərbaycan bu şəbəkəyə qoşulan 50-ci ölkədir. "2008-2012-ci illərdə Azərbaycan Respublikasında təhsil sisteminin  informasiyalaşdırılmasi üzrə Dövlət Proqramı" çərçivəsində keçirilən layihənin əsas məqsədi müəllimləri fəallaşdırmaq, onlara metodiki məsləhətlər vermək və müasir texnologiyaların təlim və tədris prosesinə səmərəli tətbiqini təmin etmək üçün məktəblərdə dayaq nöqtələri, yəni həmkar müəllimlər hazırlamaqdır. "Həmkara dəstək" tədrisin və müəllimlərin peşəkarlıq səviyyələrinin yüksəldilməsinə yönəlmiş peşəkar inkişaf metodudur.

Təlimlər vasitəsilə həmkar müəllimlər məktəblərdə çalışan digər müəllimlərə informasiya və kommunikasiya texnologiyalarının təhsildə istifadəsi üzrə praktiki məsləhət və istiqamətlər verirlər. Bu isə son nəticədə təhsilin keyfiyyətinin artmasına səbəb olur. 

Yusif ƏLİYEV