ARDNŞ-nin Təqaüd Proqramı çərçivəsində xarici ölkələrdə təhsil alan tələbələr tərəfindən Azərbaycan həqiqətlərinin dünya ictimaiyyətinə çatdırılması və oxuduqları ali təhsil müəssisəsində Azərbaycana həsr olunmuş müxtəlif tədbirlər keçirmələri artıq ənənə halı almışdır.

Şirkətin mətbuat xidmətindən AzərTAc-a bildirmişlər ki, Fransanın "Audensiya Nant Menecment" məktəbində təqaüdçü Kənan Məmmədli "Azərbaycan günü" təşkil etmişdir. Tədbirdə dünyanın 30 ölkəsini təmsil edən tələbələr, habelə məktəbin müəllimləri iştirak etmişlər. Mərasim iştirakçılarına Azərbaycanın tarixi, iqtisadi inkişafı, ölkədə həyata keçirilən neft-qaz siyasəti, qazanılan uğurlar haqqında məlumat verilmişdir. Azərbaycanda həyata keçirilən layihələr və "Eurovision- 2012" mahnı müsabiqəsini əks etdirən müxtəlif videomateriallar nümayiş etdirilmişdir.

K.Məmmədli Ermənistan - Azərbaycan, Dağlıq Qarabağ münaqişəsi haqqında tədbir iştirakçılarına ətraflı məlumat vermiş, qonaqların bu mövzuda suallarını cavablandırmışdır. Tədbirin ikinci hissəsində mərasim iştirakçılarına Azərbaycan mətbəxinin nümunələri təqdim edilmişdir.