İyunun 1-də T.İsmayılov adına Uşaq-Gənclər Yaradıcılıq Sarayının "Uşaq dünyası" rəsm qalereyasında "Azərbaycanı sev və öyrən" turist-diyarşünaslıq ekspedisiyasının respublika baxış-müsabiqəsinin sərgisi və qaliblərin mükafatlandırılması mərasimi keçirilib. Tədbirdə Təhsil Nazirliyinin Tərbiyə və məktəbdənkənar müəssisələr şöbəsinin müdiri Ağababa İbrahimov, şöbənin aparıcı məsləhətçisi  Təranə Aslanova, Respublika Gənc turistlər və diyarşünaslıq mərkəzinin direktoru Alik Məmmədov və digər şəxslər iştirak edirdilər. Qeyd edək ki, Azərbaycan Respublikası Təhsil Nazirliyinin 2006-cı il tarixli, 744 nömrəli əmrinə əsasən "Azərbaycanı sev və öyrən" turist-diyarşünaslıq ekspedisiyasının respublika baxış-müsabiqəsi hər iki ildən bir keçirilir. "Azərbaycanı sev və öyrən" turist-diyarşünaslıq ekspedisiyası  "Bizim irs", "Azərbaycanın müstəqilliyinin qorunması", "Azərbaycan beynəlxalq aləmdə", "Azərbaycanın tikintiləri üzrə yürüşlərdə", "Təbiətin sirlərinə doğru", "İncəsənət aləmində" və "Kütləvilikdən turizm ustalığına" nominasiyaları üzrə keçirilib. Respublika baxış-müsabiqəsi rayon (şəhər) və respublika mərhələlərində təşkil olunub. Final mərhələsində 43 rayonun məktəbliləri, təhsil sistemində fəaliyyət göstərən 5 gənc turist və diyarşünaslıq mərkəzinin dərnək üzvləri iştirak ediblər. Qeyd olunan nominasiyalar üzrə final mərhələsinə albom, referat, maket, herbari, stend, qədim əşyalar, dekorativ tikmələr, inşa yazı, foto və rəsm olmaqla 450-dən çox iş təqdim edilib.

Tədbiri giriş sözü ilə açan Təhsil Nazirliyinin Tərbiyə və məktəbdənkənar müəssisələr şöbəsinin müdiri Ağababa İbrahimov  iştirakçıları salamlayaraq müsabiqənin əhəmiyyətindən söz açıb. Qeyd edib ki, müsabiqəni keçirməkdə məqsəd gənc nəslə doğma diyarı sevdirmək, onlara vətənpərvərlik hissləri aşılamaq, məktəblilər arasında turizm-diyarşünaslıq işini təbliğ etməkdir. Azərbaycanın qədim tarixə malik və füsunkar təbiəti olduğunu bildirən A.İbrahimov son illər respublikamızın turizm sektoruna göstərilən dövlət qayğısından danışıb. Hər bir şagirdin doğma yurdumuz haqqında məlumatlı olmasının vacibliyini qeyd edən A.İbrahimov bu yöndə aparılan işlərin əhəmiyyətini vurğulayıb.

Digər çıxış edənlər də müsabiqənin əhəmiyyəti haqqında fikirlərini bildiriblər.

Hər nominasiya üzrə I, II və III yerləri tutan qaliblər Təhsil Nazirliyinin diplom və hədiyyələri ilə mükafatlandırılıb. Xatirə şəkli çəkilib. 

Niyazi RƏHİMOV