Səbail Rayon İcra Hakimiyyətinin təşkilatçılığı ilə "Monte-Kristo" şadlıq sarayında   əlil və sağlamlığı məhdud olan, İcma əsaslı reabilitasiya mərkəzində xidmət göstərilən, müxtəlif uşaq evlərində tərbiyə alan, həmçinin  rayonun aztəminatlı ailələrinin uşaqları üçün əyləncəli bayram tədbiri keçirilmişdir. Tədbiri giriş sözü ilə açan Səbail Rayon İcra Hakimiyyətinin başçısı Asif Əsgərov burada iştirak edən bütün uşaqları və onların valideynlərini 1 iyun - Uşaqları Beynəlxalq Müdafiə Günü münasibəti ilə təbrik etmiş, onlara cansağlığı, xoşbəxt həyat və səadət arzulamışdır. Bu günün yaranma tarixi haqqında məlumat verən A.Əsgərov bildirmişdir ki, Azərbaycanda uşaqlar dövlət tərəfindən hərtərəfli diqqət və qayğı ilə əhatə olunmuşlar.

Qeyd olunmuşdur ki, Azərbaycanda uşaq siyasətinin əsası ümummilli lider Heydər Əliyev tərəfindən qoyulmuşdur. Azərbaycanlı uşaqlar hər il Heydər Əliyevlə olan görüşlərdə hədsiz sevinclə iştirak edir və böyük ilham alırdılar. Bu səmimi görüşlər hər bir uşağın yaddaşında əbədi iz qoymuşdur.

Ümummilli lider Heydər Əliyevin yaratdığı və nəsillər üçün miras qoyduğu ənənələr bu gün də uğurla davam etdirilir. Azərbaycan Prezidenti cənab İlham Əliyevin uşaq hüquqlarının müdafiəsi sahəsində atdığı addımlar, Heydər Əliyev Fondunun gördüyü işlər bu ənənələrin daim yaşayacağına və azərbaycanlı uşaqların taleyində əhəmiyyətli rol oynayacağına zəmanət verir. Ölkə başçısının 2009-cu ilin lUşaq ili» elan olunması ilə bağlı sərəncamı Azərbaycan dövlətinin uşaqlara sonsuz qayğısının bariz təzahürü sayılmalıdır.

Qeyd edilmişdir ki, Heydər Əliyev Fondunun fəaliyyəti  Azərbaycanın  gələcəyi olan uşaqlara yüksək qayğı nümunəsidir. Fondun "Yeniləşən Azərbaycana yeni məktəb" layihəsi əsasında ötən illər ərzində respublikamızın ən müxtəlif bölgələrində yüzlərlə müasir məktəb binası tikilib istifadəyə verilmiş, körpələr evi, uşaq bağçası və internat-məktəb əsaslı təmir olunmuşdur. Bu gün dövlətimiz hər bir azərbaycanlı uşağın yüksək sosial-mənəvi mühitdə böyüməsinə çalışır. Məqsəd uşaqların layiqli, firavan yaşayışının, təlim-tərbiyəsinin, təhsilinin, sosial müdafiəsinin, sağlamlığının yüksək səviyyədə təşkil edilməsidir.  

Tədbir tanınmış müğənnilərin ifasında konsert proqramı ilə davam etdirilmiş, sonda uşaqlara hədiyyələr paylanmışdır. 

Hicran ƏKBƏROVA