İyunun 14-də Azərbaycan Müəllimlər İnstitutunda 15 İyun - Milli Qurtuluş Günü münasibətilə "dəyirmi masa" keçirilmişdir. İnstitutun rektoru, Milli Məclisin deputatı, professor Aqiyə Naxçıvanlı tədbiri giriş sözü ilə açaraq, "dəyirmi masa"da iştirak edən professor-müəllim heyətini və tələbələri bayram münasibətilə təbrik etdi. Bildirildi ki, 1991-ci ildə, Azərbaycan müstəqillik əldə etdikdən sonra ölkədə daxili vəziyyət dözülməz həddə çatmış və hakimiyyət böhranı yaranmışdı. İctimai həyatın bütün sahələrində xaos, hərc-mərclik baş alıb gedirdi. Azərbaycan vətəndaş qarşıdurması ilə üz-üzə qalmışdı. O acınacaqlı vaxtda xalq Azərbaycanın görkəmli oğlu Heydər Əliyevi böyük təkidlə Naxçıvandan Bakıya dəvət etdi. Heydər Əliyevin 1993-cü ildə Azərbaycan rəhbərliyinə qayıdışı ilə ölkənin ictimai-siyasi, sosial-iqtisadi, elmi-mədəni həyatında, beynəlxalq əlaqələrdə dönüş yarandı, müstəqil dövlət quruculuğu prosesi başlandı. Ümummilli lider Heydər Əliyev çox qısa zamanda Azərbaycanda vətəndaş müharibəsinin qarşısını ala bildi.

Tədbirdə institutun tədris işləri üzrə prorektoru, professor Şamil Qasımlı, tərbiyə işləri üzrə prorektor, siyasi elmlər üzrə fəlsəfə doktoru Rəşad Sadıqov, dekan, dosent Telman Haqverdiyev, kafedra müdiri, professor Ramiz Məmmədzadə bu tarixi hadisə ilə bağlı öz fikirlərini bölüşdülər. Çıxış edənlər 1990-cı illərin əvvəllərində gənc respublikamızda rəhbərliyə yiyələnmək üçün ayrı-ayrı şəxslər və qruplar arasında gedən mübarizə və 1993-cü il iyunun 15-də ümummilli lider Heydər Əliyevin Azərbaycan Respublikası Ali Sovetinin sədri seçilməsini şərtləndirən amillər haqqında ətraflı danışdılar. Onlar tələbələri maraqlandıran çoxsaylı sualları cavablandırdılar.

Tələbələrdən Nərmin Ərəbli "Azərbaycan xalqının ümummilli lideri Heydər Əlirza oğlu Əliyevin həyat və fəaliyyəti haqqında", Türkan Abdullayeva "Ümummilli lider Heydər Əliyev müstəqil Azərbaycanın qurucusudur", İlkin Əsgərov "Heydər Əliyev və Azərbaycan gəncliyi" mövzularında məruzə ilə çıxış etdilər. Tədbirin sonunda ulu öndər Heydər Əliyevin həyat və fəaliyyətini əks etdirən film nümayiş olundu.