İyunun 12-də  Bakıda fəaliyyət göstərən  Misir Mədəniyyət Mərkəzinin  dəstəyi, Bakı Rəsm Qalereyası və "Esmeralda" Uşaq və Yeniyetmə  Yaradıcılıq Studiyasının  təşəbbüsü ilə "Dürrə ağacı" adlı rəsm sərgisi keçirilib. Azərbaycan Rəssamlar İttifaqının Vəcihə Səmədova adına sərgi salonunda  baş tutan sərgidə 100-dən artıq əsər nümayiş etdirilib. Əsərlər  azərbaycanlı və misirli uşaq və yeniyetmələrə məxsus olub. 25 azərbaycanlı və 15 misirli rəssamın iştirak etdiyi sərgidə hər iki ölkənin tarixi keçmişini, milli bayramlarını, memarlıq abidələrini əks etdirən yağlı və sulu boya, qarışıq texnika üslubunda çəkilən əsərlər təqdim edilib. Sərgi iştirakçılarına diplomlar, hədiyyələr və sərgini özündə əks etdirən rəngli kataloqlar təqdim olunub.

Sifai SƏFƏROVA