Oktyabrın 2-də Bakı Dövlət Universitetində (BDU) "Qloballaşma şəraitində elm və təhsil sahəsində inteqrasiya prosesləri" mövzusunda tədbir keçirilmişdir.

AzərTAc xəbər verir ki, Böyük Britaniya, Misir, Latviya Qırğızıstan və digər ölkələrdən olan nümayəndələrin, alim və mütəxəssislərin, təhsil işçilərinin, tələbələrin iştirak etdikləri tədbirdə BDU-nun rektoru, Milli Məclisin deputatı, akademik Abel Məhərrəmov bildirmişdir ki, böyük Azərbaycan şairi və mütəfəkkiri Nizami Gəncəvinin 870 illik yubileyi münasibətilə ölkəmizdə keçirilən mərasimlərə dünyanın müxtəlif ölkələrindən çoxlu sayda qonaqlar qatılmışlar. Onlardan bir neçəsi BDU-da keçirilən bu tədbirdə də iştirak edir.

Müasir dünyada elmin, təhsilin mühüm rolundan danışan rektor ulu öndər Heydər Əliyevin bu sahəyə daim böyük önəm verdiyini, müdrik şəxsiyyətin ideyalarının Azərbaycan Prezidenti İlham Əliyev tərəfindən uğurla həyata keçirildiyini vurğulamışdır.

Bakı Dövlət Universitetində təhsilin inkişafı üçün həyata keçirilən tədbirlərdən, qazanılan nailiyyətlərdən bəhs edən akademik A.Məhərrəmov BDU-nun beynəlxalq əlaqələrinin genişləndiyini də diqqətə çatdırmışdır.

Müasir qloballaşma şəraitində təhsilimizin dünya təhsil sisteminə inteqrasiya olunduğunu deyən rektor Azərbaycan Prezidenti İlham Əliyevin "Qara qızılı insan kapitalına çevirmək" kəlamını xatırlatmışdır.

Akademik A.Məhərrəmov BDU-nun elm və təhsil sahəsində inteqrasiya prosesində iştirakından, bu sahədə əldə edilən uğurlu nəticələrdən də danışmışdır.

Latviyanın sabiq prezidenti, BMT Baş katibinin xüsusi elçisi, Avropa İttifaqının uzunmüddətli inkişaf proqramının vitse-prezidenti Vaira Vike-Freiberga elm, təhsil sahəsində inteqrasiya prosesləri və müvafiq sahənin inkişafı ilə bağlı fikirlərini söyləmişdir.

Misirin İsgəndəriyyə Kitabxanasının direktoru, BMT Baş katibinin Sivilizasiyalar Alyansı üzrə səfiri İsmayıl Seragəldin, Qırğız Respublikasının sabiq prezidenti Roza Otunbayeva, YUNESKO və Beynəlxalq Telekommunikasiya Birliyinin komissarı, St Galan və Lugano universitetlərinin professoru Valter Füst elm, təhsil sahəsində əlaqələrin genişləndirilməsinin, təcrübə mübadilələrinin aparılmasının əhəmiyyətindən bəhs etmişlər.

Böyük Britaniyanın Oksford Universiteti Linkoln Kollecinin rəhbəri Baronessa Susan Greenfield müasir dünyada yeni elmi nailiyyətlərin, texnologiyaların rolundan, elmin, təhsilin tərəqqisi üçün bütün imkanların yaradılmasının vacibliyindən danışmışdır.

Sonra BDU ilə İsgəndəriyyə Kitabxanası arasında əməkdaşlığa dair müqavilə imzalanmışdır.

Qonaqlar Bakı Dövlət Universitetinin laboratoriyaları, tədris şəraiti ilə tanış olmuşlar.