Azərbaycan Müəllimlər İnstitutunun komandası Peyntbol üzrə ali təhsil müəssisələrinin tələbələri arasında keçirilmiş II Respublika yarışında 2-ci yeri tutub. AMİ-nin komandası beş nəfərdən - İkram Quliyev, Müşfiq Bayramov, Ramil Balayev, Həsən Nərimanov və Səfa Səfərovdan ibarət olmuşdur. Bildirək ki, yarış sentyabrın 26-27-də Bakı şəhəri Biləcəri qəsəbəsində yerləşən Respublika Stend Atıcılığı İdman Kompleksində keçirilmişdir. Yarışa 12 ali təhsil müəssisəsinin tələbələrindən ibarət komandalar qatılmışdır.

Əsas məqsədi tələbələr arasında hərbi vətənpərvərlik hisslərinin gücləndirilməsi, gənclərin asudə vaxtının səmərəli təşkil, onlar arasında sağlam həyat tərzinin təbliğ edilməsi, respublikamızda gənclər arasında peyntbolun bir idman növü kimi inkişaf etdirilməsindən ibarət olan turnir 2010-cu ildən Gənclər və İdman Nazirliyi və Azərbaycan Tələbə Gənclər Təşkilatları İttifaqının birgə təşkilatçılığı ilə keçirilir.

Oktyabrın 1-də yarışın qalibləri, o cümlədən 2-ci yeri tutan Azərbaycan Müəllimlər İnstitutunun komandası Gənclər və İdman Nazirliyinin fəxri fərmanları və hədiyyələrlə mükafatlandırılmışlar.