Azərbaycanın Qarsdakı baş konsulluğundan bildirmişlər ki, baş konsul Ayxan Süleymanov və Qars valisi Eyüp Tepe liseyin binasında inşaat işlərinin gedişi ilə tanış olmuşlar. İnşaat şirkətinin nümayəndələri 32 sinif, geniş toplantı zalı, kitabxana və idman meydançasından ibarət olacaq liseyin binasında aparılan işlər haqqında ətraflı məlumat vermişlər.

A.Süleymanov vurğulamışdır ki, Azərbaycan Dövlət Neft Şirkətinin Qarsın Yenişehir məhəlləsində inşa etdirdiyi bu lisey gələn il istifadəyə veriləcəkdir. Bu təhsil ocağı güclü iqtisadiyyatı olan Azərbaycanın Türkiyənin Qars şəhərində yaşayan qardaşlarımıza daha bir hədiyyəsi olacaqdır.

Vali E.Tepe təməlini Türkiyənin Baş naziri Rəcəb Tayyib Ərdoğanın qoyduğu Heydər Əliyev adına Liseyin türk dünyasının dahi şəxsiyyətinin adını daşıdığını, onun "Bir millət, iki dövlət" müdrik kəlamına uyğun olaraq getdikcə güclənən qardaşlıq əlaqələrimizin daha bir simvolu olduğunu söyləmişdir. 

AzərTAc