Heydər Əliyev Fondunun vitse-prezidenti Leyla Əliyeva tərəfindən 2011-ci il iyulun 11-də başlanmış Ətraf Mühitin Mühafizəsi üzrə Beynəlxalq Dialoq Təşəbbüsü - IDEA növbəti ölkə miqyaslı ekoloji maarifləndirmə layihəsini uğurla başa çatdırmışdır.

AzərTAc xəbər verir ki, 2012-ci il sentyabrın 24-də başlanmış "IDEA Yaşıl Azərbaycan naminə" layihəsi dörd həftə davam etmişdir. Əvvəlcədən nəzərdə tutulduğu kimi, dörd istiqamətə səfər edən yaşıl təlimçilər hər həftə beş rayonda təlim keçmişlər. Azərbaycanın 20 rayon və şəhərini əhatə edən layihə çərçivəsində ümumilikdə 40 məktəbdə seminarlar təşkil edilmişdir.

"IDEA Yaşıl Azərbaycan naminə" layihəsinin başa çatması ilə əlaqədar oktyabrın 24-də "Trend" informasiya agentliyində mətbuat konfransı keçirilmişdir. Mətbuat konfransında layihə çərçivəsində görülmüş işlər haqqında ətraflı məlumat verilmiş, fəallar mükafatlandırılmışlar.