Oktyabrın 20-də Bakı Biznes Mərkəzində İqtisadi İnkişaf Nazirliyinin təşkilatçılığı ilə xaricdə təhsil almış gənclər üçün əmək yarmarkası keçirilmişdir.

Tədbirdə çıxış edən iqtisadi inkişaf nazirinin müavini Sevinc Həsənova "2007-2015-ci illərdə Azərbaycan gənclərinin xarici ölkələrdə təhsili üzrə Dövlət Proqramı" çərçivəsində hər il yüzlərlə gəncin müxtəlif ölkələrin aparıcı təhsil müəssisələrində oxuduğunu bildirmişdir. Qeyd edilmişdir ki, xaricdə təhsil almış gənclərin işlə təmin olunması daim diqqət mərkəzindədir. Bugünkü əmək yarmarkasının da məhz buna xidmət etdiyini deyən nazir müavini tədbir barədə ətraflı danışmışdır.

Təhsil nazirinin müavini Qulu Novruzov Azərbaycanda həyata keçirilən təhsil siyasəti, ölkə gənclərinin xaricdə təhsil alma imkanlarının genişləndirilməsi istiqamətində görülən işlər, gənclər və idman nazirinin müavini İntiqam Babayev uğurlu gənclər siyasətinin prioritetləri, Azərbaycan Respublikasının Prezidenti yanında Dövlət Qulluğu Məsələləri üzrə Komissiyanın sədr müavini Vəfadar Misirov dövlət qulluğuna qəbul və bu sahədə yaradılan imkanlar, Azərbaycan Respublikası Sahibkarlar (İşəgötürənlər) Təşkilatları Milli Konfederasiyasının (ASK) prezidenti Məmməd Musayev gənclərin sahibkarlığın inkişafında rolundan bəhs etmişlər.

İştirakçı şirkətlər gənclərə mövcud vakant yerlər barədə məlumat vermiş, maraq göstərən məzunların müraciətləri qəbul olunmuşdur.

Tədbirdə iqtisadiyyatın müxtəlif sahələrində (neft-qaz, enerji, sənaye, kənd təsərrüfatı, tikinti, nəqliyyat, rabitə, informasiya texnologiyaları, bank-maliyyə, turizm və s.) fəaliyyət göstərən 50-yə yaxın nüfuzlu yerli və xarici şirkətin nümayəndələri iştirak etmişlər.

AzərTAc