Azərbaycan Respublikasının təhsil naziri, professor Misir Mərdanovun rəhbərliyi ilə hazırlanmış "Təhsil qanunvericiliyinə dair normativ-hüquqi sənədlər toplusu" ikicildliyi cari ilin oktyabrında Bakı "Şərq-Qərb" Nəşriyyat Evi tərəfindən çap edilmişdir.  Müstəqilliyimizin iyirmi ili ərzində təhsil qanunvericiliyinin yaradılması, təkmilləşdirilməsi istiqamətində çox mühüm addımlar atılmış, 400-ə yaxın normativ-hüquqi akt, 16 Dövlət Proqramı və inkişafyönlü layihə qəbul edilmişdir. 

Son iyirmi ildə təhsil sahəsində fəaliyyətin hüquqi tənzimlənməsi, təhsilin keyfiyyətcə müasir səviyyəyə yüksəldilməsi, maddi-texniki bazanın gücləndirilməsi, məzmun islahatları, yeni dərslik və qiymətləndirmə siyasəti, əmək bazarının tələblərinə uyğun kadr hazırlığı və təminatının yaxşılaşdırılması, təhsil sisteminin informasiyalaşdırılması, məktəbəqədər, ümumi, ilk peşə-ixtisas, orta ixtisas, ali təhsil, xüsusi təhsil, xaricdə təhsil, istedadlı uşaqlarla iş, de-institutlaşdırma və s. sahələrdə fəaliyyətin tənzimlənməsini təmin edən mükəmməl normativ-hüquqi baza yaradılmışdır.

Bu sənədlər təhsil tariximizin tərkib hissəsi olmaqla bərabər, eyni zamanda müstəqillik illərində təhsilimizin inkişafını əks etdirir. Əminik ki, toplu təhsil müəssisələrinin, təhsili idarəetmə orqanlarının rəhbərləri, eləcə də təhsil qanunvericiliyi ilə bağlı istənilən məlumatı əldə etmək istəyən hər bir vətəndaş üçün faydalı bir mənbə olacaqdır.

Birinci cildə təhsil sisteminə aid ümumi xarakterli, ali və orta ixtisas təhsili sahəsində fəaliyyətin tənzimlənməsini təmin edən normativ-hüquqi sənədlər daxil edilmişdir.  İkinci cilddə toplanmış sənədlər isə məktəbəqədər, ümumi, ilk peşə-ixtisas və məktəbdənkənar müəssisələrin fəaliyyəti ilə bağlı normativ-hüquqi sənədlərdir.

Topluya Azərbaycan Respublikasının Konstitusiyasından, Əmək Məcəlləsindən və "Azərbaycan Respublikasında dövlət dili haqqında" Azərbaycan Respublikasının Qanunundan çıxarışlar, "Təhsil haqqında", "Sağlamlıq imkanları məhdud şəxslərin təhsili (xüsusi təhsil) haqqında" və "Uşaq hüquqları haqqında" Azərbaycan Respublikasının qanunları isə tam həcmdə daxil edilmişdir.

Burada həmçinin Azərbaycan Respublikası Prezidentinin 12 fərmanı, 21 sərəncamı, Nazirlər Kabinetinin 100 qərarı, 11 sərəncamı və Təhsil Nazirliyinin 21 əmri öz əksini tapmışdır.