Dərin elm, bilik və savada, geniş dünyagörüşə malik intellektual vətəndaşların yetişdirilməsi zamanın tələbidir. Bütün sahələrdə olduğu kimi, təhsil sahəsində də  müasir dövrün tələbinə uyğun xeyli işlər görülür. Azərbaycan təhsilinin inkişaf səviyyəsi getdikcə  yüksəlir. İndi təhsilimizin məzmununun milli və bəşəri dəyərlər əsasında formalaşması, yeni pedaqoji texnologiyaların mənimsənilməsi, pedaqoji prosesin təhsil islahatı prinsipləri üzərində qurulması, müəllimin peşəkarlığının artması, elmi-pedaqoji, metodik ədəbiyyatların nəşri, tələbələrin, şagirdlərin tədqiqatçılığının fəal və interaktiv təlim metodları ilə tənzimlənməsi buna əyani sübutdur.

"Təhsil millətin gələcəyidir" söyləyən ümummilli lider Heydər Əliyev daim təhsilə və təhsil işçilərinə böyük diqqət və qayğı göstərmişdir. Ulu öndərin təşəbbüsü və rəhbərliyi ilə həyata keçirilən təhsil sahəsindəki islahatlar  hazırda Prezident cənab İlham Əliyev tərəfindən uğurla davam etdirilir. Milli təhsilimiz  məzmun baxımından yeniləşir,  bu sahədə islahatlara dövlət təminatı gündən-günə artır. Ölkəmizin bütün bölgələrində olduğu kimi, Beyləqan rayonunda da təhsilimiz inkişaf edir. Müxtəlif vəsaitlərin məktəblərə pulsuz verilməsi, məktəblərin kompüterlə təminatı və İnternet şəbəkəsinə qoşulması daha çox informasiya və bilik əldə etməyimizə xidmət edir. Hər il Azərbaycan Respublikasının Prezidenti cənab İlham Əliyevin müvafiq sərəncamı ilə "Ən yaxşı ümumtəhsil məktəbi" və "Ən yaxşı müəllim" müsabiqələri Təhsil Nazirliyi tərəfindən uğurla həyata keçirilir. Qalib məktəblər və müəllimlər  mükafatlandırılırlar. Bu gün Azərbaycanda gənclər siyasəti dövlət siyasətinin mühüm tərkib hissəsidir. Azərbaycan gəncliyi ictimai həyatın bütün sferalarında aktiv fəaliyyəti ilə seçilir və siyasi, iqtisadi, humanitar, sosial tədbirlərin həyata keçirilməsində mühüm rol oynayır. Dövlətin gənclərin fəaliyyəti üçün yaratdığı geniş imkanlar nəticəsində  onlar cəmiyyətin avanqard qüvvəsinə çevrilib. Biz müəllimlər  təhsili cəmiyyətin, vətəndaşın, təhsil alanın və ən əsası, gənclərin tələbatına və ehtiyaclarına uyğun qurmalı, onların şəxsiyyət kimi formalaşması üçün bütün  qüvvəmizi səfərbər etməliyik. Hər bir müəllim özünün gündəlik fəaliyyətini düzgün qurmalıdır. Bunun üçün məkanından asılı olmayaraq biz müəllimlər hər gün öyrənməli və ən əsası öyrəndiklərimizi öyrətməyi bacarmalıyıq. Mən bütün həmkarlarıma deyirəm: Gəlin məktəbdə zamanın, mühitin, şagirdlərin psixomotor tələbatına uyğun hərəkət edək.  Bu yerdə Sədi Şirazinin müəllimlə bağlı bir fikrini qeyd etmək istəyirəm:  Bir gün bir şah oğlunun təhsil alması üçün onun əlindən tutub mədrəsəyə gətirir və gümüş lövhəyə qızıl hərflərlə yazır: "Mən valideynlərimin nəvazişindən çox, müəllimlərimin tələbinə borcluyam". Biz bu tələblərlə yanaşı, məktəbdə şagirdlərlə psixoloji,  fəlsəfi və s. söhbətlər aparmaqla mükəmməl, intellektual şəxsiyyətin yetişməsinə nail olmalıyıq. Bunu  bizim cəmiyyətimizin, dövlətimizin  inkişaf strategiyası tələb edir. 

Elvin ABBASOV,
Beyləqan rayonu,
akademik  M.Mehdizadə adına 3 nömrəli
tam  orta məktəbin coğrafiya müəllimi