Bakıdakı 167 nömrəli tam orta  məktəbin pedaqoji kollektivi  təlim-tərbiyəni yüksək səviyyədə qurmaq, qarşıya qoyulan vəzifələri uğurla həyata keçirmək üçün ciddi səylə  çalışır.

Məktəbin direktoru Vaqif Quliyev  bildirir ki, təhsil ocağında dərsin  təkmilləşdirilməsi ilə  əlaqədar metodiki işlərə geniş yer verilir. Metodiki iş  "Təlim və tərbiyə metodlarını həyatın tələblərinə müvafiq quraq" və  "Yaradıcılıqla  işləyən   müəllimdən yaradıcılıqla işləyən kollektivə" devizləri altında aparılır. Metodiki iş dərsin təkmilləşdirilməsinə, proqram materiallarının şagirdlər tərəfindən dərindən mənimsənilməsinə kömək etməklə bərabər, həm də  müəllimlərin vaxtaşırı fikir mübadiləsi aparmasına, müzakirələr şəklində şəxsi  fikirlərini həmkarlarına çatdırmaq üçün geniş  meydan  açılmasına şərait yaradır.

Hazırda məktəbdə ayrı-ayrı fənlər üzrə  metodbirləşmə sədrləri   tərəfindən "açıq dərs"lərin  təşkili, aktual məsələlərlə  bağlı qabaqcıl müəllimlərin çıxışı, seminar və konfransların keçirilməsi planlaşdırılır. Pedaqoji kollektiv çalışır ki, məktəbdə metodiki  işin təşkili yeni işə başlayan gənc müəllimlər üçün daha faydalı olsun.  

Şakir CƏFƏROV