Azərbaycan Respublikasının Prezidenti yanında Dövlət İdarəçilik Akademiyasında (DİA) "Azərbaycan Respublikasında gənclər siyasəti" istiqaməti üzrə qısamüddətli ixtisasartırma kursu keçirilmişdir.

DİA-dan AzərTAc-a bildirmişlər ki, gənclər ilə iş aparan mərkəzi və yerli icra hakimiyyəti orqanlarının rəhbər işçilərinin cəlb edildiyi kurs "Gənclər siyasətinin metodologiyası və hüquqi təminatı", "Gənclər siyasətinin təşkilati əsasları" və "Gənclərin sosial problemləri" modullarından ibarət olmuşdur.

Kursda DİA-nın rektoru, akademik Urxan Ələkbərov, gənclər və idman nazirinin müavini İntiqam Babayev, təhsil nazirinin müavini Qulu Novruzov, DİA-nın birinci prorektoru Əlikram Abdullayev və digər dövlət və qeyri-hökumət təşkilatlarının nümayəndələri Azərbaycan Respublikasının gənclər siyasətinin müasir problemlərinə dair müxtəlif mövzularda mühazirələr ilə çıxış etmişlər.

Kursun buraxılış mərasimi keçirilmişdir. Kursu müvəffəqiyyətlə bitirənlərə sertifikatlar təqdim olunmuşdur.

Akademik U.Ələkbərov onlara uğurlar arzulamışdır.