"İrəli" İctimai Birliyi (İB) xarici dillər mərkəzinin layihələri uğurla davam edir. İB-dən AzərTAc-a bildirmişlər ki, mərkəz tərəfindən təşkil olunan yunan, italyan, alman və yapon dilləri kursları hazırda uğurla davam edir. Kurslar "İrəli"nin üzvləri tərəfindən təmənnasız tədris olunur. İştirakçılara, həmçinin ölkələrin tarixi, mədəniyyəti haqqında ətraflı məlumat verilir və müxtəlif diskussiyalar aparılır.

Bununla yanaşı, müvafiq dil kurslarında iştirak edən gənclər mütəmadi olaraq "Movie Club" layihəsi çərçivəsində həmin dildə təşkil olunan filmlərin nümayişində iştirak edərək dil biliklərini təkmilləşdirir, eyni zamanda asudə vaxtlarını səmərəli keçirirlər.

Hər həftənin sonunda "Conversation Club" layihəsi çərçivəsində rus, ingilis və yapon dillərində təşkil olunan söhbətlərdə gənclər xarici dillərdə ünsiyyət quraraq aktual mövzular ətrafında müzakirələr aparır və həmyaşıdları ilə fikir mübadiləsində iştirak edirlər. Yapon dilində təşkil olunan danışıq dərslərini isə Yaponiyanın ölkəmizdəki səfirinin xanımı Atsuko Vatanabe aparır.

Yaxın vaxtlarda "İrəli" İB xarici dillər mərkəzi tərəfindən yeni dillərin tədrisi ilə bağlı və gənclərin xarici dilləri daha mükəmməl mənimsəməsinə kömək edəcək yeni layihələr, müsabiqələr keçiriləcək, xarici qonaqlarla görüşlər təşkil olunacaqdır.