Dünyanın hər tərəfində  müəllimlər insan cəmiyyətinin ən fədakar və möhtərəm üzvləridir. Müəllimlər sözün əsl mənasında gənc nəsillərə, eləcə də cəmiyyətdə örnək sayılır. Belə müəllimlərdən biri də Bakıdakı 207 nömrəli tam orta məktəbin ibtidai sinif müəllimi Zemfira Məmmədovadır. Milli Kurikulumu uğurla tətbiq edən Zemfira müəllim məktəbdə müxtəlif mövzularda treninqlər keçirir. Bu treninqlərdə sinif müəllimləri, valideynlər qarşısında müxtəlif mövzularda çıxışlar edir, kurikulum əsasında dərs nümunələri nümayiş etdirir. O, məktəbdə habelə "İbtidai siniflərdə kurikulumların tətbiqi yolları" mövzusunda seminar aparmışdır. Həmin seminarda fəal iştirakına görə məktəb rəhbərliyi tərəfindən fəxri fərmanla təltif olunmuşdur. Onun təşkilatçılığı ilə məktəbdə keçirilən "Doğma Azərbaycan dilim", "Dünyanı xilas edək", "Sülhə gəlin, ey insanlar" mövzularında layihələr müəllim və şagirdlərin dərin marağına səbəb olmuşdur. Zemfira Məmmədova "İbtidai siniflərdə şagirdlərin asudə vaxtını necə təşkil etməli", "Uşaqlar bizim gələcəyimizdir" kimi kitabların müəllifidir.

Hazırda ibtidai siniflərdə dərslərini fəal təlim əsasında quran Z.Məmmədova müxtəlif metodlardan, o cümlədən debatlardan, diskussiyalardan, qruplarla, cütlərlə işlərdən, əqli hücum, klaster, Venn diaqramı, BİBÖ, didaktik oyunlardan və digər yaradıcı işlərdən geniş istifadə edir. İnteraktiv metodlar təlim prosesində öyrənməni, bacarıq və keyfiyyətlərə şagirdlərin yiyələnməsini asanlaşdırır, onlarda fəallıq yaradır.

Zemfira müəllim şagirdlərinin vətənpərvərlik ruhunda tərbiyə olunmasına xüsusi diqqət yetirir, bunun üçün onlarla milli qəhrəmanlarımızın həyatına, keçdikləri mübarizə, döyüş yoluna dair söhbətlər aparır, sinifdənxaric maraqlı tədbirlər təşkil edir. 

Miryasin SEYİDOV,
"Qızıl qələm" mükafatı laureatı