Dekabrın 18-də Bakı şəhər bağça-məktəb-lisey kompleksində "Məktəb uşağın dostudur" layihəsi çərçivəsində "Kurikulumun tətbiqi vəziyyəti" ilə bağlı "açıq dərs"lər keçirildi. Dərslər yeni fənn kurikulumlarının tətbiq olunduğu ibtidai və beşinci siniflər olmaqla təhsil müəssisəsinin 14 sinfində təşkil edilmişdi.  Tədbirdə Təhsil Nazirliyinin Monitorinq və qiymətləndirmə şöbəsinin müdiri Təranə Hacıyeva, Təhsil Problemləri İnstitutunun Kurikulum Mərkəzinin direktoru Ənvər Abbasov, Azərbaycan Valideyn-Müəllim Assosiasiyası İctimai Birliyinin icraçı direktoru Təranə Şərifova, Bakı Şəhəri üzrə Təhsil İdarəsi müdirinin müavini Hüseyn Əsgərov, BSTİ-nin Metodik Mərkəzinin direktoru Vahid Qurbanov, mərkəzin əməkdaşları, məktəb direktorları, ayrı-ayrı məktəblərin ibtidai sinif və fənn müəllimləri, valideynlər və başqaları iştirak edirdilər. Təhsil ocağının direktoru Qafar Hüseynov qonaqları qarşılayaraq onları burada görməsindən məmnun olduğunu bildirdi və "açıq dərs"ləri dinləmək üçün sinif otaqlarına dəvət etdi.  Qonaqlar və məktəbin müəllimləri öz arzularına uyğun iştirak etmək istədikləri sinifləri seçdikdən sonra zəng çalındı və dərslər başlandı. Biz riyaziyyat müəllimi Faiq Əliyevin V c sinfində keçdiyi "açıq dərs"də iştirak etdik.

Dərsin mövzusu "Onluq kəsrlər" idi. Dərsdə fəal təlimin böyük və kiçik qruplarla iş formasından, BİBÖ, beyin həmləsi, müzakirə, müqayisə, işgüzar səs-küy üsullarından, müxtəlif resurslardan - onluq və adi kəsr kartları, kəsrlərə uyğun modellər, mərtəbə vahidləri kartları və işçi vərəqlərdən istifadə olundu, Azərbaycan dili və informatika fənləri ilə inteqrasiya yaradıldı. Qiymətləndirmə vasitəsi kimi çalışmalardan istifadə olundu tapşırıqvermə üsulu ilə qiymətləndirmə aparıldı.

Dərsdə qarşıya qoyulmuş məqsədə (şagirdlərin məxrəcləri 10, 100 və s. olan adi kəsrləri onluq kəsr şəklində, onluq kəsrləri ekvivalent formalarda (standart şəkildə, mərtəbə qiymətlərinin cəmi ilə, sözlə və s.) yazmağı, bu kəsrləri şəbəkə üzərində modelləşdirməyi bacarmaları) nail olundu.

Müəllim dərsə başlamazdan əvvəl lövhədə BİBÖ cədvəli çəkdi (biz artıq nəyi bilirik, biz nəyi bilmək istəyirik, biz nə öyrəndik və hələ nə öyrənməliyik). "Açıq dərs" V c sinfinin kiçik qruplar şəklində 4 komandaya ayrılmış şagirdlərinin qonaqları salamlaması ilə başladı. Dərsin birinci - motivasiya mərhələsində müəllim problemin qoyulması məqsədilə şagirdlərə "Kəsrlər haqqında nələri bilirsiniz?" sualı ilə müraciət etdi. Şagirdlərin verdiyi cavablar "Bildiklərimiz" qrafasında yazıldı.

Cədvəlin orta qrafasını doldurmaq üçün növbəti sual verildi: "Kəsrlər haqqında daha nələri bilmək istərdiniz?". Fikir mübadiləsindən sonra aydın oldu ki, şagirdlər vergülün köməyilə yazılan kəsrlər haqqında bilmək istəyirlər. Bununla da dərsin mövzusu elan edildi. "Öyrəndiklərimiz" qrafasını doldurmaq üçün müəllim sinifdə frontal sorğu apardı və cavablar cədvəldə qeyd olundu.

Beləliklə, dərsin tədqiqat sualı yarandı: "Məxrəci 10, 100, 1000 və s. olan kəsrləri hansı formalarda yazmaq olar?".

Tədqiqatın aparılması mərhələsində hər qrupa işçi vərəqləri paylandı və şagirdlər 12 dəqiqə ərzində verilən tapşırıqları yerinə yetirməyə başladılar. Məlumat mübadiləsi mərhələsində liderlərin təqdimatları lövhədən asıldı. Bu təqdimatlardakı əsas faktlar və ideyalar xüsusi diqqətə çatdırılaraq qeyd edildi.

Növbəti mərhələdə təqdimatların nəticələrini müzakirə etmək üçün şagirdlərə Blum taksonomiyası üzrə qurulmuş suallarla müraciət olundu.

Nəticə və ümumiləşdirmə mərhələsində müəllim diqqəti tədqiqat sualına yönəldərək şagirdlərin cavablarını ümumiləşdirdi və alınan nəticəyə aid hazır nümunələr lövhədə yazıldı. Yaradıcı tətbiqetmə mərhələsində beşincilərə işçi vərəqləri paylandı. Şagirdlərin tapşırıqları yerinə yetirmə səviyyəsi və dərsdəki fəaliyyətlərinə görə cədvəldə verilmiş meyarlara əsasən (tədqiqat, təqdimat, tətbiqetmə, əməkdaşlıq, dinləmə mədəniyyəti, yekun) formativ qiymətlənləndirmə aparıldı. Dərsin sonunda ev tapşırığı verildi.

"Açıq dərs"lər başa çatdıqdan sonra geniş müzakirə aparıldı. Müəllimlərə yeni fənn kurikulumlarının tətbiqi, xüsusilə formativ qiymətləndirmənin aparılması ilə bağlı zəruri məsləhət və tövsiyələr verildi. Çıxışlarda tarix müəllimi Aynur Qurbanovanın V sinifdə "Gülüstan qalası, yoxsa Azərbaycan" mövzusunda dərsi yüksək səviyyədə keçdiyi xüsusi qeyd olundu. 

Hicran ƏKBƏROVA