Ölkəmizdə gənc nəslin bilikli, vətənpərvər, milli dəyərlərə hörmət edən şəxsiyyət kimi yetişməsində müəllimin üzərinə böyük məsuliyyət düşür. Hər bir müəllimin təhsil haqqında öz düşüncəsi, öz ideyası olmalıdır.

Mənim təhsildə ideyam öyrənməyi öyrənən, öyrəndiklərini həyata tətbiq edə bilən, yeni təfəkkürə malik şəxsiyyət yetişdirməkdir. Dərslərimi fənn kurikulumlarının tələbləri səviyyəsində qurur, yeni təlim texnologiyalarından istifadə edərək şagirdlərin maraq və meyllərini inkişaf etdirirəm.

Təlimdə şagirdlərin fərdi xüsusiyyətləri maksimum dərəcədə nəzərə alınmalıdır. Hər bir şagirdin dərketmə qabiliyyətinin, fəallığının, meyl və marağının, bacarığının inkişafı üçün əlverişli imkanların yaranmasında fərdi yanaşmanın rolu böyükdür. Təlimin fərdiləşdirilməsi tədris fəaliyyətinin şagirdin xüsusiyyətlərinə və imkanlarına, inkişaf səviyyəsinə uyğun təşkil olunmasını nəzərdə tutur.

Şagirdin bir şəxsiyyət kimi formalaşmasında fəal təlimin və dərsdənkənar tədbirlərin rolu böyükdür. Belə ki, fəal təlimdə fərdi, cütlərlə, böyük və kiçk qruplarla iş formalarından, "beyin həmləsi", "rollu oyunlar" kimi üsullardan istifadə zamanı şagirdlər daha inamlı və fəal olurlar. Tədbirlərdə rolları ifa edən zaman şagirdin şifahi nitq qabiliyyəti inkişaf edir.

Kurikulum islahatının vacibliyi təhsil prosesində iştirak edən hər bir ziyalıya  məlumdur. Təhsil sahəsində gedən proseslərə biganə qalmır, öz əməli işimlə onun iştirakçısı olmağa cəhd edirəm. Çünki təhsildə gedən islahatlar yeni təlim texnologiyalarından yararlanmağı tələb edir. Buna görə də mən hər zaman öz üzərimdə işləməyə, dərslərin tədrisində böyük dönüş yaratmağa, kurikulum standartlarına cavab verə biləcək pedaqoji və metodik yanaşmalara, yeni metodik düşüncə tərzinə yiyələnməyə çalışıram.

Şagirdlərimə bilik verməklə yanaşı, onların mənəvi və psixoloji cəhətdən kamil, iradəli olmalarına səy göstərirəm.

Gələcəkdə də gənc nəslin hərtərəfli inkişafı üçün əlimdən gələni edəcəyəm. 

Nurlana HÜSEYNOVA,
Bakıdakı 20 nömrəli məktəb-liseyin
 ibtidai sinif müəllimi