Hər il olduğu kimi, bu il də məktəbimizdə "Xəlifə günü" keçirildi. Məktəbin fəal şagirdləri müəllimləri bir günlük əvəz etdilər. Direktor müavinləri fəal şagirdlərdən seçildilər. Mən həmin gün coğrafiya fənnini daha çox sevən, maraq göstərən, bilik yarışlarında yer tutan şagirdlərimdən biri olan Manaf Mürəlovun bu fəndən dərs aparmasını təklif etdim. Bu onun ürəyincə oldu. Mən proqram materiallarına baxıb onunla hansı sinifdə "açıq dərs" aparacağını nəzərdən keçirdim.

Manaf X sinif şagirdi olduğundan VI sinifdə tədris edilən litosfer bölməsində "Vulkanlar, palçıq vulkanları, isti bulaqlar və qeyzerlər" mövzusunu seçdi. Siniflə, şagirdlərlə tanış oldu. Onlara bəzi tapşırıqlar verdi. Həmişəkindən fərqli olaraq direktor və müavinləri əvəz edən şagirdlər bütün gün onların vəzifələrini məsuliyyətlə yerinə yetirdilər. "Açıq dərs"lər, viktorinalar təşkil edən şagirdlər çox fəal idilər. Həmin gün məktəbimizə dəvət olunmuş qonaqlar bu tədbirlərdən çox razı qaldılar. Şuşa Rayon Malıbəyli kənd orta məktəbinin tədbirə dəvət olunmuş direktor və müəllimləri Manafın "açıq dərs"ində iştirak etdilər. Manaf sinfi təşkil etdi, davamiyyəti yoxladı. Şagirdləri qruplara böldü. "Şahdağ", "Göygöl", "Dəlidağ" qruplarına tapşırıqlar verdi. Hər bir qrup test tapşırıqlarını həll etdi. Qrupun liderləri biri-birinin tapşırıqlarını yoxladılar. Qruplar ballarla qiymətləndirildi. Sonra şagirdim yeni dərsi motivasiya üsulu ilə təyin etdi.

Şagirdim hazırladığı slaydları bir-bir təqdim etdi. Vulkanın sxemi, müxtəlif vulkanlar, ən böyük sönmüş vulkan Akankaqua, ən böyük fəaliyyətdə olan vulkan Lyülyaylyako, ən böyük kaldera, ən çox qeyzer olan yerlər, onların şəkillərini təqdim etdi. Onların hər biri haqqında məlumat verdi, xəritədə yerlərini göstərdi. Sonra onların artıq bəzi ölkələrdə geotermal enerji mənbəyi kimi istifadə olunmasını nəzərə çatdırdı. Respublikamızın da ərazisində geotermal enerji mənbələri olduğunu vurğuladı. Qruplara yeni mövzuya aid test tapşırıqları verdi. Xəritədə mövzuya aid yer adlarının sorğusunu apardı. Qruplara hədiyyə verildi.

Hamı dərsdən çox razı qaldı. Şagirdin hər bir xırdalıqları bilməsi və izah etməsi hamı tərəfindən çox bəyənildi.

Bu işin əsas mahiyyəti şagirdlərin bilik və bacarığını üzə çıxartmaqdır. Belə tədbirlər şagirdlərdə liderlik keyfiyyətini yüksəldir, özünəinam yaradır.

Belə tədbirlərdə iştirak üçün daha çox oğlan uşaqlarının seçilməsi onlarda  müəllimlik peşəsinə marağı artırır. 

Bənövşə NƏBİYEVA,
Bakı Slavyan Universitetinin nəzdində məktəb-lisey
kompleksinin coğrafiya müəllimi